Ezekiel 2 - Ti Biblia (1973)

Ti pannacaayab ni Ezequiel.

¹ Ket kinunana caniac; Anac ti tao, tumacderca, ket makisaoacto kenca.

² Ket ti Espiritu simrec caniac idi nakisao caniac, ket pinatacdernac; ket nangngegco daydiay a nagsao caniac.

³ Ket kinunana caniac; Anac ti tao, siac ibaonca cadagiti annac ti Israel, cadagiti nasnacion a nasukir, a nagsukir a maibusor caniac: isuda ken dagiti ammada nagsalungasingda a maibusor caniac uray pay itoy met laeng nga aldaw.

⁴ Ket dagiti annac nasabracda ken nabangadda: siac ibaonca cadacuada; ket cunamto cadacuada, Castoy ti cuna ni Apo Jehova.

⁵ Ket isuda, uray dumngegdanto, wenno madidanto (ta isuda nasukirda a balay), nupay casta ammodanto nga addan mammadto cadacuada.

⁶ Ket sica, anac ti tao; dica agbuteng cadacuada, wenno agamac cadagiti sasaoda, uray pay calcalunay ken cascasumba addada coma kenca, ket agnaedca iti nagtengngaan dagiti manggagama: dica mabuteng cadagiti sasaoda, wenno agcullayaw iti panangkitada, nupay isuda nasukirda a balay.

⁷ Ket saoemto cadacuada dagiti sasaoc, uray dumngegdanto, wenno madidanto; ta nasukirda unay.

⁸ Ngem sica, anac ti tao; denggem ti saoec kenca; saanca coma a nasukir a cas dayta nasukir a balay: agngangaca, ket canem ti itdec kenca.

⁹ Ket idi kinitac, adtoy, maysa nga ima a nangigay-at caniac; ket, adtoy, adda kencuana ti maysa a lucot a libro;

¹⁰ Ket isu inucradna iti sangoc: ket nasuratan iti uneg ken ruarna; ket dagiti naisurat kencuana un-unnoy, ken sangsangit, ken ay-ay-ay.