Exodo 7 - Ti Biblia (1973)

Bilin nga annong da Moises ken ni Aaron. Ti Pagilasinan a sarucod ni Aaron. Ni Faraon nasubeg. Dandanum agbalinda a dara.

¹ Ket ni Jehova kinunana ken Moises, Kitaem ta binalinca a cas Dios ken Faraon; ket ni cabsatmo nga Aaron isunto ti mammadtom.

² Sica saoemto amin dagiti ibilinco kenca, ket ni Aaron a cabsatmo ibagananto ken Faraon a bay-anna a pumanaw iti dagana dagiti annac ti Israel.

³ Ket patangkenecto ti puso ni Faraon, ket paaduecto sadiay a daga nga Egipto dagiti pagilaslasinan caniac ken dagiti datdatlagco.

⁴ Ngem ni Faraon saanto a dumngeg cadacayo ket isaadconto ti imac iti Egipto ket ipanawconto dagiti buybuyotco, ti ilic, dagiti annac ti Israel, manipud iti daga nga Egipto, nga aramatec dagiti dadackel a panangocom.

⁵ Ket dagiti Egipcios maamoandanto a siac ni Jehova, no ilayatco ti imac iti Egipto ken alaec dagiti annac ti Israel iti tengngada.

⁶ Ket casta ti inaramid da Moises ken Aaron; cas imbilin cadacuada ni Jehova, casta ti inaramidda.

⁷ Ket ni Moises agtawen idi iti walopulo, ket ni Aaron agtawen met iti walopulo ket tallo idi nakisaoda ken Faraon.

⁸ Ket ni Jehova nakisao cada Moises ken Aaron, a cunana,

⁹ No ni Faraon saoenna coma cadacayo, a cunana, Iparangyo ti maysa a datdatlag iti biangyo; cunaemto ngarud ken Aaron, Alaem ti sarucodmo, ket ipurruacmo iti sango ni Faraon tapno agbalin nga uleg.

¹⁰ Ket da Moises ken Aaron napanda ken Faraon, ket inaramidda, a cas ti imbilin idi ni Jehova: ket impurruac ni Aaron ti sarucodna iti sango ni Faraon ken cadagiti ad-adipenna, ket nagbalin nga uleg.

¹¹ Idin ni Faraon nangayab met cadagiti mamasirib ken managsalamangca: ket isuda met, dagiti a managsalamangcada a taga Egipto, inaramidda met ti casdiay a salamangcada.

¹² Ta ti tunggal maysa impurruacda ti sarucodna, ket nagbalinda nga ul-uleg: Ngem ti sarucod ni Aaron inalun-unna dagiti sarucodda.

¹³ Ket ti puso ni Faraon timmangken, ket saanna nga impangag ida; cas sinao idi ni Jehova.

¹⁴ Ket ni Jehova kinunana ken Moises, Ti puso ni Faraon natangken, madi a mamalubos iti ili.

¹⁵ Inca ngarud no bigat ken Faraon; adtoy, mapan iti danum; ket agtacdercanto iti igid ti carayan a sumabet kencuana; ket icuyogmonto iti imam ti sarucod a nagbalin idi nga uleg.

¹⁶ Ket saoemto kencuana, Ni Jehova a Dios dagiti Hebreos imbaonnac kenca, a cunana, Bay-am a pumanaw ti ilic, tapno agdaydayawda caniac idiay let-ang: ket, adtoy nga agpapan ita dica nangipangag.

¹⁷ Castoy ti sinao ni Jehova, Daytoyto ti pangilasinam a siac ni Jehova: adtoy, cabilecto dagiti dandanum nga addada iti carayan, iti sarucod nga adda iti imac, ket agbalindanto a dara.

¹⁸ Ket dagiti ic-ican nga adda iti carayan mataydanto, ket ti carayan agbuyocto; ket dagiti Egipcios maariecdanto nga uminum iti danum ti carayan.

¹⁹ Ket ni Jehova kinunana ken Moises, Saoem ken Aaron, alaem ti sarucodmo ket yunnatmo ti imam cadagiti dandanum ti Egipto, iti rabaw dagiti carcarayanda, iti rabaw dagiti wawaigda, ken iti rabaw dagiti dandanawda, ken amin a rabaw dagiti liblibtong ti danumda, tapno agbalinda nga dara; ket addanto dara iti amin a daga ti Egipto, uray pay cadagiti pagdanuman a cayo ken casta met cadagiti pagdanuman a bato.

²⁰ Ket casta ti inaramid da Moises ken Aaron a cas imbilin ni Jehova; ket inlayatna ti sarucod, ket imbaotna cadagiti dandanum nga adda iti carayan, iti imatang ni Faraon ken iti imatang dagiti ad-adipenna; ket amin dagiti dandanum nga adda iti carayan nagbalinda a dara.

²¹ Ket dagiti ic-ican nga adda iti carayan natayda; ket ti carayan nagbungsot, ket dagiti Egipcios saanda a nacainum iti danum ti carayan; ket amin a daga sadi Egipto ayan ti dara idi.

²² Ket dagiti managsalamangca ti Egipto inaramidda met ti casta cadagiti salsalamangcada: ket ti puso ni Faraon napatangken, ket dina ida impangag, cas panagsao idi ni Jehova.

²³ Ket ni Faraon nagawid a nagsubli iti balayna, ket dina pay la impapuso idi daytoy.

²⁴ Ket amin dagiti Egipcios nagcutcutda iti lawlaw ti carayan a pangalaanda ti danum nga inumen; ta dida mainum ti danum ti carayan.

²⁵ Ket nagpito nga aldaw calpasan ti panangsugat ni Jehova iti carayan.