Ezekiel 3 - Ti Biblia (1973)

Ti nacaibaonan ti mammadto.

¹ Ket kinunana caniac, Anac ti tao, canem ti matumpongamto; canem daytoy a lucot, ket inca, agsaoca iti balay ti Israel.

² Gapuna a nagngangaac, ket impacanna caniac daydi a linucot.

³ Ket kinunana caniac, Anac ti tao, pacanem coma ti tianmo, ket punnoem dagita unegmo itoy linucot nga itedco kenca. Idin kinnanco; ket adda iti ngiwatco a cas iti diro ti kinasam-itna.

⁴ Ket kinunana caniac, Anac ti tao, inca, dumtengca iti balay ti Israel, ket isaom dagiti saoc cadacuada.

⁵ Ta saanca a naibaon iti ili a gangannaet ti saona, wenno narigat ti pagsasaona, no di ket idiay balay ti Israel;

⁶ Saan nga iti adu nga ili a gangannaet ti pagsasaona wenno narigat, a dagiti saoda dica maawatan. Awan duadua no ibaonca coma cadacuada, denggendaca coma.

⁷ Ngem ti balay ti Israel saandacanto nga ipangag; ta saandac nga ipangag: ta amin a balay ti Israel natangken ti mugingda ket natangken ti pusoda.

⁸ Adtoy, pinarupangetco ti rupam a maibusor cadagiti ruprupada, ken ti mugingmo a natangken a maibusor cadagiti mugmugingda.

⁹ Inaramidco ti mugingmo a cas pamulinawen a natangtangken ngem bato a pagpingkian: dica agbuteng cadacuada, ket dica met agcullayaw iti panangkitada, nupay nasukirda a balay.

¹⁰ Kinunana manen caniac, Anac ti tao, dagiti amin a sasaoc a saoecto kenca awatem ita pusom, ket imdengam cadagita pagdengngegmo.

¹¹ Ket inca, ket dumtengca cadagiti nacayawan, cadagiti annac ti ilim, ket saoem cadacuada, ket ibagam cadacuada, Castoy ti cuna ni Apo Jehova; uray dumngegdanto, uray no madida.

¹² Idin ti espiritu binagcatnac, ket nangngegco iti licudac ti maysa a timec ti dackel nga ungor, a kinunana, Bendito coma ti dayag ni Jehova manipud iti yanna.

¹³ Ket nangngegco ti daranudor dagiti payac dagiti parsua a sibibiag a nagsisinnagidda, ken ti daranudor dagiti pilid iti dennada, ken ti met daranudor ti dackel nga ungor.

¹⁴ Iti casta ti espiritu binagcatnac, ket impanawnac; ket napanac a sipapait ti nakemco, ken iti pudot ti espirituc; ket ti ima ni Jehova napigsa idi caniac.

¹⁵ Idin dimtengac cadagiti nacayawan idiay Telabib, nga agyanda idiay denna ti carayan a Kebar, ket agingga idiay nagtaenganda; ket nagtugawac idiay a naitulmeng iti nagbabaetanda, bayat ti pito nga aldaw.

¹⁶ Ket naaramid nga iti calpasan ti pito nga aldaw, dimteng caniac ti sao ni Jehova a kinunana,

¹⁷ Anac ti tao, siac insaadca nga agbantay iti balay ti Israel: denggem ngarud ti sao ti ngiwatco, ket pacdaaram ida iti biangco.

¹⁸ Intono cunac iti managdacdakes, Pudno a mataycanto; ket isu dica pacdaaran, wenno pagsaoan tapno ti managdakes mabagbagaan coma iti dakes a dalanna, tapno maispal ti biagna; daytoy met laeng a managdacdakes matayto iti kinadakesna; ngem ti darana sapulecto iti imam.

¹⁹ Ngem no sica pacdaaram ti managdacdakes, ket isu dinto agbalbaliw iti kinadakesna, wenno iti dakes a dalanna, isu matayto iti kinadangkesna, ngem sica maispalmo ti cararuam.

²⁰ Castamet, no ti tao a nalinteg idianna ti kinalintegna, ket agaramid iti kinadangkes, ket siac icabilco ti pacaitibcolan iti sangoananna, isu matayto: agsipud ta isu dica pinacdaaran matayto iti basolna, ket dagiti nalinteg nga inaramidna dinto malagipen; ngem ti darana sapulecto iti imam.

²¹ Ngem no patigmaanamto ti tao a nasingpet, tapno ti nasingpet di agbasol, ket iti casta saan nga agbasol, agbiagto a di bumurong, ta napatigmaanan, ket sica maispalmo ti cararuam.

²² Ket ti ima ni Jehova adda idi caniac idiay ket kinunana caniac, Tumacderca ket rumuarca iti tanap, ket idiay makisaoacto kenca.

²³ Ngarud timmacderac, ket napanac iti tanap: ket adtoy, ti dayag ni Jehova nagtacder idiay, cas la ti dayag a nakitac iti denna ti carayan a Kebar; ket nagpaclebac.

²⁴ Idin simrec caniac ti Espiritu, ket pinatacdernac; ket nagsao caniac, ket kinunana, Inca, ket sumrecca iti balaymo ket rikepam.

²⁵ Ngem sica, anac ti tao, adtoy, iparabawdanto kenca dagiti pagreppet, ket cadacuada parautandacanto, dicanto rumuar cadagiti pagbabaetanda:

²⁶ Ipadketconto dayta dilam dita ngadasmo, tapno agumelca, ken saancanto a mangbabalaw cadacuada; ta isuda nasukirda a balay.

²⁷ Ngem no casaoca, luctacto ti ngiwatmo, ket cunamto cadacuada, Castoy ti cuna ni Apo Jehova: Daydiay dumngeg, mangipangag coma; ket daydiay madi nga agdengngeg, madi coma laeng; ta isuda nasukirda a balay.