Exodo 5 - Ti Biblia (1973)

Ni Faraon darisonanna dagiti rebbeng ti Israel.

¹ Ket iti calpasanna da Moises ken Aaron dimmanonda ket kinunada ken Faraon, Castoy ti sao ni Jehova a Dios ti Israel, Bay-am a pumanaw ti umilic tapno inda rambacan ti maysa a fiesta caniac idiay let-ang.

² Ket ni Faraon kinunana, Asino ni Jehova nga imdengac coma ti timecna tapno bay-ac a pumanaw ti Israel? Diac am-ammo ni Jehova, ket maysa pay diacto palubosan ti Israel.

³ Ket isuda kinunada, Ti Dios dagiti Hebreos nasaracnacamin: dawatenmi kenca, palubosannacami, iti tallo nga al-aldaw a magmagna cami coma iti let-ang, ket agidatoncaminto ken Jehova a Diosmi; di la ket ta itinnagna cadacami ti angol wenno campilan.

⁴ Ket ti ari ti Egipto kinunana cadacuada, Apayapay a dacayo, Moises ken Aaron, pagsardengenyo ti umili cadagiti aramidda? Incayo cadagiti annungenyo.

⁵ Ket ni Faraon, kinunana, Adtoy a dagiti tattao adudan iti daga, ket dacayo paginanaenyo ida cadagiti annungenda.

⁶ Ket idi met la nga aldaw ni Faraon imbilinna cadagiti mangdagdagdag cadagiti tattao, ken cadagiti agturturayda, a cunana:

⁷ Manipud ita dicayto mangted ti garami cadagiti tattao a pagladrilloda a cas iti nalabes: mapandan agala iti garami a masapulda.

⁸ Ket ti bilang dagiti ladrillo, nga ar-aramidenda idi ipaaramidyo cadacuada; awan ti uray ania a kessayenyonto: ta isuda bayanggudawda; isu ti gapuna nga agickisda nga agcuncuna, Palubosannacami nga agdaton iti Diosmi.

⁹ Maidagdagsen coma ti annungen dagiti tattao, tapno isu ti pagbannoganda; ket dida coma italtalec dagiti sasao a naulbod.

¹⁰ Ket dagiti mangdagdagdag cadagiti tattao ken dagiti agturturayda rimmuarda, ket nagsaoda cadagiti tattao a kinunada, Castoy ti sinao ni Faraon, Siac diacto mangted ti garami cadacayo.

¹¹ Incayo dacay met laeng, mangalacayo iti garami no sadino ti pacasaracanyo: ta awanto ti makessay nga aramidyo.

¹² Iti casta dagiti tattao nagwarasda iti lawlaw ti amin a daga nga Egipto a mangala iti garami.

¹³ Ket dagiti mangdagdagdag dinagdagda ida a cuncunada, Leppasenyo ti aramidyo, a cas iti inaldaw, a gapuananyo idi adda garami.

¹⁴ Ket dagiti agturturay dagiti annac ti Israel, nga incabil dagiti mangdagdag ni Faraon nga agturay cadacuada, nasapsaplitda, ket nasaludsud cadacuada, Apayapay a dicayo tinungpal ti annongenyo idi calman ken ita a panagladrillo a cas idi cua?

¹⁵ Idin dagiti agturturay dagiti annac ti Israel dimmanonda ken nagasugda ken Faraon a cunada, Apayapay castoy ti aramidem cadagiti ad-adipenmo?

¹⁶ Awan ti maited a garami cadagiti ad-adipenmo, ket cunada cadacami, Ag-ladrillocayo: ket adtoy a mababaot dagiti ad-adipenmo; ngem dagiti cailiam isuda ti yan ti biddut.

¹⁷ Ngem kinunana, Bayanggudawcayo, bayanggudawcayo: gapu a cunayo, Palubosannacami nga agdaton ken Jehova.

¹⁸ Incayo ngarud ita ket agtrabajocayo; ta awanto ti maited cadacayo a garami, nupay casta yawatyonto ti bilang dagiti ladrillo.

¹⁹ Ket dagiti agturturay cadagiti annac ti Israel nakitada a dakes ti casasaadda, idi a naisao, Dicayto kessayan a pulos dagiti ladrilloyo, a rebbengyo iti inaldaw.

²⁰ Ket pimmanawda ken Faraon idi nasabetda da Moises ken ni Aaron, a nagtacderda iti dalan:

²¹ Ket dagiti agturturay, kinunada cadacuada, Ni Jehova imatangannacayo coma ket ipatona; ta dacayo ti nangaramid iti pacaguraanmi cadagiti mata ni Faraon, ken cadagiti mata dagiti ad-adipenna, ta icabilyo iti imada ti campilan a pamatayda cadacami.

²² Ket ni Moises nagsubli ken Jehova ket kinunana, Apo, apayapay a dakes ti namayam cadagitoy nga umili? ania ti gapuna nga binaonnac?

²³ Ta nanipud idi dimmanonac ken Faraon nga agsao ti naganmo, pinarigatna dagitoy nga umili; ket sica dica met la inispal ti ilim iti uray ania.