Ezekiel 8 - Ti Biblia (1973)

Ti sirmata a maipapan cadagiti kinarimon ti Jerusalem.

¹ Ket napasamac idi maicanem a tawen, iti bulan a maicanem, iti maicalima nga aldaw ti bulan, idi nga agtugtugawac iti balayco, ket dagiti lallacay ti Juda situtugawda iti saclangco, a ti ima ni Apo Jehova nagdisso caniac idiay.

² Idin nakitac ket, adtoy, ti maysa a langa nga umasping iti apuy; manipud iti langa dagiti lomona nga agpababa, apuy; ket manipud cadagiti lomona nga agpangato, nasileng, a cas la nalunag a metal.

³ Ket isu inyunnatna ti casla maysa nga ima, ket tiniliwnac a pinungot iti olo; ket ti Espiritu intayagnac iti nagbaetan ti daga ken langit, ket babaen cadagiti sirmata a nadiosan impannac idiay Jerusalem, iti pagsercan ti ruangan ti makinuneg a paraangan a tumurong iti amianan; a yan idi ti pagtugawan ti ladawan ti imon, a manggargar ti imon.

⁴ Ket, adtoy, ti dayag ti Dios ti Israel, adda idi idiay a cas iti langa a nakitac idiay tanap.

⁵ Idin kinunana caniac, Anac ti tao, itangadmo ita dagita matam nga iturongmo iti agpaamianan. Gapuna intangadco dagiti matac nga inturong iti agpaamianan, ket adtoy, iti amianan ti ruangan ti altar daydi ladawan ti imon iti pagsercan.

⁶ Ket kinunana caniac, Anac ti tao, makitam ti aramidenda? dagiti met laeng dackel a kinarimon a ti balay ti Israel aramidenna ditoy, tapno umadayuac coma iti santuarioc? ngem sica makitamto manen dagiti sabali pay a dadackel a kinarimon.

⁷ Ket impannac iti ruangan ti paraangan; ket idi kimmitaac, adtoy, ti maysa nga abut iti bacud.

⁸ Idin kinunana caniac, Anac ti tao, agcalica ita iti bacud: ket idi kinaliac ti bacud, adtoy, ti maysa a ruangan.

⁹ Ket kinunana caniac, sumrecca, ket kitaem dagiti dakes a kinarimon nga aramidenda ditoy.

¹⁰ Simrecac ngarud ket nakitac; ket adtoy, ti amin a kita ti agay-ayam, ken nacarimrimon nga animal, ken amin a didiosen iti balay ti Israel, a naiburicda iti bacud nga aglicmut.

¹¹ Ket nagtacder iti sangoda dagiti pito pulo a lallaki cadagiti lallacay iti balay ti Israel; ket iti nagtengngaanda nagtacder ni Jaazanias nga anac a lalaki ni Safan, tunggal tao adda paginciensoanna iti imana; ket ti banglo ti ulep ti incienso ngimmato.

¹² Idin kinunana caniac, Anac ti tao, nakitam ti aramiden dagiti lallacay iti balay ti Israel iti sipnget, tunggal maysa a tao iti siledna addaan didiosenna? ta cunada, dinatayo makita ni Jehova; ni Jehova binaybay-anna ti daga.

¹³ Isu kinunana met caniac, Makitamto manen dagiti dadduma pay a dadackel a kinarimon nga aramidenda.

¹⁴ Idin impannac iti pagsercan ti ruangan ti balay ni Jehova nga agturong iti amianan; ket adtoy, idiay nagtugaw dagiti babbai a sangsangitanda ti Tammuz.

¹⁵ Idin kinunana caniac, Nakitamon daytoy, O anac ti tao? Makitamto manen dagiti dacdackel pay a kinarimon ngem dagitoy.

¹⁶ Ket inserrecnac iti naununeg a paraangan ti balay ni Jehova; ket adtoy, idiay ruangan ti templo ni Jehova, iti nagbaetan ti balcon ken ti altar, ti casla duapulo ket lima a lallaki, a dagiti bucotda inturongda iti templo ni Jehova, ket dagiti rupada iti daya; ket nagrucrucbabda iti init a simmangoda iti daya.

¹⁷ Idin kinunana caniac, Nakitam daytoy, O anac ti tao? Nalag-an aya a banag iti balay ti Juda nga aramidenda dagiti kinarimon nga aramidenda ditoy ta pinunnoda ti daga iti panagagaw, ket nagsublida manen tapno pagpungtotendac: ket, adtoy, nga iccanda ti sanga iti agongda.

¹⁸ Gapuna agaramidacto met a sipupungtot; ti matac dinto mangisakit, ket diacto met mangaasi; ket uray agpuccawda iti natbag a timec cadagiti pagdengngegco, diacto laeng ipangag ida.