Ezekiel 4 - Ti Biblia (1973)

Ti pannacalacub ti Jerusalem maipadto.

¹ Sica met, anac ti tao, alaem ti maysa a baldosa, ket icabilmo iti sangom, ket iburicmo kencuana ti maysa nga ili, ti Jerusalem met laeng:

² Ket isu lacubem, ket mangbangonca iti sarikedked a maicaniwas kencuana, ket mangbangonca iti turod a maibusor kencuana; mangicabilca met cadagiti pacarso a maibusor kencuana, ket mangipasdecca cadagiti makina a pagracrac kencuana iti aglicmut.

³ Ket mangalaca iti sarten a landoc, ket isu icabilmo cas maysa a bacud a landoc iti baet sica ken iti ili ket sumangoca kencuana, ket isu malacubto, ket sica ti manglacub kencuana. Daytoy isunto ti maysa a tanda iti balay ti Israel.

⁴ Castamet sica agiddaca nga agsikig iti catigid, ket icabilmo ti kinadakes ti balay ti Israel iti rabawmo; cas mainugot iti bilang dagiti al-aldaw a panagiddam a casta, awitemto ti kinadangkesda.

⁵ Ta insaadco kenca dagiti tawen ti kinadakesda cas iti bilang dagiti aldaw, a tallo gasut ket siam a pulo nga aldaw: castanto ti panangawitmo iti kinadangkes ti balay ti Israel.

⁶ Ket intono matungpalmo dagitoy, agiddacanto nga agsikig iti macanawan, ket awitemto ti kinadakes ti balay ti Juda: uppat a pulo nga aldaw, tunggal aldaw maipaay iti macatawen, isu ti inkeddengco kenca.

⁷ Ket sumangocanto iti nalacub a Jerusalem, a sililislis ti tackiagmo; ket agipadtocanto iti maibusor kencuana.

⁸ Ket, adtoy, mangicabilac cadagiti tali iti rabawmo, ket saancanto a macapusipos manipud maysa a sikigan agingga iti sabali, agingga iti matungpalmo dagiti aldaw ti pananglacubmo.

⁹ Mangicuyogca met iti trigo, ken cebada, ken ot-otong, ken patani, ken mijo, ken espelta, ket icabilmo ida iti maysa nga alicamen, ket aramidem ida a tinapay; cas mainugot iti bilang dagiti aldaw a panagiddamto nga agsikig, bayat ti tallo gasut ket siam a pulo nga aldaw, mangancanto iti daydiay.

¹⁰ Ket ti taraonmo a canemto, matimbengto duapulo a siclo iti maysa nga aldaw: ket mangancanto iti nakedngan a pannawen.

¹¹ Ket uminumcanto iti danum a sinucat, ti apagcanem ti maysa nga hin: tunggal pannawen a nakedngan uminumcanto.

¹² Ket isu canemto a cas cadagiti bibingca a cebada, ket isu lutoem iti horno iti imatangda a sungrudan iti ibleng ti tao.

¹³ Ket ni Jehova kinunana, Wen castoy ti pannangan dagiti annac ti Israel iti di nadalus a tinapayda iti nagtengngaan dagiti nasnacion isu a pangiturongacto cadacuada.

¹⁴ Iti casta kinunac, Ay Apo Jehova! adtoy ti cararuac saan a natulawan; ta nanipud kinaubingco inggana met laeng ita saanac a nangan iti aniaman a natay latta, wenno rinangrangcay dagiti animal; ket di met simrec iti ngiwatco ti lasag a macarimon.

¹⁵ Ngarud kinunana caniac, Kitaem, iniccanca iti ibleng ti vaca a maisuno iti ibleng ti tao, ket panglutomto iti tinapaymo.

¹⁶ Castamet kinunana caniac, Anac ti tao, adtoy, dadaelecto ti pagtalgedan a tinapay idiay Jerusalem: ket mangandanto iti tinapay a tinimbeng, ken sibubuteng; ket inumendanto ti danum a sinucat, ken sicucullayaw:

¹⁷ Tapno agkirangda iti tinapay ken danum, ket agkikinnitada a sicucullayaw ket cumapcapuyda maipuon iti kinadakesda.