Ezekiel 9 - Ti Biblia (1973)

Dusa ti Jerusalem.

¹ Idin isu nagickis cadagiti pagdengngegco iti natbag a timec, a kinunana, Paasitgenyo ida dagiti agaywan iti ili tunggal tao siiiggem iti igamna a panggubat.

² Ket adtoy, a dagiti innem a lallaki naggapuda iti dalan ti nangatngato a ruangan, a simmango iti amianan, tunggal maysa siiiggem iti igamna a pagpatay; ket maysa a lalaki iti tengngada nacacawes iti lienzo, nga adda pagtinteroan ti mannurat iti siketna. Ket simrecda, ket nagtacderda iti arpad ti altar a gambang.

³ Ket ti dayag ti Dios ti Israel nagpangato nanipud idi kerubin, nga yanna idi, inggana iti dapian ti balay: ket inayabanna ti lalaki a nacacawes iti lienzo, nga adda pagtinteroan ti mannurat iti siketna.

⁴ Ket ni Jehova kinunana kencuana, Lumabasca iti tengnga ti ili, iti nagtengngaan ti Jerusalem, ket iccam ti tanda ti muging dagiti lallaki nga agsaibbec ken agsangit gapu cadagiti amin a kinarimon a maar-aramid iti nagtengngaanna.

⁵ Ket cadagiti sabali kinunana iti panagdengngegco, Lumabascayo iti ili iti licudanna, ket cabilenyo: saan coma a mangisakit ti matayo, ket dicayo met mangngaasi;

⁶ Papatayenyo nga ikisap dagiti lallacay, babbaro ken babbalasang, ububbing ken babbai; ngem dicayto asitgan ti siasinoman a tao nga adda tandana: ket mangrugicayo idiay santuarioc. Idin rinugianda cadagiti lallacay nga adda iti sango ti balay.

⁷ Ket kinunana cadacuada, tulawanyo ti balay, punnoenyo dagiti paraangan cadagiti napapatay: rumuarcayo. Ket rimmuarda, ket nagcabilda iti ili.

⁸ Ket napasamac, idinto a nagcabcabilda, ket nabatiac, a nagpaclebac, ket nagpuccawac, ket kinunac, O Apo Jehova! dadaelemto aya amin a natda iti Israel iti panangibuyatmo iti pungtotmo iti Jerusalem?

⁹ Idin kinunana caniac, Iti kinadakes ti balay ti Israel ken ti Juda napalalo unay, ket ti daga napno iti dara, ket ti ili napno iti panangkillo iti panangocom: ta cunada, ni Jehova binaybay-anna ti daga, ket ni Jehova saan a macakita.

¹⁰ Ket no maipapan met caniac, ti matac saanto a mangisakit, ket diacto met mangaasi, ngem iyegconto ti dalanda iti rabaw dagiti ol-oloda.

¹¹ Ket, adtoy, a daydi lalaki a nagcawes iti lienzo, nga adda pagtinteroan iti siketna, impadamagna ti banag, a kinunana, Inaramidco a cas imbilinmo caniac.