Exodo 34 - Ti Biblia (1973)

Dagiti dua a tapi a bato nabaliwanda. Ni Jehova agparang. Patigmaan a maibusor iti panagdayaw cadagiti ladladawan. Ti linteg ti tulag. Agraniag ti rupa ni Moises.

¹ Ket ni Jehova kinunana ken Moises, Mangdalumpinasca cadagiti dua a tapi a bato a cas cadagiti immuna: ket isuratconto cadagiti taptapi a bato dagiti sasao a nailugan cadagiti immuna a taptapi a binoongmo.

² Ket agsaganaca agingga iti bigat, ket iti bigat sumang-atca iti bantay Sinai, ket dumatagca caniac idiay iti pantoc ti bantay.

³ Ket awanto ti maicuyog kenca nga sumang-at; wenno awan met makita a tao iti sacup ti bantay; wenno awan met agarab a pangen dagiti an-animal a babassit uray dadackel iti sango daydiay a bantay.

⁴ Ket ni Moises dinalumpinasna dagiti dua a taptapi a bato a capada dagiti immuna; ket ni Moises bimmangon a nasapa iti bigat, ket simmang-at iti bantay Sinai, cas imbilin ni Jehova kencuana, ket iniggamanna dagiti dua a taptapi a bato.

⁵ Ket ni Jehova bimmaba iti maysa nga ulep, ket nakitacder kencuana sadiay, ket imbunannagna ti nagan ni Jehova.

⁶ Ket ni Jehova limmasat iti sangoanan ni Moises ket imbunannagna, Jehova, Jehova, Dios a manangngaasi ken managparabur, nainayad nga agpungtot, ken aglaplapusanan iti kinaimbag a siaayat ken kinapudno;

⁷ Manalimetmet iti caasi a siaayat a maipaay cadagiti rinibribu, mamacawan iti kinadakes ken salungasing ken basol; ket iti uray caano dina canunungan ti nacabasol, ipasarungcarna iti kinadakes dagiti amma cadagiti annac, ken cadagiti annac dagiti annac, agpapan maicatlo ken cadagiti maicapat a caputotan.

⁸ Ket ni Moises dinagdagusna nga inrucnoy ti olona iti daga, ket nagdaydayaw.

⁹ Ket kinunana, No ita natumpungacon ti parabur iti imatangmo, O Apo, dawatec kenca, magna coma ti Apo iti baetmi; ta isu ili a natangken ti panagtelteltelna; ket pacawanem ti kinadakesmi ken ti basolmi, ket alaennacami a tawidmo.

¹⁰ Ket ni Jehova kinunana, Adtoy, Siac buangayec ti maysa a tulag: iti sangoanan dagiti amin a cailiam aramidecto dagiti datdatlag, a dida pay naaramid iti amin a lubong, wenno iti uray ania nga nacion; ket amin dagiti tattao, a ti tengngada isu ti yanmo, macakitadanto ti aramid ni Jehova; ta nacakigkigtot ti aramidec iti pannacaaramatmo.

¹¹ Tungpalem ti ibilinco kenca itoy nga aldaw: adtoy ta papanawec iti sangoanam ti Amorrheo, ken ti Cananeo, ken ti Hetteo, ken ti Perezeo, ken ti Heveo, ken ti Jebuseo.

¹² Agannadca, di la ket ta aramidem ti maysa a tulag cadagiti agnaed iti daga nga papanam, di la ket ta maysanto a pagsilo iti tengngam:

¹³ Ngem rugpoenyonto dagiti al-altarda, ket burakenyonto dagiti tedteddecda, ket putdenyonto dagiti Aserimda;

¹⁴ (Ta dicanto agdayaw iti sabali a dios: ta ni Jehova, a ti naganna Naimun, isu ti Dios a naimun);

¹⁵ Di la ket ta bangonem ti maysa a tulag cadagiti agnaed iti daga, ket isuda mannakiabigda babaen cadagiti didiosenda, ken agdatonda cadagiti didiosenda, ket ti maysa ayabannaca a mangan iti datonna;

¹⁶ Ket mangalaca cadagiti annacda a babbai nga ipaay cadagiti lallaki nga annacmo, ket dagiti annacda a babbai makiabigda babaen cadagiti didiosenda, ket pakiabigenda dagiti annacmo a lallaki babaen cadagiti didiosenda.

