Exodo 38 - Ti Biblia (1973)

Ti pannacaaramid ti altar ti daton a mapuuran; ti pagbuggoan ken ti paraangan. Dagup dagiti napateg a naaramat.

¹ Ket inaramidna ti altar ti daton a mapuuran iti cayo nga acacia: lima a sico ti caatiddugna, ket lima a sico ti caacabana, nagcuadrado; ket tallo a sico ti catayagna.

² Ket inaramidna dagiti sarsarana cadagiti uppat a sulsulina; dagiti sarsarana sangsangcanayonda iti altar: ket kinalupcupanna iti suer.

³ Ket nangaramid cadagiti amin nga ar-aruaten ti altar, dagiti damdamili, ken dagiti sopsoplad, ken palangana dagiti pagadaw iti lasag, ken dagiti pagiccan iti benggang: dagiti amin nga ar-aruatenna inaramidna iti suer.

⁴ Ket inyaramidanna iti altar ti maysa a barandilla nga iniket a suer, iti babaen ti igidna nga aglawlaw, a dinanonna ti guddua ti catayag ti altar.

⁵ Ket pinandayna dagiti uppat a singsing cadagiti uppat a murmurdong ti barandilla a suer, a pacaicabilan dagiti pagassiwan.

⁶ Ket inaramidna dagiti pagassiwan iti cayo ti acacia, ket kinalupcupanna ida iti suer.

⁷ Ket inyusocna dagiti pagassiwan cadagiti singsing iti agsumbangir ti altar, pacabaclayanna; inaramidna a nasol-loopan iti tabla.

⁸ Ket nangaramid iti pagbuggoan a suer, ken ti puonna a suer, inaramidna dagiti nacalupcupan ti suer a sarming dagiti babbai a naguummong a nagaywan iti ruangan ti tolda ti gimong.

⁹ Ket nangaramid iti paraangan: iti abagatanen ti akinabagatan a bangir dagiti bengbeng ti paraangan isuda idi iti nalapat a lienzo a tinali, a sangagasut a sico;

¹⁰ Dagiti adadigida duapulo, ket dagiti batbatayda duapulo, a suer; dagiti calcallawit dagiti adadigi ken dagiti putputiputda piracda.

¹¹ Ket iti bangir ti amianan sangagasut a sico, dagiti adadigida duapulo, ket dagiti batbatayda duapulo, a suer; dagiti calcallawit, ken dagiti putputiputda pirac.

¹² Ket iti bangir iti laud adda cortina a limapulo a sico, dagiti adadigida sangapulo, ken dagiti batbatayda sangapulo; dagiti cawcawit dagiti adadigi, ken dagiti putputiputda pirac.

¹³ Ket iti bangirna iti daya, nga agpadaya limapulo a sico.

¹⁴ Dagiti cortina iti maysa a sikigan ti ruangan sangapulo ket lima a sico; dagiti adadigida tallo, ken dagiti batbatayda tallo.

¹⁵ Ket casta iti sabali a bangir: iti agsinnungbangir iti abay ti ruangan ti paraangan adda dagiti cortina a sangapulo ket lima a sico; dagiti adadigida tallo, ken tallo dagiti batbatayda.

¹⁶ Amin dagiti cortina ti paraangan a naglawlaw nalapat a lienzo a tinali.

¹⁷ Ket dagiti batbatay dagiti adadigi suer; dagiti calcallawit dagiti adadigi, ken dagiti putputiputda pirac; ken ti calupcup dagiti toctocda pirac: ket amin dagiti adadigi ti paraangan naputiputanda iti pirac.

¹⁸ Ket ti bengbeng ti ruangan ti paraangan inaramid ti managborda iti azul, ken purpura, ken escarlata, ken nalapat a lienzo a tinali: ket duapulo a sico ti caatiddug, ket ti cangato iti nagacabaan lima a sico, a capada dagiti cortina ti paraangan.

¹⁹ Ket dagiti adadigida uppat, ken dagiti batbatayda uppat a suer; dagiti cacallawitda pirac, ken ti calupcup dagiti toctocda, ken dagiti putputiputda pirac.

²⁰ Ket amin dagiti paspasoc ti tabernaculo ken ti paraangan nga aglawlaw, suer.

²¹ Daytoy ti dagup dagiti banbanag a naipaay iti tabernaculo, cas tabernaculo ti pamanecnec, nabilangda a mayannurot iti bilin ni Moises, a maipaay iti panagannung dagiti Livitas, iti ima ni Ithamar nga anac ni Aaron a padi.

²² Ket ni Bezaleel nga anac ni Uri nga anac ni Hur iti caputotan ni Juda, inaramidna amin nga imbilin ni Jehova ken Moises.

²³ Ket caduana idi ni Aholiab nga anac ni Ahisamac iti caputotan ni Dan, maysa a manangkitikit, ken nalaing nga agaramid, ken maysa a managborda iti azul, ken iti purpura ken iti escarlata ken iti lienzo a nalapat a tinali.

²⁴ Amin a balitoc a naaramat iti pannacaaramid ti amin a trabajo ti santuario, dagiti laeng balitoc a naidaton, duapulo ket siam a talento, ket pito gasut ket tallopulo a siclo a capada ti siclo ti santuario.

²⁵ Ket ti pirac dagiti naibilang ti gimong sangagasut a talento, ket sangaribu pito gasut ket pitopulo ket lima a siclo, cas ti siclo ti santuario;

²⁶ Maysa a beka ti maysa a olo, cayatna a saoen, guddua ti siclo, cas ti siclo ti santuario, iti tunggal maysa nga immallatiw cadacuada a naibilang, manipud duapulo dagiti tawenna ken nasuroc, cadagiti innem a gasut ket tallo a ribo, lima gasut ket limapulo a lallaki.

²⁷ Ket dagiti sangagasut a talento a pirac isuda ti napanday a batbatay ti santuario, ken batbatay ti abbong; sangagasut a batbatay dagiti sangagasut a talento, maysa a talento ti maysa a batay.

²⁸ Ket cadagiti sangaribu pito gasut pitopulo ket lima a siclo inaramidna a calcallawit cadagiti adadigi, ken pinangcalupcupna cadagiti toctocda, ken inaramidna a putputiput a maipaay cadacuada.

²⁹ Ket ti suer a naidaton pitopulo a talento, ket dua ribu ket uppat a gasut a siclo.

³⁰ Ket isu ti inaramidna a batbatay ti ruangan ti tolda ti gimong, ken altar a suer, ken iniketna a suer, ken amin nga ar-aruaten ti altar.

³¹ Ken batbatay ti paraangan nga aglalaw, ken batbatay ti ruangan ti paraangan ken amin a paspasoc ti tabernaculo, ken amin a paspasoc ti paraangan nga aglawlaw.