Exodo 39 - Ti Biblia (1973)

Ti pannacaaramid dagiti cawes dagiti sacerdote. Ni Moises kitaenna ti aramid a nalpas.

¹ Ket iti azul, ken purpura, ken escarlata inaramidda a cawcawes a nasayaat ti pannacaaramidna, a maipaay iti panagannung iti nasantoan a disso, ken inaramidda a nasantoan a cawes a maipaay ken Aaron; cas imbilin ni Jehova ken Moises.

² Ket inaramidna ti efod iti balitoc, azul, ken purpura, ken escarlata, ken nalapat a lienzo a tinali.

³ Ket nagpitpitda iti balitoc a binalabala iti naingpis ket binarotda tapno ibinggasda iti azul, ken iti purpura ken iti escarlata, ken iti nalapat a lienzo a gapuanan ti nalaing nga agar-aramid.

⁴ Nagaramidda cadagiti ragas nga hombrera a naisug-op; a maisug-op cadagiti dua a pungto.

⁵ Ket ti nasayaat ti pannacaabelna a barikes nga adda iti rabaw ti efod a pangicapet kencuana, isu met ti nayon ti ragas ken capada ti pannacaar-aramidna; iti balitoc, iti azul, ken purpura ken escarlata, ken nalapat a lienzo a tinabid: cas imbilin ni Jehova ken Moises.

⁶ Ket tinicapanda dagiti batbato nga onix, a naitampoc iti balitoc, a nakitikitan cadagiti kitikit ti maysa a pagtandaanan a mayalubog cadagiti nagnagan dagiti annac ti Israel.

⁷ Ket incabilna ida cadagiti ragas nga hombrera ti efod, tapno isuda dagiti batbato a panglaglagipan cadagiti annac ti Israel; cas imbilin ni Jehova ken Moises.

⁸ Ket inaramidna ti pectoral, a gapuanan ti nalaing nga agaramid, cas pannacaaramid ti efod; a balitoc, azul, ken purpura, ken escarlata, ken nalapat a lienzo a tinabid.

⁹ Cuadrado idi; inaramidda ti pectoral nga agsucut: maysa a dangan ti catiddugna ket maysa a dangan ti caacabana, nagcupin.

¹⁰ Ket tinampucanda iti uppat nga intar cadagiti batbato. Maysa nga intar ti sardio, topacio, ken carbunclo isu idi ti umuna nga intar;

¹¹ Ket ti maicadua nga intar, maysa nga esmeralda, maysa a zafiro, ken maysa a diamante;

¹² Ket ti maicatlo nga intar, maysa a jacinto, maysa nga agata, ken maysa nga amatista;

¹³ Ket ti maicapat nga intar, maysa a berilo, maysa nga onix, ken maysa a jaspe: naibalayda cadagiti calupcup a balitoc a nacaitampucanda.

¹⁴ Ket dagiti batbato mayalubogda cadagiti nagnagan dagiti annac ti Israel, a sangapulo ket dua, a maisurot cadagiti nagnaganda; cas cadagiti nacaiburican ti maysa a pagtandaanan, tunggal maysa a mayannurot iti naganna, cadagiti sangapulo ket dua a capcaputotan.

¹⁵ Ket inaramidda iti pectoral dagiti singdan a cas lubid a kinawar a pulos a balitoc.

¹⁶ Ket inaramidda dagiti dua a pagitampucan a balitoc, ken dua a singsing a balitoc, ket incabilda dagiti dua a singsing cadagiti dua a pungto ti pectoral.

¹⁷ Ket incabilda dagiti dua a kinawar a singdan a balitoc cadagiti dua a singsing cadagiti pungto ti pectoral.

¹⁸ Ket dagiti sabali a dua pungto dagiti dua nga kinawar a singdan incamangda cadagiti dua a pagitampucan, ket indissoda ida cadagiti ragas nga hombrera ti efod iti sangoananna.

¹⁹ Ket inaramidda dagiti dua a singsing a balitoc, ket incabilda ida cadagiti dua a murdong ti pectoral, iti pingirna nga adda iti sikigan ti efod a nakinuneg.

²⁰ Ket nangaramidda cadagiti dua a singsing a balitoc, ket incabilda ida cadagiti dua a ragas nga hombrera iti efod iti makinbaba, iti sangoananna, iti asideg ti pagsaipanna, a ngatoen ti nasayaat ti pannacaabelna a barikes ti efod.