¹⁷ Dicanto agaramid cadagiti didiosem a sinucug.

¹⁸ Ti pannacafiesta ti tinapay a di-nalevaduraan ngilinemto. Cadagiti pito nga aldaw mangancanto iti di-nalevaduraan a tinapay, cas imbilinco kenca, iti aldaw a natudingan iti bulan ti Abib; ta iti bulan nga Abib ti ipapanawmo sadi Egipto.

¹⁹ Amin a manglucat iti aanacan isu ti cucuac; ken amin nga an-animal no lalaki, ti umuna nga anac ti vaca ken carnero.

²⁰ Ket ti umuna nga anac ti asna subbutemto iti maysa a cordero: no dica subbutento, tuccolemto ngarud ti tengngedna. Amin nga inauna cadagiti annacmo a lallaki subbutemto. Ket awanto ti dumatag nga ima-ima iti saclangco.

²¹ Innem nga aldaw ti panagtrabajomto ngem iti maicapito nga aldaw aginanacanto: uray no panagaarado ken no panagaapit aginanacanto.

²² Ket ngilinemto ti fiesta dagiti lawlawasna, uray dagiti umuna a bungbunga ti trigo a maapit, ken ti fiesta ti apit iti gibus ti tawen.

²³ Mamitlo a daras iti macatawen nga agparangto amin dagiti lallakim iti saclang ni Apo Jehova, nga Dios ti Israel.

²⁴ Ta papanawecto dagiti tattao iti imatangmo ket palawaecto dagiti bed-beddengmo: awanto met ti agcalicagum iti dagam no umulica nga agparang iti saclang ni Jehova a Diosmo iti mamitlo iti macatawen.

²⁵ Dicanto idatag ti dara ti daton caniac a mapacuyogan iti tinapay a nalevaduraan; ti daton ti fiesta ti pascua dinto met mabigatan.

²⁶ Ti umuna cadagiti bungbunga nga umuna ti dagam yegmonto iti balay ni Jehova a Diosmo. Dicanto lutoen ti urbon a calding iti gatas ni inana.

²⁷ Ket ni Jehova kinunana ken Moises, Sica isuratmo dagitoy a sasao: ta iti maitutup cadagitoy a sasao inaramidco ti maysa a tulag kenca ken iti Israel.

²⁸ Ket isu nakipagyan idiay ken Jehova cadagiti uppat a pulo nga aldaw ken uppat a pulo a rabii; saan a nangnangan iti tinapay wenno im-mininum iti danum. Ket insuratna cadagiti taptapi a bato dagiti sasao ti tulag dagiti sangapulo a bilin.

²⁹ Ket naaramid nga idi simmalog ni Moises iti bantay nga iniggamanna dagiti dua a taptapi ti pamanecnec idi simmalog iti bantay a ni Moises saanna nga ammo idi a ti cudil ti rupana rimmaniag gaput ta nakisasao ken Jehova.

³⁰ Ket idi a ni Aaron ken amin dagiti annac ti Israel nakitada ni Moises, adtoy, ti cudil ti rupana nagraniag; ket isuda nagbutengda nga umusideg kencuana.

³¹ Ket ni Moises inayabanna ida; ket ni Aaron ken amin dagiti pangpangoloen ti gimong nagsublida kencuana: ket ni Moises nakisao cadacuada.

³² Ket iti calpasanna, amin dagiti annac ti Israel immasidegda: ket intedna a bilbilin dagup ti sinao kencuana ni Jehova idiay bantay Sinai.

³³ Ket ni Moises idi nalpasna ti pannakisaona cadacuada, incabilna ti maysa nga abbong iti rupana.

³⁴ Ngem ni Moises idi napan iti sango ni Jehova a makisao kencuana, iniccatna ti abbong inggana iti ipapanawna; ket rimmuar ket imbagana cadagiti annac ti Israel ti naibilin kencuana.

³⁵ Ket dagiti annac ti Israel nakitada ti rupa ni Moises, a ti cudil ti rupa ni Moises rimmaniag; ket incabil ni Moises ti abbong iti rupana manen, agingga iti iseserrecna a pannakisao ken Jehova.