Exodo 36 - Ti Biblia (1973)

Maawat dagiti sagsagut. Ti panangaramid cadagiti tabtabing.

¹ Ket ni Bezaleel ken ni Aholiab agtrabajodanto ken amin a nanacman ti pusona a tao, a nangisaadan ni Jehova iti kinasirib ken kinamannacagawat nga umammo iti panagaramid iti isu-amin nga aramid a maicapet iti santuario, a mayannurot iti amin nga imbilin idi ni Jehova.

² Ket ni Moises inayabanna ni Bezaleel ken ni Aholiab, ken tunggal nanacman ti pusona a tao, nga iti pusoda insaad ni Jehova ti kinasirib, ken tunggal maysa a natignay ti pusona nga umay agtrabajo iti aramid:

³ Ket isuda inawatda ken Moises dagiti amin a sagsagut nga dagiti annac ti Israel inyegda idi a maipaay iti pannacaaramid a pacaaramidanda a maicapet iti santuario, Ket nangyegda pay kencuana cadagiti datdaton ti sibubulos a nakem iti tunggal bigat.

⁴ Ket amin dagiti nasaririt a lallaki, nga agtartrabajo idi iti pannacaaramid ti santuario, immay tunggal lalaki a naggapu iti aramidna nga aramidenda;

⁵ Ket imbagada ken Moises a cunada, Ti iyeg dagiti tattao ad-adu unay ngem ti umanay a maipaay iti aramid nga imbilin ni Jehova nga maaramid.

⁶ Ket ni Moises intedna ti bilin, ket pinaiwarraggawagda iti amin a pacarso, a cunana, Lalaki man wenno babai saan coma nga agaramiden iti uray ania a trabajo nga isagut iti santuario. Iti casta natuben idi dagiti tattao iti panangyegda.

⁷ Ta addaanda idi iti macaanay a sagana iti aramid tapno tuloyenda, ket agsobsobraan pay idi.

⁸ Ket amin dagiti nanacman ti pusona a tattao cadacuada a nagbannog iti aramid, inaramidda ti tabernaculo a sangapulo dagiti bengbengna; a nalapat a lienzo a tinali, ken azul, ken purpura, ken escarlata, agraman querquerubin, a gapuanan ti calalaingan nga agar-aramid, inaramid ida ni Bezaleel.

⁹ Ti caatiddug ti tunggal bengbeng duapulo ket walo a sico, ket ti caacaba ti tunggal bengbeng uppat a sico: amin dagiti bengbeng maymaysa ti rucodda.

¹⁰ Ket pinagsasaipna dagiti lima a bengbeng, ti maysa ken maysa: ket dagiti sabsabali a lima a bengbeng pinagsasaipna ti maysa ken maysa.

¹¹ Ket inaramidna dagiti concondiling nga azul iti igid ti maysa a bengbeng iti alubid ti nagsasaipan; casta met ti inaramidna iti igid ti bengbeng nga akinruar iti maicadua a nagsasaipan.

¹² Limapulo a condiling ti inaramidna iti maysa a bengbeng, ket limapulo a condiling ti inaramidna iti igid ti bengbeng nga adda iti maicadua a naisaip: dagiti condiling naibatog ti maysa iti casangona.

¹³ Ket inaramidna dagiti limapulo a corchetes a balitoc, ket pinagsasaipna dagiti bengbeng ti maysa ken maysa cadagiti corchetes: iti casta nagsangcamaysa ti tabernaculo.

¹⁴ Ket inaramidna dagiti bengbeng a dutdut ti calcalding a panglinong iti tabernaculo: sangapulo ket maysa ti inaramidna.

¹⁵ Ti caatiddug ti tunggal bengbeng tallopulo a sico, ket uppat a sico ti caacaba ti tunggal bengbeng: dagiti sangapulo ket maysa a bengbeng maymaysa ti rucodda.

¹⁶ Ket pinagsisinnaipna dagiti lima a bengbeng, ket dagidi innem a bengbeng castada met.

