Ezekiel 10 - Ti Biblia (1973)

Iti maicadua a sirmata cadagiti kerubin.

¹ Idin kimmitaac, ket, adtoy, iti tangatang nga adda idi iti ngato ti olo dagiti kerubin a nagparang iti ngatoda ti cas la maysa a bato a zafiro, a cas langa nga umasping iti maysa a trono.

² Ket ti Apo nagsao iti lalaki a nagcawes iti lienzo, ket kinunana, Sumrecca iti nagbaetan dagiti pilid nga agpuspusipus, iti met laeng baba dagiti kerubin, ket punnoem dagita dua nga imam cadagiti beggang manipud iti nagbaetan dagiti kerubin, ket punnoem dagita dua nga imam cadagiti beggang manipud iti nagbaetan dagiti kerubin, ket iwarismo ida iti ili. Ket isu simrec a kitkitaec.

³ Ket dagiti kerubin nagtacderda iti sikigan a macanawan ti balay, idi a ti lalaki simrec; ket ti ulep pinunnona ti naununeg a paraangan.

⁴ Ket ti dayag ni Jehova nagpangato manipud iti kerubin, ket nagtacder iti dapian ti balay; ket ti balay napno iti ulep, ket ti paraangan napno iti raniag ti dayag ni Jehova.

⁵ Ket ti awer dagiti payac dagiti kerubin nangngeg agingga met laeng iti makinruar a paraangan, a cas la ti timec ti Dios a Mannacabalin-amin no agsao.

⁶ Ket napasamac, idi binilinna daydi lalaki a nacacawes iti lienzo, a kinunana, Mangalaca ti apuy manipud iti nagbaetan dagiti pilid nga agpuspusipus, manipud iti nagbaetan dagiti kerubin, nga isu simrec ket nagtacder iti arpad ti maysa a pilid.

⁷ Ket ti kerubin inyunnatna ti imana manipud iti nagbaetan dagiti kerubin agingga iti apuy nga adda iti nagbaetan dagiti kerubin, ket nangala iti apuy, ket incabilna iti ima daydi nacacawes iti lienzo, isu nga innalana ket rimmuar.

⁸ Ket nagparang cadagiti kerubin ti langa ti maysa nga ima ti tao iti baba dagiti payacda.

⁹ Ket nakitac, ket adtoy, dagiti uppat a pilid iti arpad dagiti kerubin, maysa a pilid iti arpad ti maysa a kerubin, ket sabali a pilid iti arpad ti sabali a kerubin; ket ti langa dagiti pilpilid cas la bato a berilo.

¹⁰ Ket no maipapan iti langada, isuda nga uppat maymaysa ti caaspingda, casla maysa a pilid naglasud iti maysa a pilid.

¹¹ No magnada, napanda cadagiti uppat a turongda: saanda a nagbawing bayat ti ipapanda, no di ket iti disso a turongen ti oloda isu ti sinurotda; saanda a nagbawing iti bayat ti ipapanda.

¹² Ket amin a bagida, ken dagiti bucotda, ken dagiti imada, ken dagiti payacda, ken dagiti pilid, napnoda cadagiti matmata iti aglicmut, dagiti met laeng pilpilid nga adda cadacuada nga uppat.

¹³ No maipapan cadagiti pilpilid, iti dengngegco nainagananda natayyec a pilpilid.

¹⁴ Ket tunggal maysa adda idi uppat a rupana: ti umuna a rupa rupa ti kerubin, ket ti maicadua a rupa rupa ti tao, ket ti maicatlo rupa ti leon, ket ti maicapat rupa ti aguila.

¹⁵ Ket dagiti kerubin ngimmatoda: daytoy ti parsua a sibibiag a nakitac iti denna ti carayan a Kebar.

¹⁶ Ket idi nagna dagiti kerubin, dagiti pilid napanda iti arpadda; ket idi dagiti kerubin intayagda dagiti payacda tapno ngumatoda manipud iti daga, dagiti pilid saanda met a simmina iti arpadda.

¹⁷ Idi nagtacder, dagidiay, dagitoy nagtacderda met ket idi ngimmato, dagidiay, dagitoy ngimmatoda a naicuyog cadacuada: ta ti espiritu ti sibibiag a parsua adda idi cadacuada.

¹⁸ Ket ti dayag ni Jehova rimmuar nanipud iti ngato ti dapian ti balay, ket nagsardeng iti ngato dagiti kerubin.

¹⁹ Ket dagiti kerubin intayagda dagiti payacda, ket ngimmatoda manipud iti daga iti imatangco idi rimmuarda, ken dagiti pilid iti arpadda: ket nagtacderda iti pagsercan ti makindaya a ruangan ti balay ni Jehova; ket ti dayag ti Dios ti Israel adda idi iti ngatoda.

²⁰ Daytoy ti parsua a sibibiag a nakitac iti baba ti Dios ti Israel iti denna ti carayan a Kebar; ket nabigbigco a kerubinda.

²¹ Tunggal maysa adda uppat a rupana, ket tunggal maysa uppat dagiti payacna; ket ti caasping ti ima ti tao adda idi iti baba dagiti payacda.

²² Ket no maipapan iti caasping dagiti ruprupada, isuda dagidi ruprupa a nakitac iti denna ti carayan a Kebar, ti langada ken isuda met laeng; nagnada tunggal maysa iti pagturongan ti rupana.