Exodo 31 - Ti Biblia (1973)

Ni Beseleel ken ni Ooliab. Ti panangilin iti panaginana.

¹ Ket ni Jehova nakisao ken Moises a cunana,

² Kitaem, inawagacon ti nagan ni Bezaleel nga anac a lalaki ni Uri, nga anac a lalaki ni Hur, iti caputotan ni Juda:

³ Ket pinnunnocon iti Espiritu ti Dios, iti sirib, ken pannacagaw-at, ken pannacaammo, ken iti isu-amin a kita ti panagaramid,

⁴ Tapno mamuangay iti aramid a nasayaat, tapno agaramid iti balitoc, ken iti pirac, ken iti suer.

⁵ Ken iti panagticap cadagiti batbato a maitampoc, ken iti panagburic iti cayo, tapno agaramid iti isu-amin a kita a pangpalaing.

⁶ Ket siac, adtoy nga intudingcon caduana ni Aholiab, nga anac a lalaki ni Ahisama iti caputotan ni Dan; ket cadagiti puspuso dagiti amin a nanacman a puspuso incabilcon ti sirib, tapno maaramidda amin nga imbilinco kenca;

⁷ Ti tolda ti gimong, ken ti lacasa ti pamanecnec, ken ti tugaw ti caasi nga addada ti rabawna, ken amin a gargaret ti Tolda,

⁸ Ken ti lamisaan ken ar-aruatna, ken ti candelero a nadalus agraman amin nga ar-aruatna, ken ti altar ti incienso,

⁹ Ket ti altar ti daton a mapuuran agraman amin nga aruatenna, ken ti palangana agraman sacana,

¹⁰ Ken dagiti casayaatan ti pannacaaramidna a cawcawes, ken dagiti nasantoan a cawcawes a maipaay ken Aaron a padi, ken dagiti cawcawes dagiti annacna a lallaki, nga agakem iti annung ti padi,

¹¹ Ken ti lana a sapsapo, ken ti incienso a nabanglo nga recrecado nga agservi iti nasantoan a disso: iti mayannurot iti dagup ti imbilinco kenca aramidendanto.

¹² Ket ni Jehova nakisao ken Moises, a cunana,

¹³ Ibagam met cadagiti annac ti Israel a cunam, Pudno, dacayo ngilinenyonto dagiti aldawco a panaginana: ta isu ti maysa a tanda cadacayo ken caniac bayat dagiti caputotanyo; tapno maammoanyo a siac ni Jehova a mamagsanto cadacayo.

¹⁴ Isu ti gapuna a ngilinenyonto ti aldaw a panaginana; ta nasantoan cadacayo: ti tunggal maysa a dinto agraem a cas sagrado kencuana di bumurong a mapapatayto; ta siasinoman nga agaramid iti uray ania a trabajo iti dayta nga aldaw, daytoy a tao maipusayto iti ilina.

¹⁵ Cadagiti innem nga aldaw maaramidto ti panagtrabajo; ngem ti maicapito nga aldaw isu ti maysa nga inana a panaginana a nadaeg, nasantoan ken Jehova: siasinoman nga agaramid iti uray aniaman a trabajo iti aldaw a panaginana, isu dinto bumurong a mapapatay.

¹⁶ Isu ti gapuna a dagiti annac ti Israel ngilinendanto ti aldaw ti panaginana, tapno salimetmetanda ti aldaw a panaginana bayat dagiti capcaputotanda, a tulag nga agnanayon,

¹⁷ Isu ti maysa a tanda a cancanayon caniac ken dagiti annac ti Israel: gapu ta cadagiti innem nga aldaw inaramid ni Jehova ti langit, ken daga, ket iti maicapito nga aldaw naginana, ket nabang-aran.

¹⁸ Ket intedna ken Moises idi a nalpas ti pannakisaona kencuana idiay rabaw ti bantay Sinai, dagiti dua a taptapi ti pamanecnec, a tapi a bato, a sinuratan ti ramay ti Dios.