Exodo 30 - Ti Biblia (1973)

Ti altar ti incienso. Ti pirac ti pannacaabong. Ti palangana a suer. Ti lana a sapsapo. Ti incienso.

¹ Ket mangaramidcanto iti maysa nga altar a pagpuuran iti incienso iti rabawna: iti cayo nga acacia ti aramidem.

² Maysa a sico ti caatiddugnanto, ket maysa a sico ti caacabana; agcuadradonto; ket dua a sico ti catayagnanto: dagiti sarana sangsangcanayondanto iti altar.

³ Ket calupcupamto iti bin-ig a balitoc, ti rabawna, ken dagiti bacrangna nga aglawlaw, ken dagiti sarana; ket yaramidamto iti balangat a balitoc iti lawlawna.

⁴ Ket mangaramidcanto cadagiti dua a singsing a balitoc iti babaen ti balangatna; cadagiti dua a paragpagna, cadagiti dua a bacrangna aramidemto dagitoy; ket isudanto ti pagsaadan dagiti pagassiwan a pamaclayan.

⁵ Ket ti cayo nga acacia ti aramidemto nga pagassiwan ket calupcupam ida iti balitoc.

⁶ Ket icabilmonto iti sango ti abbong nga adda iti abay ti lacasa ti pamanecnec, iti sango ti tugaw ti caasi nga adda iti rabaw ti pamanecnec, a pangsaracacto kenca.

⁷ Ket ni Aaron puurannanto iti rabawna ti incienso dagiti nasayamusom nga recrecado: iti tunggal bigat no saganaenna dagiti pagsaingan, puurannanto.

⁸ Ket no ni Aaron seggedanna dagiti pagsaingan iti rumabii, puurannanto, maysa nga incienso a cancanayon iti sango ni Jehova iti bayat dagiti putputotyo.

⁹ Dicayonto mangidaton iti sabali nga incienso iti rabawna uray daton a mapuuran, uray daton a bel-laay; ket dicayto ibuyat iti rabawna ti daton a inumen.

¹⁰ Ket ni Aaron aramidennanto ti pannacaabbong a maipanggep cadagiti sarana maminsan iti macatawen; aramatennanto ti dara ti daton gapu iti basol ti pannacaabbong maminsan iti macatawen iti panangaramidna iti pacaabbongan iti dayta cadagiti caputotanyo: casantoan unay ken Jehova daytoy.

¹¹ Ket ni Jehova nakisao ken Moises a kinunana.

¹² Intono alaem ti dagup dagiti annac ti Israel, a mayannurot cadagiti mabilang cadacuada, ited ngarud ti tunggal maysa a tao ti maysa a subbot ti cararuana a maipaay ken Jehova, no bilangem ida; tapno awan ti angol cadacuada, no bilangemto ida.

¹³ Daytoy ti iteddanto, tunggal maysa a mapan cadagiti nabilang, guddua ti maysa a siclo cas iti siclo ti santuario: (ti siclo duapulo a geras;) guddua a siclo a pagdaton ken Jehova.

¹⁴ Tunggal maysa a mapan cadacuada a nabilang, manipud agtawen iti duapulo wenno sumuroc, mangtedto iti daton ken Jehova.

¹⁵ Dagiti nabacnang didanto mangted iti nasuroc, ket dagiti napanglaw didanto mangted iti nacurcurang ngem ti guddua ti siclo, no mangtedda iti daton ken Jehova, tapno maaramid ti pacaabbongan a maipaay cadagiti cararuayo.

¹⁶ Ket alaemto ti pirac ti pannacaabbong cadagiti annac ti Israel, ket ikeddengmonto iti pacaaramatan ti tolda ti gimong; tapno isunto ti pacalaglagipan dagiti annac ti Israel ti sango ni Jehova, tapno aramidenda ti pacaabbongan a maipaay cadagiti carcararuayo.

