Exodo 6 - Ti Biblia (1973)

Ti Dios baliwanna dagiti carina. Capoonan ni Moises ken ni Aaron.

¹ Ket ni Jehova kinunana ken Moises, Ita makitamto ti aramidecto ken Faraon: ta babaen iti napigsa nga ima bayannanto ida a pumanaw, ket iti napigsa nga ima papanawennanto ida iti dagana.

² Ket ti Dios nakisao ken Moises, ket kinunana kencuana, Siac ni Jehova:

³ Ket siac nagparangac ken Abraham, ken Isaac ken Jacob, cas Dios a Mannacabalin amin; ngem iti naganco a Jehova saandac a naammoan.

⁴ Ket binuangayco met cadacuada ti tulagco a panangtedco cadacuada iti daga a Canaan, ti daga a nagnagnaanda, isu a naggangannaetanda.

⁵ Casta met dinengngegco ti sainnec dagiti annac ti Israel, a dagiti Egipcios ad-adipnenda ida; ket linagipcon ti tulagco.

⁶ Gapuna a saoem cadagiti annac ti Israel, Siac ni Jehova ket siac ilapsutcayto cadagiti pammarparigat dagiti Egipcios cadacayo, ket ispalencayto iti panangadipenda, ket subbotencayto iti siuunnat a tackiag ken cadagiti naindaclan a panangocom:

⁷ Ket alaencayto nga ilic, ket siacto ti Diosyo: ket ammoenyonto a siac ni Jehova a Diosyo a mangilasot cadacayo cadagiti pammarparigat dagiti Egipcios.

⁸ Ket iyegcayto iti daga nga insapatac nga ited ken Abraham ken Isaac ken Jacob; ket itdecto cadayo a tawid: siac ni Jehova.

⁹ Ket ni Moises castoy ti panangisaona cadagiti annac ti Israel: ngem isuda saanda nga impangag idi ni Moises, a maipanggep iti pagel ti nakemda, ken iti napalalo a pannacaadipen.

¹⁰ Ket ni Jehova insaona ken Moises, a cunana.

¹¹ Sumrecca, saoem ken Faraon nga ari ti Egipto a bay-anna a pumanaw iti dagana dagiti annac ti Israel.

¹² Ket ni Moises nagsao ken Jehova a kinuna, Adtoy dagiti annac ti Israel didac met impangag idi; casano ngarud ti panangipangag, ni Faraon caniac, siac a dagiti bibbibigco saanda a nacugit.

¹³ Ket ni Jehova nakisao cada Moises ken Aaron, ket binilinna ida iti maipaay cadagiti annac ti Israel, ken ni Faraon nga ari ti Egipto, tapno ipanawda dagiti annac ti Israel iti daga nga Egipto.

¹⁴ Dagitoy dagiti pangpangolo cadagiti caputotan dagiti ammada. Dagiti annac a lallaki ni Ruben nga inauna ni Israel: da Hanoc, Fallu, Hezron, ken Carmi; dagitoy dagiti famfamilia ni Ruben.

¹⁵ Ket dagiti annac a lallaki ni Simeon: da Jemuel, ken Jamin, ken Ohad, ken Jaquin, ken Zoar, ken Saul nga anac ti maysa a babai a Cananea; dagitoy dagiti famfamilia ni Simeon.

¹⁶ Ket dagitoy dagiti nagnagan dagiti annac a lallaki ni Levi a mayannurot iti caputotanda: da Gerson, Coat ken Merari; ket dagiti tawen ti panagbiag ni Levi sangagasut ket tallopulo ket pito a tawen idi.

¹⁷ Dagiti annac a lallaki ni Gerson: Libni ken Simei a mayannurot cadagiti famfamiliada.

¹⁸ Ket dagiti annac a lallaki ni Coat: Amram, Isaar, Hebron, ken Uzziel; ket dagiti tawen ti panagbiag ni Coat sangagasut ken tallopulo ket tallo a tawen idi.

¹⁹ Ket dagiti annac a lallaki ni Merari: da Mahali, ken Musi. Dagitoy dagiti famfamilia dagiti Levitas a mayannurot cadagiti caputotanda.

²⁰ Ket ni Amram inasawana ni Jocabed a cabsat a babai ni amana; inyanacna kencuana da Aaron ken Moises: ket dagiti tawtawen ti panagbiag ni Amram sangagasut, tallopulo ket pito a tawen idi.

²¹ Ket dagiti annac a lallaki ni Izar; Cora, Nefeg, ken Zicri.

²² Ket dagiti annac a lallaki ni Uziel; Misael, Elzafan, ken Zicri.

²³ Ket ni Aaron inasawana ni Elizabet nga anac a babai ni Aminadab, a cabsat a babai ni Naason; ket pinututna kencuana da Nadab, Abiu, Eleazar ken Itamar.

²⁴ Ket dagiti annac a lallaki ni Core: da Asir, Elcana ken Abiasaf; dagitoy dagiti famfamilia dagiti Coritas.

²⁵ Ket ni Eleazar nga anac a lalaki ni Aaron nakiasawa iti maysa cadagiti annac a babbai ni Futiel; ket isu pinututna kencuana ni Finees, Dagitoy dagiti pangpangolo dagiti famfamilia dagiti amma dagiti Levitas a mayannurot cadagiti caputotanda.

²⁶ Dagitoy isuda met laeng da Aaron ken Moises a nagcunaan ni Jehova, Alaenyo dagiti annac ti Israel idiay daga nga Egipto a cas mayannurot iti bungoyda.

²⁷ Dagitoy dagiti nakisao ken Faraon nga ari ti Egipto, tapno aonenda idiay Egipto dagiti annac ti Israel: dagitoy isuda met laeng da Moises ken Aaron.

²⁸ Ket naaramid idi aldaw a pannakisao ni Jehova ken Moises idiay daga nga Egipto,

²⁹ A ni Jehova nakisao ken Moises a cunana, Siac ni Jehova: saoem ken Faraon nga ari sadi Egipto amin nga saoec kenca.

³⁰ Ket ni Moises kinunana iti sango ni Jehova, Adtoy siac a di nacugit dagiti bibigna, ket casano ti panangipangagto caniac ni Faraon?