Ezekiel 1 - Ti Biblia (1973)

Iti umuna a sirmata a maipapan cadagiti Kerubin.

¹ Ket naaramid idi maicatlopulo a tawen, iti bulan a maicapat, iti maicalima nga aldaw ti bulan, idi addaac cadagiti nacayawan iti denna ti carayan a Kebar, a dagiti langlangit naluctanda, ket nakitac dagiti sirmata ti Dios.

² Iti maicalima nga aldaw ti bulan, nga isu idi maicalima a tawen ti pannacacayaw ni ari Joakim,

³ Ti sao ni Jehova dimteng a naisingayan ken ni Ezequiel a padi nga anac ni Buzi, idiay daga dagiti Caldeos iti denna ti carayan a Kebar; ket ti ima ni Jehova adda kencuana sadiay.

⁴ Ket nakitac, ket adtoy, ti maysa nga angin a nadawel a naggapu iti amianan, maysa a dackel nga ulep, agraman apuy nga agluclucot, ken raniag iti aglicmut kencuana, ket naggapu iti tengngana ti cas bumarbara a metal, a naggapu iti tengnga ti apuy.

⁵ Ket manipud iti tengngana rimmuar ti caasping dagiti uppat a parsua a sibibiag. Ket daytoy idi ti langada: Adda cadacuada ti caasping ti tao;

⁶ Ket tunggal maysa adda uppat a rupana, ket tunggal maysa cadacuada adda idi uppat a payacna.

⁷ Ket dagiti sacsacada nalintegda; ket ti dapan dagiti sacsacada cas la dapan ti urbon a vaca; ket rumimatrimatda a cas la gambang a napasileng.

⁸ Ket addaanda cadagiti im-ima ti tao iti baba dagiti payacda iti uppat a sikiganda; ket isuda nga uppat adda dagiti rupada ken dagiti payacda a castoy:

⁹ Cadagiti payac ti nacaicaptan ti maysa iti caduana; saanda nga aggarfaw no magnada; agturong tunggal maysa iti turong ti rupana.

¹⁰ No maipapan iti langa dagiti rupada, adda idi cadacuada rupa ti tao; ket isuda nga uppat adda idi rupa ti maysa a leon iti makincanawan; ket isuda nga uppat adda idi ti rupa ti vaca iti makincatigid; ket isuda nga uppat adda met idi ti rupa ti maysa nga aguila.

¹¹ Ket dagiti rupada ken dagiti payacda nagsinada iti ngato; dua a payac iti tunggal maysa nagcapetda ti maysa iti sabali, ket dua pangabbongda cadagiti bagida.

¹² Ket nagnada tunggal maysa iti turong ti rupana: iti sadinoman a papanan coma ti espiritu napanda; ket awan ti panagbawing ti pannagnada.

¹³ No maipapan iti caasping dagiti parsua a sibibiag, ti langada cas la beggang a sumsumged cas la langa dagiti alaluten a sidadarang: ti apuy ngimmato ken bimmaba iti nagtengngaan dagiti sibibiag a parsua; ket ti apuy naraniag idi, ket iti apuy rimmuar ti kimat.

¹⁴ Ket dagiti parsua a sibibiag nagtarayda ken nagsublida a cas la langa ti kilap ti kimat.

¹⁵ Ket bayat ti panagkitac cadagiti parsua a sibibiag, adtoy, ti maysa a pilid iti rabaw ti daga iti denna dagiti parsua a sibibiag, iti saggaysa cadagiti uppat a rupada.

¹⁶ Ti langa dagiti pilid ken ti pannacaaramidda cas la berilo: ket isuda nga uppat sangsangcalangada; ket ti langada ken ti pannacaaramidda cas la maysa a pilid iti uneg ti pilid.

¹⁷ Idi nagnada, napanda cadagiti uppat a turongda: ket dida nagbawing idi nagnada.

¹⁸ No maipapan cadagiti camada, nangatoda ket nacabutbuteng; ket dagiti cama dagiti uppat napnoda cadagiti matmata iti aglicmut.

¹⁹ Ket idi nagna dagidi parsua a sibibiag, dagidi pilid kimmuyogda met iti arpadda, ket idi a dagidi parsua a sibibiag naipangatoda a naggapu iti daga, dagiti pilid naipangatoda met.

²⁰ Uray sadino a papanan coma ti espiritu, napanda met: ket ti napanan coma ti espiritu; dagiti pilid naipangatoda iti arpadda; ta ti espiritu ti parsua a sibibiag adda idi cadagiti pilid.

²¹ Idi nagna dagidiay, nagna dagitoy; ket idi nagsardeng dagidiay, nagsardeng dagitoy; ket idi dagidiay naipangatoda iti daga, dagiti pilid naipangatoda iti arpadda: ta ti espiritu ti parsua a sibibiag adda cadagiti pilid.

²² Ket iti rabaw ti olo ti parsua a sibibiag adda idi ti caasping ti tangatang, a cas la cristal a nacabutbuteng a perngen, a nayucrad iti rabaw dagiti oloda.

²³ Ket iti siroc ti tangatang adda dagiti payacda a nalinteg, ti maysa agturong iti sabali: cadagiti bagida tunggal maysa adda dua a nangabbong iti daytoy a bacrang, ket tunggal maysa adda dua a nangabbong iti dayta a bacrang.

²⁴ Ket idi nagnada, nangngegco ti daranudor dagiti payacda a cas la daranudor dagiti dadackel a danum, a cas la timec ti Mannacabalin-amin; ti daranudor ti gulogulo a cas la daranudor ti buyot: idi simmardengda, imbabada dagiti payacda.

²⁵ Ket adda maysa a timec iti tangatang nga adda idi iti rabaw dagiti oloda: idi nagsardengda, imbabada dagiti payacda.

²⁶ Ket iti rabaw ti tangatang nga adda iti rabaw dagiti oloda adda idi ti caasping ti maysa a trono, a cas la kita ti bato a zafiro; ket iti rabaw daydi caasping ti trono adda cas la langa ti maysa a tao.

²⁷ Ket nakitac ti cas la bumarbara a metal, a cas la apuy iti unegna ti aglicmut, manipud iti caasping dagiti lomona nga agpangato; ken manipud cadagiti lomona nga agpababa, nakitac a cas la apuy, ket adda raniagna iti aglicmut kencuana.

²⁸ A cas ti kita ti bullalayaw nga adda iti ulep iti aldaw ti panagtudo, casta idi ti kita ti raniag iti aglicmut. Daytoy idi ti kita ti caasping ti dayag ni Jehova. Ket idi nakitac, nagpaclebac, ket nangngegco ti timec ti maysa a nagsao.