Exodo 33 - Ti Biblia (1973)

Ni Jehova iliclicna ti saclangna. Ni Moises makisubang. Ti sungbat a naasi ni Jehova.

¹ Ket ni Jehova kinunana ken Moises, Inca, sumang-atca manipud ditoy, sica ken dagiti tattao a linapsutmo iti daga nga Egipto, a mapan iti daga nga insapatac ken Abraham, ken Isaac, ken Jacob, a kinunac, Isu ti itedconto cadagiti putotmo:

² Ket ibaonconto ti maysa nga angel iti sangoanam; ket papanawecto ti Cananeo, ti Amorrheo, ken ti Heteo, ken ti Perezeo, ken ti Heveo, ken ti Jebuseo:

³ Iti maysa a daga a pagayusan ti gatas ken diro: ta diacto makipagsang-at cadacayo; ta dacayo ilicayo a natangken ti panagtelteltelyo; di la ket a pucawencayo iti dalan.

⁴ Ket idi a dagiti tattao nangngegda dagitoy a damdamag a dakes, naglidayda: ket awan nangicapet iti saniatana.

⁵ Ket ni Jehova kinunana ken Moises, Saoem cadagiti annac ti Israel, Dacayo ilicayo a natangken ti panagtelteltelyo; no sumang-atac iti tengngayo iti apagdaricmat, ibusencayto: isu ti gapuna ita nga iccatenyo dagiti saniatayo cadagiti bagbagiyo tapno ammoc ti aramidec cadacayo.

⁶ Ket dagiti annac ti Israel iniccatda dagiti saniatada, nanipud idiay bantay Horeb.

⁷ Ita ni Moises al-alaenna idi ti tolda ket impatacderna iti ruar ti pacarso, iti adayu ti pacarso; ket pinanagananna a tolda ti gimong. Ket naaramid a tunggal maysa a sumapul idi ken Jehova mapan iti tolda ti gimong, nga adda idi iti ruar ti pacarso.

⁸ Ket naaramid nga idi napan ni Moises iti Tolda, nagtacder amin dagiti tattao, ket nagmattiderda tunggal maysa a tao iti ruangan ti toldana, ket sipsiputanda ni Moises inggana iti di-macastrec iti Tolda.

⁹ Ket naaramid nga idi ni Moises nacastrec iti Tolda, ti monmon nga ulep bimmaba, ket nagyan iti ruangan ti Tolda: ket nakisao ni Jehova ken Moises.

¹⁰ Ket amin dagiti tattao nakitada ti monmon nga ulep a siaadda iti ruangan ti Tolda: ket amin dagiti tattao timmacderda ket nagdaydayawda, tumunggal maysa a tao iti ruangan ti toldana.

¹¹ Ket ni Jehova nakisao ken Moises iti nalatac, a cas maysa a tao makisao iti gayyemna. Ket isu nagsubli manen idiay pacarso; ngem ni ministrona a Josue, nga agtutubo, nga anac a lalaki ni Nun, saan a pimmanpanaw iti Tabernaculo.

¹² Ket ni Moises kinunana ken Jehova, Kitaem, Sica cunam caniac, Alaem daytoy nga ili: ket dica impacaammo caniac ti baonemto a caduac. Nupay no kinunam, Siac amammoca iti nagan, nasaracam met ti parabur iti imatangco.

¹³ Ita ngarud, dawatec kenca, no nagunodcon ti parabur iti imatangmo, ipamatmatmo caniac dagiti daldalanmo, tapno maam-ammoca, tapno masaracac ti parabur iti imatangmo: ket panunutem a daytoy a nacion isu ti ilim.

¹⁴ Ket ni Jehova kinunana, Ti panangimatangco cumuyogto kenca, ket siac paginanaencanto.

¹⁵ Ket ni Moises kinunana kencuana, No ti panangimatangmo saanto a cumuyog caniac, dinacami al-alaen manipud ditoy.

¹⁶ Ta ania ita ti pacaammoan a natumpungacon ti parabur iti imatangmo, siac ken ti ilim? saan aya nga iti pannacaicuyogmo cadacami, tapno, siac ken ti ilim maisalsaluminacami, cadagiti amin a tattao nga addada iti rabaw ti daga?

¹⁷ Ket ni Jehova kinunana ken Moises, Aramidecto met daytoy a sinaom; gapu ta natumpungam ti parabur iti imatangco, ken naamammoca iti nagan.

¹⁸ Ket kinunana, Iparangmo caniac dawatec kenca, ti dayagmo.

¹⁹ Ket kinunana, Ipakitacto amin nga imbagco iti sangom ket ibunannagconto ti nagan ni Jehova iti sangom; ket managparaburacto iti pagparaburacto, ket caasiacto ti cayatconto a caasian.

²⁰ Ket kinunana, Dica mabalin a kitaen ti rupac; ta awan ti tao a makita caniac ket agbiag.

²¹ Ket ni Jehova kinunana, Adtoy adda maysa a yan nga asideg caniac, ket agtacdercanto iti rabaw ti bato:

²² Ket maaramidto nga no lumabas ti dayagco, icabilcanto iti maysa a tengnga ti bato, ket salinongancanto iti imac inggana iti diac macalabas:

²³ Ket ilisicto ti imac, ket sica makitamto ti licudac; ngem ti rupac saanmonto a makita.