Exodo 4 - Ti Biblia (1973)

Ni Moises Awatenna dagiti pannacapatalged a pagilasinan ken carcari. Agsubli sadiay Egipto. Masabetna ni Aaron.

¹ Ket ni Moises simmungbat ket kinunana, Ngem, adtoy, didacto patien ket didanto imdengan ti timecco; ta cunadanto, ni Jehova, Saan a nagparang kenca.

² Ket ni Jehova kinunana kencuana, Ania dayta adda ita imam? Ket isu kinunana, Maysa a sarucod.

³ Ket kinunana, Ipurruacmo iti daga. Ket impurruacna iti daga, ket nagbalin nga uleg; ket ni Moises inadayoanna idi.

⁴ Ket ni Jehova kinunana ken Moises, Unnatem ta imam ket iggamam ti ipusna; (ket inyunnatna ti imana ket iniggamanna, ket nagbalin a sarucod iti imana:)

⁵ Tapno patienda a ni Jehova a Dios dagiti ammada, ti Dios ni Abraham, ti Dios ni Isaac, ken Dios ni Jacob, nagparang kenca.

⁶ Ket ni Jehova kinunana kencuana, Isucsucmo ita ti imam ita barucongmo. Ket insucsucna ti imana iti barucongna: ket idi nga iniccatna, adtoy nagcucutel ti imana, a nagpuraw a cas la nieve.

⁷ Ket kinunana, Isucsucmo manen ta imam iti barucongmo. (Ket insucsucna manen ti imana iti barucongna; ket idi nga iniccatna ti imana iti barucongna, adtoy ta nagsubli a cas idi lasagna a sigud.)

⁸ Ket maaramidto a no didaca patien, wenno dida italtalec ti timec ti umuna a pagilasinan, patiendanto ti timec ti maudi a pagilasinan.

⁹ Ket maaramidto a no didanto pay la patien dagitoy nagcadua a pagilasinan, wenno dida ipangag ti timecmo, mangalacanto iti danum ti carayan, ket ibuyatmonto iti daga a namaga: ket ti danum nga alaem iti carayan agbalinto a dara iti daga a namaga.

¹⁰ Ket ni Moises kinunana ken Jehova, O, Apo, saanac a tao a somasao, uray idi nalabes a tiempo wenno ita ken uray nanipud idi nakisaoca itoy adipenmo; ta naullayatac nga agsao ket natabbed ti dilac.

¹¹ Ket ni Jehova kinunana kencuana, Asino ti nangaramid iti ngiwat ti tao? wenno asino ti mamagumel, wenno mamagtuleng, wenno mamagkita, wenno mamagbulsec ti tao? Saan aya nga siac a Jehova?

¹² Inca ngarud ita ta addaacto iti ngiwatmo ket isurocanto iti saoem.

¹³ Ket kinunana, O, Apo, dawatec kenca, ibaonmo, babaen iti ima daydiay ibaonmonto.

¹⁴ Ket ni Jehova simged ti pungtotna a maibusor ken Moises, ket kinunana, Awan aya ni cabsatmo nga Aaron, a Levita? Ammoc nga isu ti nalaing nga agsao. Ket maysa pay, adtoy, umaynaca sabten: ket apaman a makitanacanto, agragsacto iti pusona.

¹⁵ Ket saoemto kencuana, ket paisaomto kencuana dagiti sasao: ket addaacto iti ngiwatmo ken iti ngiwatna, ken isurocayto iti aramidenyonto.

¹⁶ Ket isunto ti pannacangiwatmo iti ili; ket maaramidto nga isunto ti ngiwatmo, ket sicanto ti pannaca-Diosna.

¹⁷ Ket iggamamto daytoy a sarucod, isu a pangaramidmonto cadagiti pagilaslasinan.

¹⁸ Ket ni Moises napan nagsubli ken Jetro a catuganganna a lalaki, ket kinunana kencuana, dawatec kenca, Palubosannac, nga agsubli cadagiti cacabsatco nga addada sadi Egipto, bareng no addada pay a sibibiag. Ket ni Jetro kinunana ken Moises, Inca a sitatalna.

¹⁹ Ket ni Jehova kinunana ken Moises idiay Madian, Inca, agsublica idiay Egipto; ta amin dagiti nagtarigagay iti pataymo nataydan.

²⁰ Ket ni Moises innalana ti asawana ken dagiti annacna ket insacayna ida iti maysa nga asno, ket nagsubli idiay daga nga Egipto: ket ni Moises incuyogna iti imana ti sarucod ti Dios.

²¹ Ket ni Jehova kinunana ken Moises, Intono agsublica sadi Egipto, kitaem ta aramidem iti saclang ni Faraon amin dagiti datdatlag nga incabilco ita imam: ngem siac patangkenecto ti pusona, ket dinanto palubosan ti ili.

²² Ket cunamto ken Faraon, Castoy ti cuna ni Jehova, ti Israel isu ti anacco, ti inauna nga anacco:

²³ Ket siac kinunac kenca idi, Bayam a pumanaw ti anacco, tapno agdaydayaw caniac; ket dica kinayat a pinalubosan idi: adtoy a siac patayeecto ti anacmo, ti inauna nga anacmo.

²⁴ Ket naaramid iti dalan iti yan a pagsangsangbayan, ni Jehova sinaracna, ni Moises kinayatna a papatayen.

²⁵ Idin ni Zifora nangala iti bato a natadem ket kinugitna ti anacna, ket ti nageppas imbatona iti saca ni Moises; ket kinunana, Pudno a sica ti novioc iti dara.

²⁶ Iti casta ti Dios dina siningsinga. Idin ni Zifora kinunana, Sica novioca iti dara gapu iti panagcugit.

²⁷ Ket ni Jehova kinunana ken Aaron, Inca sabaten ni Moises idiay let-ang. Ket napan, ket sinabatna idiay bantay ti Dios, ket inagcanna.

²⁸ Ket ni Moises sinaritana ken Aaron amin dagiti sinao ni Jehova, isu a nacaibaonanna kencuana, ken amin dagiti pagilaslasinan nga imbilinna kencuana.

²⁹ Ket da Moises ken Aaron napanda inummong amin a lallacay cadagiti annac ti Israel:

³⁰ Ket ni Aaron sinaona amin dagiti sasao nga insawang ni Jehova ken Moises, ket inaramidna dagiti pagilaslasinan iti imatang ti umili.

³¹ Ket ti umili namatida: ket idi nangngegda a ni Jehova sinarungcaranna dagiti annac ti Israel, ket nakitanan ti pagelda, nagtamedda ket nagdaydayawda.