Exodo 40 - Ti Biblia (1973)

Ti pannacabangon ti tabernaculo.

¹ Ket ni Jehova nakisao ken Moises, a cunana,

² Iti umuna nga aldaw ti bulan nga umuna bangonemto ti tabernaculo ti tolda ti gimong.

³ Ket icabilmonto iti unegna ti lacasa ti pamanecnec, ket lingdamto ti lacasa iti bengbeng.

⁴ Ket iserrecmonto ti lamisaan, ket ornosemto dagiti banbanag nga addada iti rabawna; yunegmonto ti candelero, ket gangatamto dagiti pagpagsainganna.

⁵ Ket icabilmonto ti altar a balitoc a paginciensoan iti sango ti lacasa ti pamanecnec, ket icabilmonto ti bengbeng ti ruangan ti tabernaculo.

⁶ Ket isaadmonto ti altar ti daton a mapuuran iti sango ti ruangan ti tabernaculo ti tolda ti gimong.

⁷ Ket idissomto ti pagbuggoan iti nagbaetan ti tolda ti gimong ken ti altar, ket iccamto iti danum.

⁸ Ket aramidemto ti paraangan nga aglawlaw, ket ibitinmonto ti bengbeng ti ruangan ti paraangan.

⁹ Ket alaemto ti sapsapo a lana ket sapsapoamto ti tabernaculo, ken amin nga adda iti unegna, ket pasantoemto ken amin nga alicamenna: ket nasantoanto.

¹⁰ Ket sapsapoamto ti altar ti daton a mapuuran, ken amin nga ar-aruatenna, ket pasantoemto ti altar: ket ti altar nasantoanto unay.

¹¹ Ket sapsapoamto ti pagbuggoan ken ti batayna, ket santificaremto.

¹² Ket ipanmonto ni Aaron ken dagiti annacna iti ruangan ti tolda ti gimong, ket buggoamto ida iti danum.

¹³ Ket icapetmonto ken Aaron dagiti nasantoan a cawes; ket sapsapoamto, ket santificaremto, tapno agannung caniac iti takem ti padi.

¹⁴ Ket yegmonto dagiti annacna a lallaki, ket icapetmonto cadacuada dagiti badbado;

¹⁵ Ket pulotamto ida a cas iti panangpulotmo ken amada, tapno macapagannungda caniac iti takem ti padi ket ti pannacapulotda agpaayto cadacuada a kinapadi nga agnanayon cadagiti capcaputotanda.

¹⁶ Castoy ti inaramid ni Moises: ti mayannurot iti amin nga imbilin ni Jehova kencuana, isu ti inaramidna.

¹⁷ Ket naaramid nga iti umuna a bulan ti maicadua a tawen iti umuna nga aldaw ti bulan, nabangon ti tabernaculo,

¹⁸ Ket ni Moises binangonna ti tabernaculo, ket indissona dagiti batbatayna, ket impatacderna dagiti tabtablana, ket inyusocna dagiti balbalunetna, ket impatacderna dagiti adadigina.

¹⁹ Ket inucradna ti tolda iti rabaw ti tabernaculo, ket incabilna ti abbong nga akinngato iti rabaw ti tolda; cas imbilin ni Jehova ken Moises.

²⁰ Ket innalana ti pamanecnec sana incabil iti uneg ti lacasa, ket incapetna dagiti pagassiwan iti lacasa, ket indissona ti tugaw ti caasi iti rabaw ti lacasa:

²¹ Ket inserrecna ti lacasa iti tabernaculo, ket imbitinna ti bengbeng, ket liningdanna di lacasa ti pamanecnec; cas imbilin ni Jehova ken Moises.

²² Ket insaadna ti lamisaan iti tolda ti gimong iti bangir nga amianan ti tabernaculo, iti ruar ti bengbeng.

²³ Ket inornosna iti rabawna ti tinapay ni Jehova; cas imbilin ni Jehova ken Moises.

²⁴ Ket indissona ti candelero iti tolda ti gimong, iti batog ti lamisaan, iti bangir nga abagatan ti tabernaculo.

²⁵ Ket sinindianna dagiti pagsaingan iti sango ni Jehova; cas imbilin ni Jehova ken Moises.

²⁶ Ket incabilna ti altar a balitoc iti tolda ti gimong iti sangoanan di bengbeng.

²⁷ Ket pinuuranna iti rabawna ti incienso dagiti nabanglo nga recrecado; cas imbilin ni Jehova ken Moises.

²⁸ Ket incabilna ti bengbeng ti ruangan ti tabernaculo.

²⁹ Ket insaadna ti altar ti daton a mapuuran iti ruangan ti tabernaculo ti tolda ti gimong, ket nangidatag iti rabawna iti daton a mapuuran, ken daton a bel-laay; cas imbilin ni Jehova ken Moises.

³⁰ Ket indissona ti pagbuggoan iti nagbaetan ti tolda ti gimong ken ti altar, ket iniccanna iti danum a pagbuggo.

³¹ Ket ni Moises ken ni Aaron ken dagiti annacna a lallaki binuggoanda dagiti im-imada ken sacsacada iti daydiay;

³² No sumrecda iti tolda ti gimong, ket no umadanida iti altar, agbuggoda; cas imbilin ni Jehova ken Moises.

³³ Ket inaramidna ti paraangan iti lawlaw ti tabernaculo ken ti altar, ket insab-itna ti bengbeng ti ruangan ti paarangan. Casta ti pinangleppas ni Moises iti aramid.

³⁴ Idin ti ulep inabungotanna ti tolda ti gimong, ket ti dayag ni Jehova pinunnona ti tabernaculo.

³⁵ Ket ni Moises saan a macastrec idi iti tolda ti gimong, gapu ta ti ulep nagsaad iti rabawna, ken ti dayag ni Jehova pinunnona ti tabernaculo.

³⁶ Ket idi nga ti ulep nagpangato nanipud iti rabaw ti tabernaculo, dagiti annac ti Israel nagtuloyda cadagiti pannagnada:

³⁷ Ngem no ti ulep saan a naipangato, saanda a nagna idin agingga iti aldaw a dina ingangato.

³⁸ Ta ti ulep ni Jehova adda idi iti aldaw iti rabaw ti tabernaculo, ket iti rabii adda idi ti apuy idiay rabawna, iti imatang dagiti amin a balay ti Israel, bayat dagiti amin a pannagnada.