Exodo 32 - Ti Biblia (1973)

Ni Aaron aramidenna ti balitoc nga sinan-urbon ti vaca. Ti pungtot ni Moises. Nadusa dagiti tattao.

¹ Ket idi a dagiti tattao nakitada a ni Moises nagbayag idin a di sumalog iti bantay, dagiti tattao nagpupunipunda ken Aaron, ket kinunada kencuana, Ala, yaramidannacami cadagiti didiosen, a mapanto iti sangoananmi; ta daytoy a Moises a lalaki a nangipanaw cadacami iti daga nga Egipto, dicami ammo no ania ti napasamac kencuana.

² Ket ni Aaron kinunana cadacuada, Mangkettacayo cadagiti ar-aritos a balitoc nga addada cadagiti laplapayag dagita assawayo, dagita annacyo a lallaki, ken dagita annacyo a babbai, ket yegyo ida caniac.

³ Ket amin dagiti tattao kenettada dagiti ar-aritos a balitoc nga addada cadagiti laplapayagda, ket inyegda ida ken Aaron.

⁴ Ket inawatna cadagiti im-imada, ket sinucogna iti maysa a pagkitikit nga alicamen, ket inaramidna a sinan-urbon a vaca a nasucog: ket kinunada, Dagitoy dagiti didiosmo, O Israel, a nangaon kenca iti daga nga Egipto.

⁵ Ket ni Aaron idi nakitana daytoy, namangon iti maysa nga altar iti sango ti sinan-urbon a vaca; ket ni Aaron inaramidna ti pacdaar, ket kinunana, Intono bigat isunto ti maysa a fiesta ken Jehova.

⁶ Ket isuda bimmangonda a nasapa iti bigat, ket nangirucbabda cadagiti datdaton a mapuuran, ket nangyegda iti datdaton ti cappia; ket dagiti tattao nagtugawda a nangan ken naginum, ket timmacderda a nagay-ayam.

⁷ Ket ni Jehova kinunana ken Moises, Inca, sumalogca; ta dagiti tattaom, nga impanawmo iti daga nga Egipto, minulitanda dagiti bagbagida:

⁸ Nagbaw-ingda iti apagdaricmat iti dalan nga imbilinco cadacuada: inyaramidanda dagiti bagbagida iti maysa nga sinan-urbon a vaca a sinucog, ket isu ti nagdaydayawanda, ken nagidatonanda, ket kinunada, Dagitoy dagiti didiosmo, O Israel, a nangaon kenca iti daga nga Egipto.

⁹ Ket ni Jehova kinunana ken Moises, Nakitacon daytoy nga ili, ket, adtoy maysa nga ili a natangken ti panaglenglengngesna:

¹⁰ Isu ti gapuna ita nga bay-annac, tapno bumara ti pungtotco cadacuada, ken tapno ibusec ida: ket sica ti aramidecto a dackel a nacion.

¹¹ Ket ni Moises nagdawat ken Jehova a Diosna, ket kinunana, Jehova, apayapay a bumara ti pungtotmo iti ilim, a linapsutmo iti daga nga Egipto iti naindaclan a pigsa ken iti ima a mannacabalin?

¹² Apayapay a saoendanto coma dagiti Egipcios, a cunada, Iti dakes ti nangaonanna cadacuada, tapno patayenna ida cadagiti banbantay, ken tapno ibusenna ida iti rabaw ti daga? Ibaw-ingmo ti rungsot ti pungtotmo, ket babawiem daytoy a dakes a maibusor iti ilim.

¹³ Lagipem da Abraham, Isaac, ken Israel, nga ad-adipenmo, isuda a nangisapataam gapu kenca met laeng, ket kinunam cadacuada, Siac paaduecto dagiti putotyo a cas cadagiti bitbitwen sadi langit, ket amin daytoy a daga a sinasaoc itdecto cadagiti putotyo, ket tawidendanto nga agnanayon.

¹⁴ Ket ni Jehova binabawina ti dakes nga aramidenna coma idi iti ilina.

¹⁵ Ket ni Moises nagsubli, ket simmalog iti bantay, a siiggem cadagiti dua a taptapi a bato ti pamanecnec; taptapi a bato a nasuratanda nga agsumbangir; nasuratanda iti maysa a bangir ken iti casumbangirna.

¹⁶ Ket dagiti taptapi a bato inaramid ida ti Dios, ket ti suratda sinuratan ti Dios, a naikitikit cadagiti taptapi a bato.

