Exodo 8 - Ti Biblia (1973)

Didigra nga isuda dagiti tuc-tucac; dagiti cutcuto; dagiti ngilngilaw.

¹ Ket ni Jehova kinunana ken Moises, Inca ken Faraon, ket cunam kencuana, Castoy ti cuna ni Jehova, Bayam a pumanaw ti ilic tapno agdaydayawda caniac.

² Ket no cas dica cayat a palubosan ida, adtoy, a cadagiti tuctucac dusaecto ti amin a beddengmo:

³ Ket iti carayan ti pagaduanto dagiti tuctucac, nga umulidanto ket dumanondanto iti balaymo, ken iti uneg ti siled a pagturogam, ken iti rabaw ti pagiddaam, ken iti balay dagiti ad-adipenmo, ken cadagiti iturayam, ken cadagiti horhornom, ken cadagiti pagmasmasaam iti tinapay:

⁴ Ket dagiti tuctucac uliendacanto met, ken dagiti iturayam, ken amin dagiti ad-adipenmo.

⁵ Ket ni Jehova kinunana ken Moises, Saoem, ken Aaron, Yunnatmo ta imam a siiggem ti sarucod iti rabaw dagiti carcarayan, ken dagiti wawaig ken dagiti dandanaw, ket pasangatem dagiti tuctucac iti daga nga Egipto.

⁶ Ket ni Aaron inyunnatna ti imana iti rabaw dagiti dandanum sadi Egipto; ket immuli dagiti tuctucac a namungon iti daga nga Egipto.

⁷ Ket dagiti managsalamangca inaramidda ti casta cadagiti salsalamangcada, ket nangpaulida cadagiti tuctucac iti daga nga Egipto.

⁸ Idin ni Faraon pinaayabanna da Moises ken ni Aaron, ket kinunana, Agdawatcayo ken Jehova, tapno iccatenna caniac dagiti tuctucac, ken cadagiti iturayac; ket bay-acto a pumanaw ti umili, tapno agdatonda ken Jehova.

⁹ Ket ni Moises kinunana ken Faraon, Daytoy ti gundawaymo caniac: ania nga aldaw ti dawatec gapu cadagiti ad-adipenmo, ken iti ilim, tapno dagiti tuctucac mapucawda kenca ken cadagiti balbalaymo, ket iti la carayan ti pagbatianda?

¹⁰ Ket kinunana, Intono bigat. Ket ni Moises kinunana, Maaramid coma cas ti saom; tapno ammoem nga awan sabali a cas ken Jehova a Diosmi.

¹¹ Ket dagiti tuctucac panawandacanto ken cadagiti balbalaymo ken cadagiti ad-adipenmo ken cadagiti iturayam; ti laeng carayan ti pagbatiandanto.

¹² Ket da Moises ken Aaron pinmanawda iti ayan ni Faraon: ket ni Moises inawaganna ni Jehova maipanggep cadagiti tuctucac nga impanna idi ken Faraon.

¹³ Ket ni Jehova inaramidna cas iti dinawat ni Moises; ket dagiti tuctucac natayda cadagiti balbalay, cadagiti parparaangan, ken cadagiti aw-away.

¹⁴ Ket inornongda ida a nabunbunton; ket ti daga nagbuyoc.

¹⁵ Ngem idi nakita ni Faraon nga ada bang-ar idi, pinatangkenna ti pusona, ket dina ida impangag; cas ni Jehova imbagana idi.

¹⁶ Ket ni Jehova kinunana ken Moises, Saoem ken Aaron, Ilayatmo ta sarucodmo, ket baotem ti tapuc ti daga tapno agbalinda a cutcuto iti amin a daga nga Egipto.

¹⁷ Ket casta ti inaramidda; ket ni Aaron inyunnatna ti imana a siiggem iti sarucod, ket imbaotna iti tapuc ti daga, ket timmaud dagiti cutcuto a kimpet iti tao ken iti animal; amin a tapuc iti daga nagbalin a cutcuto iti isu-amin a daga nga Egipto.

¹⁸ Ket dagiti managsalamangca inaramatda dagiti salsalamangcada tapno mangpataudda cadagiti cutcuto, ngem dida nabalinan: ket kinuto idi ti tao ken ti animal.

¹⁹ Idin dagiti managsalamangca kinunada ken Faraon, Ramay ti Dios daytoy: ket ti puso ni Faraon napatangken, ket saanna ida nga impangag; cas idi sinao ni Jehova.

²⁰ Ket ni Jehova kinunana ken Moises, Bumangonca a masapa no bigat ket sumangoca ken Faraon; adtoy, ta mapan iti danum; ket cunam kencuana, Ni Jehova castoy ti saona, Bay-am a pumanaw ti ilic tapno agdaydayawda caniac.

²¹ Ta, no dica bay-an a pumanaw ti ilic, adtoy, ta ibaonconto kenca, ken cadagiti ad-adipenmo, ken cadagiti iturayam, ken cadagiti balbalaymo, ti pinangen a ngilngilaw: ket dagiti balbalay dagiti Egipcios mapnodanto cadagiti ngilngilaw a pinangen, ken ti pay daga a pagyananda.

²² Ket iti dayta nga aldaw salacnibacto ti daga a Gosen, isu a pagnaedan ti ilic, ta awanto ti pinangen a ngilngilaw sadiay; tapno pacaammoam a siac ni Jehova iti tengnga ti daga.

²³ Ket ilasinconto ti ilic iti iturayam: intono bigat addanto daytoy a pagilasinan.

²⁴ Ket ni Jehova inaramidna a casta; ket limtuad ti pinangen a ngilaw a macasemsem unay iti balay ni Faraon ken cadagiti balbalay dagiti ad-adipenna; ket iti amin a daga nga Egipto, ti daga limmaad gapu cadagiti pinangen a ngilaw.

²⁵ Ket ni Faraon pinaayabanna da Moises ken Aaron, ket kinunana, Incayo, agdatoncayo iti Diosyo iti sacup ti dagac.

²⁶ Ket ni Moises kinunana, Saan a maiparbeng nga aramidenmi ti casta; ta idatonminto ti macarurod dagiti Egipcios ken Jehova a Diosmi: adtoy, idatonminto aya ti carurod dagiti Egipcios iti sango dagiti matada ket didacamto ngata uburen?

²⁷ Tallo nga aldaw a magmagnacamto iti let-ang, ket mangidatoncamto ken Jehova a Diosmi, cas iti ibagananto cadacami.

²⁸ Ket ni Faraon kinunana, Palobusan cayto a pumanaw tapno agdatoncayto ken Jehova a Diosyo iti let-ang; isuna laeng a dicayto umadadayo unay: idawdawatandac.

²⁹ Ket ni Moises kinunana, Adtoy, panawancan, ket dawatecto ken Jehova a dagiti pinangen a ngilaw panawanda ni Faraon, ken dagiti ad-adipenna, ken ti ilina, intono bigat: isuna laeng a ni Faraon di coma mangallilawen iti dina panangpalubos iti umili a mapan agdaton ken Jehova.

³⁰ Ket ni Moises pinanawanna ni Faraon, ket nagdawat ken Jehova.

³¹ Ket ni Jehova inaramidna cas insawang ni Moises; ket pinapanawna dagiti pinangen a ngilaw ken Faraon ken cadagiti ad-adipenna ken cadagiti iturayanna; awan ket maysa a natda.

³² Ket ni Faraon timmangken pay laeng iti pusona iti daytoy a daras, ket dina pinalubosan ti umili.