¹⁷ Ket ni Jehova nakisao ken Moises a kinunana,

¹⁸ Mangaramidcanto met iti maysa a palangana a suer, ken ti sacana a suer, nga isu ti pagbuggoanto. Ket icabilmonto iti nagbaetan ti tolda ti gimong ken iti altar, ket iccamto iti danumna.

¹⁹ Ket ni Aaron ken dagiti annacna a lallaki buggoandanto dagiti im-imada ken sacsacada idiay:

²⁰ No sumrecda iti tolda ti gimong, agbuggodanto iti danum, tapno dida matay; wenno intono mapanda umasideg nga agannung iti altar tapno puuranda ti maysa a daton a maaramid iti apuy ken Jehova.

²¹ Iti casta buggoandanto dagiti im-imada ken dagiti sacsacada, tapno saanda a matay: ket isu ti alagadendanto nga agnanayon cadacuada, isu man ken dagiti putotna iti bayat dagiti caputotanda.

²² Maysapay ni Jehova nakisao ken Moises a kinunana,

²³ Mangalacanto met iti biangmo cadagiti casayaatan nga recrecado: iti mirra nga agtubbog limagasut a siclo, ken iti canela a nasam-it ti guddua ti mirra, nga isu ti duagasut ket limapulo, ken iti calamo a nabanglo duagasut ket limapulo.

²⁴ Ken iti casia limagasut, cas iti siclo ti santuario, ken iti lana ti olivas maysa nga hin;

²⁵ Ket aramidemto a maysa a nasantoan a lana a sapsapo, maysa a bangbanglo a maaramid a cas gapuanan ti mangaramid iti bangbanglo: isunto ti nasantoan a lana a sapsapo.

²⁶ Ket isu ti pangsapsapomto iti tolda ti gimong, ken ti lacasa ti pamanecnec,

²⁷ Ken ti lamisaan ken amin nga ar-aruatna, ken ti candelero ken amin nga ar-aruatna, ken ti altar ti incienso,

²⁸ Ken ti altar ti daton a mapuuran agraman amin nga ar-aruatna, ken ti palangana ken ti sacana.

²⁹ Ket santificaremto ida, tapno isuda ti casantoanto unay: uray ania a macasagid cadacuada nasantoanto.

³⁰ Ket sapsapoamto ni Aaron ken dagiti annacna, ket santificarem ida, tapno agannungda caniac iti akem ti padi.

³¹ Ket ibagamto cadagiti annac ti Israel, a cunam, Daytoy isunto caniac ti lana a nasantoan a sapsapo bayat dagiti caputotanyo.

³² Dinto maibuyat iti lasag ti tao dicayo met mangaramidto iti uray ania a capadana, maitucad iti pannacaaramidna: isu nasantoan, ket nasantoanto cadacayo.

³³ Siasinoman nga mangaramid iti capadpadana; wenno siasinoman a mangicabil iti uray bassit kencuana iti maysa a gangannaet, maipusayto iti ilina.

³⁴ Ket ni Jehova nakisao ken Moises, Alaem iti biangmo dagiti nasayamusom nga recrecado, estacte, ken onicha, ken galbanum; nasayamusom nga recrecado agraman bin-ig nga olibanum: iti tunggal maysa agpapadadanto ti timbengna;

³⁵ Ket aramidemto nga incienso, maysa a bangbanglo a cas iti gapuanan ti manangaramid iti bangbanglo, a naiccan iti asin, nadalus ken nasantoan:

³⁶ Ket mecmekemto a sagbabassit unay ti dadduma kencuana ket mangicabilca iti dayta iti sangoanan ti pamanecnec iti uneg ti tolda ti gimong, isu a pangsaracacto kenca: isunto kenca ti casantoan unay.

³⁷ Ket incienso nga aramidenyonto, mayannurot iti panaglalaocna dicayonto mangar-aramid ti maipaay laeng cadacayo: isunto ti nasantoan kenca a maipaay ken Jehova.

³⁸ Siasinoman a mangaramidto iti capada daydiay tapno say-upenna, maipusayto iti ilina.