¹⁷ Ket ni Josue idi maal-alingagna ti uni dagiti tattao nga agpucaaw, kinunana ken Moises, Idiay pacarso adda daranudor ti gubat.

¹⁸ Ket isu kinunana, Dadiay saan a timec dagiti mangiwarragawag iti balligi, saan met nga timec dagiti un-unnoy dagiti maabac; no di ket uni dagiti agcanta ti mangngegco.

¹⁹ Ket naaramid nga idi nga immasideg iti pacarso nakitana ti sinan-urbon a vaca ken dagiti salsala: ket ti pungtot ni Moises bimmara, intupacna dagidi taptapi nga addada idi cadagiti im-imana ket imboongna ida iti arisadsad ti bantay.

²⁰ Ket innalana ti sinan-urbon a vaca nga inaramidda, ket impuurna iti apuy, ket rinunawna a pinatapuc ket inwaragawgna iti rabaw ti danum, ket impainumna cadagiti annac ti Israel.

²¹ Ket ni Moises kinunana ken Aaron, Ania ti inaramid daytoy nga ili kenca, ta inyegmo cadacuada ti maysa a naindaclan a basol?

²² Ket ni Aaron kinunana, Di coma rumangen ti unget ni apoc: ammom dagiti tattao, nga isuda aggagarada nga agdakes.

²³ Ta kinunada caniac; Yaramidannacami cadagiti didiosen, Isuda a mapan iti sangomi; ta daytoy a Moises, ti lalaki a nangilapsut cadacami iti daga nga Egipto, dicami ammo ti napasamac kencuana.

²⁴ Ket kinunac cadacuada, Siasinoman nga adda balitocna, iccatenda: iti casta intedda caniac; ket incabilco iti apuy, ket isu ti rinuaran daytoy sinan-urbon a vaca.

²⁵ Ket ni Moises idi makitana a dagiti tattao addada a nabaybayan, (ta binaybayan ida ni Aaron a pacaibabainanda cadagiti cabcabusorda,)

²⁶ Ni Moises ngarud nagtacder iti ruangan ti pacarso, ket kinunana, Siasino ti adda iti biang ni Jehova, umay coma caniac. Ket amin dagiti annac a lallaki ni Levi naguummongda kencuana.

²⁷ Ket kinunana cadacuada, Castoy ti saoen ni Jehova a Dios ti Israel. Icabil ti tumunggal maysa cadacayo ti campilanna iti luppona, ket agsursurcayo manipud ruangan agingga iti ruangan iti amin a pacarso, ket papatayenyo tunggal maysa ti cabsatna, ken tunggal maysa ti caduana, ken tunggal maysa a tao ti carrobana.

²⁸ Ket dagiti annac a lallaki ni Levi inaramidda ti mayalubog iti sao ni Moises: ket napasag cadagiti tattao iti daydi nga aldaw dagiti agtallo ribu.

²⁹ Ket ni Moises kinunana, Yawatyo dagiti bagbagiyo a santo ken Jehova ita nga aldaw, wen, tunggal tao a maibusor iti anacna a lalaki, ken mabiusor iti cabsatna a lalaki; tapno isu itedna cadacayo ti maysa a bendicion ita nga aldaw.

³⁰ Ket naaramid iti bigat, a ni Moises kinunana cadagiti tattao, Dacayo nacabasolcayo iti dackel a basol: ket ita sumang-atacto ken Jehova; nalabit nga aramidecto ti pannacaabbong a maipuon iti basolyo.

³¹ Ket ni Moises nagsubli ken Jehova, ket kinunana, O, daytoy nga ili nacabasolda iti maysa a dackel a basol, ket inyaramidanda dagiti bagbagida cadagiti didiosen a balitoc.

³² Nupay casta ita, no pacawanem ti basolda—; ket no saan, punasennac, dawatec kenca, iti libro a sinuratam.

³³ Ket ni Jehova kinunana ken Moises, Siasinoman a nacabasol iti maicaniwas caniac, isu ti punasecto iti libroc.

³⁴ Ket ita inca, iturongmo dagiti tattao iti disso a sinaoc kenca: adtoy, ti angelco mapanto iti sangom; nupay casta iti aldaw a panangsarungcarco, isarungcarconto cadacuada ti basolda.

³⁵ Ket ni Jehova kinabilna dagiti tattao, gapu ta inaramidda ti sinan-urbon a vaca nga inaramid ni Aaron.