Exodo 35 - Ti Biblia (1973)

Ti alagaden ti aldaw a panaginana. Sagsagut ken dagiti agaramid iti tabernaculo.

¹ Ket ni Moises tiniptiponna amin a gimong dagiti annac ti Israel, ket kinunana cadacuada, Dagitoy dagiti sasao nga imbilin ni Jehova, tapno aramidenyo ida.

² Bayat dagiti innem nga aldaw aramidenyonto dagiti aramidyo; ngem ti maicapito nga aldaw isunto cadacayo ti maysa nga aldaw a nasantoan, maysa nga inana a panaginana a nadaeg ken Jehova: siasinoman nga agaramid iti aniaman a trabajo ti daytoy, mapapatayto.

³ Dicayo mamasged ti apuy cadagiti pagnaedanyo iti aldaw a panaginana.

⁴ Ket ni Moises nakisao iti amin a gimong dagiti annac ti Israel, a cunana, Daytoy ti imbilin ni Jehova a cunana,

⁵ Mangalacay met la cadacayo ti maysa nga isagut ken Jehova; siasinoman a siannugot ti pusona, yegna coma, ti sagsagot ken Jehova: balitoc, ken pirac, ken suer,

⁶ Ken azul, ken purpura, ken escarlata, ken lienzo a nalapat ken dutdut dagiti calcalding,

⁷ Ken pinalabbaga a lalat dagiti carcarnero a lallaki, ken lallalat dagiti foca, ken cayo nga acacia,

⁸ Ken lana a segden, ken recrecado iti lana a sapsapo, ken iti incienso a nasayamusom,

⁹ Ken batbato nga onix, ken batbato a pagtampoc iti efod ken iti pectoral.

¹⁰ Ket tunggal tao a nanacman ti pusona cadacayo umay coma ken agaramid iti amin nga imbilin ni Jehova:

¹¹ Ti tabernaculo, ti toldana, ken ti linungna, ken dagiti corchetesna, ken dagiti tabtablana, ken dagiti balbalunetna, ken dagiti adadigina, ken dagiti batbatayda;

¹² Ti lacasa, ken dagiti pagassiwan, ti tugaw ti caasi, ken ti abbong a panglinged;

¹³ Ti lamisaan, ken dagiti pagassiwan, ken amin nga ar-aruatenna, ken ti tinapay ti pamarang;

¹⁴ Castamet ti candelero a pagsilawan, ken ar-aruatenna, ken dagiti pagsainganna, ken ti lana a segden;

¹⁵ Ken ti altar ti incienso, ken pagassiwan, ken ti sapsapo a lana, ken ti nasayamusom nga incienso, ken ti bengbeng a pannacarikep ti ruangan ti tabernaculo;

¹⁶ Ti altar ti daton a mapuuran, agraman bacudna a suer, dagiti pagassiwan, ken amin nga ar-aruatenna, ti pagbuggoan ken ti puonna;

¹⁷ Dagiti cortina iti paraangan, dagiti adadigina, ken dagiti batbatayda, ken ti bengbeng iti ruangan ti paraangan;

¹⁸ Dagiti paspasoc ti tabernaculo, ken dagiti paspasoc ti paarangan, ken dagiti lublubidda;

¹⁹ Dagiti cawcawes a nasayaat ti pannacaaramidna, a pagannung iti nasantoan a disso, dagiti nasantoan a pangawes ken Aaron a padi, ken dagiti cawcawes dagiti annacna a lallaki, tapno agannungda iti akem ti padi.

²⁰ Ket amin a gimong dagiti annac ti Israel pimmanawda iti imatang ni Moises.

²¹ Ket isuda immayda, tunggal maysa a natignay ti pusona ken siannugot ti nakemna, inyegda ti isagut ken Jehova, a maipaay iti pannacaaramid ti tolda ti gimong, ken maipaay iti amin a panagannung idiay, ken maipaay cadagiti nasantoan a cawcawes.

²² Ket agpadpada nga immay, lallaki ken babbai, dagiti natulnog ti pusoda, ket inyegda dagiti gargantillas, ken ar-aritos, ken singsing, ken pulceras, amin nga alalicamen a balitoc; a tunggal maysa a tao a nangipaay met laeng iti daton a balitoc ken Jehova.

²³ Ket tunggal lalaki nga addaan iti azul, ken purpura, ken escarlata, ken lienzo a nalapat, ken dutdut ti calcalding, ken napalabbaga a lallalat ti carcarnero, ken lallalat ti foca, inyegna ida.

²⁴ Tunggal maysa a nangidatag iti daton a pirac ken suer inyegna ti isagut ken Jehova; ket tunggal lalaki nga addaan iti acacia a cayo a maipaay iti uray ania nga aramid a pacaaramatan, inyegna.

²⁵ Ket amin dagiti babbai a nanacman dagiti puspusoda nagtibbida babaen cadagiti im-imada, ket inyegda dagiti natibbida, nga azul, ken purpura, ken escarlata, ken ti lienzo a nalapat.

²⁶ Ket amin dagiti babbai a nasaririt ti pusoda, nagtibbida cadagiti dutdut dagiti calcalding.

²⁷ Ket dagiti turayenda nangyegda cadagiti onix a batbato, ken cadagiti batbato a pagtampoc iti efod ken iti pectoral;

²⁸ Ken iti recrecado, ken iti lana; a segden ken sapsapo, ken iti incienso a nasayamusom.

²⁹ Dagiti annac ti Israel nangyegda iti maysa a daton ti sibubulos a nakem ken Jehova; tunggal lalaki ken babai, a natignay ti pusoda a mangyeg a maipaay iti amin nga aramid, a ni Jehova imbilinna idi nga aramiden ni Moises.

³⁰ Ket ni Moises kinunana cadagiti annac ti Israel, Kitaenyo, ni Jehova annac a lalaki ni Uri, nga anac a inawaganna iti nagan ni Bezaleel nga lalaki ni Hur iti caputotan ni Juda.

³¹ Ket pinunnona iti Espiritu ti Dios, iti sirib, iti pannacaawat, ken iti pannacaammo, ken iti amin a kita ti panangaramid;

³² Ken tapno mamuangay cadagiti nagdanonan nga aramid, tapno agpanday iti balitoc, ken iti pirac ken iti suer.

³³ Ken panagticap iti batbato a pagtampoc, ken panagtaga iti cayo, tapno agtrabajo iti amin a kita ti nalaing a panagaramid.

³⁴ Ket insaadna iti pusona tapno mabalinna ti mangisuro, isuda a dua ken Aholiab, nga anac a lalaki ni Ahisamac, iti caputotan ni Dan.

³⁵ Cadagidiay napnoan iti saririt ti puso, tapno agtrabajoda coma iti amin a panangaramid, ti agkitkitikit, ken ti nalaing nga agaramid, ken ti agborborda iti azul, ken purpura, ken escarlata, ken lienzo a nalapat, ken ti agababel, castamet ti siasino man nga agar-aramid, ken ti agpatpataud iti nagdanonan sayaat nga aramid.