¹⁷ Ket inaramidna dagiti limapulo a condiling iti igid ti bengbeng nga akinruar iti nagsaipan, ket limapulo a condiling ti inaramidna iti igid ti bengbeng nga akinruar iti maicadua a nagsaipan.

¹⁸ Ket nangaramid cadagiti limapulo a corchetes a suer a pangicamang iti linong tapno agcaycaysa.

¹⁹ Ket inaramidna ti maysa a mayabbong iti tolda pinalabbaga a lalat dagiti carcarnero, ken maysa nga abbong ti nakinngato lalat dagiti foca.

²⁰ Ket inaramidna dagiti tabtabla iti cayo ti acacia naipatacder a maipaay iti tabernaculo.

²¹ Sangapulo a sico ti caatiddug ti maysa a tabla, ket maysa a sico ket guddua ti caacaba ti tunggal maysa a tabla.

²² Tunggal maysa a tabla adda idi dua a pagsangalanna a naisuup iti sabali: casta ti inaramidna cadagiti amin a tabtabla ti tabernaculo.

²³ Ket inaramidna dagiti tabtabla iti tabernaculo: duapulo a tabla iti bangirna nga agpabagatan,

²⁴ Ket inaramidna dagiti uppat a pulo a batay a pirac iti baba dagiti duapulo a tabla; dua a batay iti baba ti maysa a tabla cadagiti dua a pagsangalanna, ken dua a batay iti babaen ti sabali a tabla cadagiti dua a pagsangalanna.

²⁵ Ket iti maicadua a bangir ti tabernaculo, iti bangirna iti amianan, nangaramid iti duapulo a tabla,

²⁶ Ken dagiti uppat a pulo a batayda a pirac; dua a batay iti baba ti maysa a tabla ket dua a batay iti babaen ti sabali a tabla.

²⁷ Ket iti bangir nga agpalaud iti licud ti tabernaculo, nangaramid cadagiti innem a tabla.

²⁸ Ket inaramidna dagiti dua a tabla a pasuli ti tabernaculo iti bangir nga akinlicud.

²⁹ Ket nagrutapda iti baba; ket agpangato agingga iti toctocna agingga iti maysa a singsing: casta ti inaramidna iti agpadpada cadacuada cadagiti dua a sulsuli.

³⁰ Ket adda idi walo a tabla, ken dagiti batayda a pirac, sangapulo ket innem a batay iti babaen ti tunggal tabla dua a batay.

³¹ Ket nagaramid cadagiti balbalunet a cayo ti acacia; lima cadagiti tabtabla ti maysa a bangir ti tabernaculo.

³² Ken lima a balbalunet cadagiti tabtabla iti sabali a bangir ti tabernaculo, ken lima a balbalunet cadagiti tabtabla ti tabernaculo, ti licud nga agpalaud.

³³ Ket ti nagtengnga a balunet pinagtarusna iti tengnga dagiti tabtabla nanipud pungto agingga ti sabali a pungto.

³⁴ Ket kinalupcupanna dagiti tabtabla iti balitoc, ket inaramidna dagiti singsing a balitoc a pangyusocan cadagiti balbalunet, ket kinalupcupanna dagiti balbalunet iti balitoc.

³⁵ Ket inaramidna ti abbong nga azul, ken purpura ken escarlata, ken lienzo a nalapat a tinali: agraman querquerubin, nga inaramid ti calaingan nga agar-aramid.

³⁶ Ket inaramidna dagiti uppat nga adadigina nga acacia, ket kinalupcupanna ida iti balitoc dagiti sasabitanda balitocda idi; ket impandayanna ida cadagiti uppat a batay a pirac.

³⁷ Ket inaramidna ti maysa a cortina iti ruangan ti Tolda, nga azul, ken purpura, ken escarlata, ken nalapat a lienzo a tinali, a gapuanan ti managborda;

³⁸ Ken dagiti lima nga adadigina agraman sasab-itanda: ket kinalupcupanna ti toctocda ken dagiti putiputda iti balitoc; ket dagiti lima a batayda suer.