²¹ Ket ingalutda ti pectoral nga incapetda dagiti singsing cadagiti singsing ti efod nga inaramatda ti maysa a singdan nga azul, tapno maiparabaw ti nasayaat ti pannacaabelna a barikes ti efod, ken tapno ti pectoral saan a maisina iti efod; cas imbilin ni Jehova ken Moises.

²² Ket inaramidna ti cagay ti efod nga inabel a pulos nga azul;

²³ Ket ti tengnged ti cagay iti tengngana, cas ti putol ti maysa a bado a kinawar a landoc, nalebleban nga aglawlaw ti tengngedna, tapno saan a mapigisto.

²⁴ Ket inaramidda iti gayadan ti cagay ti granada nga azul, ken purpura, ken escarlata, ken lienzo a tinabid.

²⁵ Ket nagaramidda cadagiti camcampanilla a bin-ig a balitoc, ket insaadda dagiti camcampanilla nga inbalballaetda cadagiti granada iti gayadan ti cagay nga aglawlaw, a naiballaet cadagiti granada;

²⁶ Maysa a campanilla ken maysa a granada, maysa a campanilla ken maysa a granada, iti gayadan ti cagay nga aglawlaw, a pagcawes no agannung; cas imbilin ni Jehova ken Moises.

²⁷ Ket inyaramidanda ni Aaron ken dagiti annacna a lallaki cadagiti badbado a lienzo a nalapat nga inabel,

²⁸ Ken ti mitra a lienzo a nalapat, ken napintas a pannacacallogong a lienzo a nalapat, ken dagiti sapsapin a lienzo a nalapat a tinabid.

²⁹ Ken ti barikes a lienzo a nalapat a tinabid, ken azul, ken purpura, ken escarlata, a gapuanan ti managborda; cas imbilin ni Jehova ken Moises.

³⁰ Ket nagaramidda iti plancha ti balangat a nasantoan nga pasig a balitoc, ket inlanadda kencuana ti maysa a sinurat, cas cadagiti pannacaiburic ti maysa a pagtandaanan, NASANTOAN KEN JEHOVA.

³¹ Ket insiglotda iti maysa a singdan nga azul, a pangicapet kencuana iti rabaw ti mitra iti ngato; cas imbilin ni Jehova ken Moises.

³² Casta ti pannacalpas amin nga pannacaaramid ti tabernaculo ti tolda ti gimong; ket dagiti annac ti Israel inaramidda cas imbilin ni Jehova ken Moises; casta ti inaramidda.

³³ Ket impanda ti tabernaculo ken Moises, ti Tolda, ken amin dagiti alalicamenna, dagiti corchetesna, dagiti tabtablana, dagiti balbalunetna, ken dagiti adadigina, ken dagiti batbatayna;

³⁴ Ken ti abbong a lalat dagiti carcarnero a natina iti nalabaga, ken ti abbong a lalat dagiti foca, ken ti cortina ti bengbeng.

³⁵ Ti lacasa ti pamanecnec, ken dagiti pagassiwan, ken ti tugaw ti caasi;

³⁶ Ti lamisaan, amin dagiti ar-araruatenna, ken ti tinapay ti pamarang;

³⁷ Ti candelero a nadalus, dagiti pagsainganna, a dagiti met laeng pagsaingan a mayornos, ken amin dagiti ar-aruatenna, ken ti lana a segden;

³⁸ Ken ti altar a balitoc, ken ti lana a pagsapsapo, ken ti nasayamusom nga incienso, ken ti cortina iti ruangan ti Tolda;

³⁹ Ti altar a suer, ken iniket a barandillasna a suer, dagiti pagassiwan, ken amin dagiti alalicamenna, ti pagbuggoan ken ti batayna;

⁴⁰ Dagiti cortina ti paraangan, dagiti adadigina, ken dagiti batbatayna, ken ti bengbeng iti ruangan ti paraangan, dagiti lublubidna, ken dagiti paspasocna, ken amin dagiti alalicamen ti panagannung iti tabernaculo, a maipaay iti tolda ti gimong;

⁴¹ Dagiti nasayaat ti pannacaabelna a cawcawes a pagannung iti nasantoan a lugar, ken dagiti nasantoan a pagan-anay ni Aaron a padi, ken dagiti pagpagan-anay dagiti annacna, nga agannung iti kinapadi.

⁴² Iti mayannurot cadagiti amin nga imbilin idi ni Jehova ken Moises, casta ti inaramid dagiti annac ti Israel cadagiti amin nga ar-aramid.

⁴³ Ket ni Moises nakitana amin dagiti gapuanan, ket, adtoy, inaramidda; cas iti pinangibilin ni Jehova, casta ti pinangaramidda idi: ket ni Moises binendicionanna ida.