Exodo 29 - Ti Biblia (1973)

Ti pannacaconsagrar dagiti papadi. Dagiti datdaton ti pannacaconsagrar. Datdaton iti inaldaw-aldaw.

¹ Ket daytoy ti aramidemto a panangisaad cadacuada a nasantoan, tapno agakemda caniac iti annung ti padi: mangalaca iti bumaro a vaca, ken dua a lallaki a carcarnero nga awan pilawda,

² Ken tinapay a di-nalevaduraan, ken di-nalevaduraan a bibingca a nagamayan iti lana, ken cancanen a dinalevaduraan a nasapsapoan iti lana: ket aramidemto ida iti namayecmec nga harina.

³ Ket icabilmonto ida iti maysa a labba ket yegmonto ida a silalabba agraman ti bumaro a vaca ken dagiti dua a lallaki a carcarnero.

⁴ Ket ipanmonto ni Aaron ken dagiti annacna agingga iti ruangan ti tolda ti gimong, ket buggoamto ida iti danum.

⁵ Ket alaemto dagiti cawcawes, ket icapetmonto ken Aaron ti bado, ken ti cagay ti efod, ken ti efod, ken ti pectoral, ket baricsam iti nasayat ti pannacaabelna a barikes ti efod;

⁶ Ket isaadmonto iti olona ti mitra, ken icabilmonto iti rabaw ti mitra ti nasantoan a balangat.

⁷ Iti casta alaemto ti lana a pangpulot, ket ibuyatmo iti olona, ket pulotam.

⁸ Ket yegmonto dagiti annacna a lallaki, ket yusongmonto cadacuada dagiti badbado.

⁹ Ket cawesamto ida cadagiti barbarikes, ni Aaron ken dagiti annacna, ket icapetmo cadacuada dagiti pannacacallogong: addanto cadacuada ti kinapadi gapu iti agnanayon a pagalagadan; ket consagraremto da Aaron ken dagiti annacna a lallaki.

¹⁰ Ket yegmonto ti bumaro a vaca iti sango ti tolda ti gimong: ket ni Aaron ken dagiti annacna ipataydanto dagiti im-imada iti rabaw ti olo ti bumaro a vaca.

¹¹ Ket patayemto ti bumaro a vaca iti saclang ni Jehova, iti rabaw ti ruangan ti tolda ti gimong.

¹² Ket mangalacanto iti dara ti vaca, ket ti tammodom ti pangicabilmonto iti rabaw dagiti sarsara ti altar; ket ibuyatmonto amin nga dara iti puon ti altar.

¹³ Ket alaemto amin a taba a mangbungon cadagiti lalaem, ken ti culapot ti dalem, ken dagiti dua nga beckel, ken ti taba nga adda iti rabawda, ket puuramto ida iti rabaw ti altar.

¹⁴ Ngem ti lasag ti vaca ken ti lalatna, ken ti tackina puuramto iti apuy iti ruar ti pacarso: isu ti maysa a daton iti basol.

¹⁵ Ket alaemto met ti maysa a lalaki a carnero; ket da Aaron ken dagiti lallaki nga annacna ipataydanto dagiti im-imada iti rabaw ti olo ti carnero.

¹⁶ Ket patayemto ti carnero, ket alaemto ti darana, ket iwarsimto iti lawlaw ti rabaw ti altar.

¹⁷ Ket rangcayemto ti carnero, ket buggoam ti lalaemna, dagiti sacsacana, ket icabilmo ida iti yan dagiti narangcay, ken agraman ti olona.

¹⁸ Ket puuramto amin ti carnero iti altar: isu ti daton a mapuuran ken Jehova; isu ti maysa a sayamusom, maysa a daton a maaramid iti apuy ken Jehova.

¹⁹ Ket alaemto ti sabali a carnero a lalaki; ket da Aaron ken dagiti annacna ipataydanto dagiti im-imada iti olo ti carnero.

²⁰ Iti casta patayemto ti carnero, ket mangalaca iti darana, ket icabilmo iti toctoc ti lapayag a canawan ni Aaron, ken iti toctoc ti lapayag a canawan dagiti annacna a lallaki, ken iti tangan dagiti im-imada a makincanawan, ken iti tangan ti sacada a makincanawan, ket iwarsimto ti dara iti lawlaw ti rabaw ti altar.

²¹ Ket mangalacanto iti dara nga adda iti rabaw ti altar, ken iti lana a pagsapsapo ket iwarsim ken Aaron, ken cadagiti cawesna, ken cadagiti annacna, ken cadagiti cawcawes dagiti annacna agraman kencuana: ket mapasantonto, ken dagiti cawesna, ken dagiti annacna, ken dagiti cawcawes dagiti annacna agraman kencuana.

²² Alaemto met ti taba ti carnero, ken ti ipus a nalucmeg, ken ti taba a mamungon cadagiti lalaem, ken ti culapot ti dalem, ken dagiti dua a beckel, ken ti taba nga adda cadacuada, ken ti macanawan a luppo (ta isu ti maysa a carnero ti pannacaconsagrar),

²³ Ken ti maysa a tinapay, ken maysa a bibingca a nalanaan, ken maysa a cancanen nga aggapu iti labba ti tinapay a di-nalevaduraan nga adda iti sango ni Jehova:

²⁴ Ket icabilmo amin iti rabaw dagiti im-ima ni Aaron, ken iti rabaw dagiti im-ima dagiti annacna, ket ililidanto ida a daton a mailili iti sango ni Jehova.

²⁵ Calpasanna alaemto ida cadagiti im-imada, ket puuram ida iti rabaw ti altar iti ngatoen ti daton a mapuuran, a maysa a sayamusom iti sango ni Jehova: isu ti maysa a daton a maaramid iti apuy ken Jehova.

²⁶ Ket alaemto ti barucong ti carnero iti pannacaconsagrar ni Aaron, ket itayagmo a daton a mailili iti sango ni Jehova: ket isunto ti bagim.

²⁷ Ket pasantoemto ti barucong ti daton a mailili, ken ti luppo ti daton a maitayag, a isu ti mailili, ken isu ti maitayag, iti carnero ti pannacaconsagrar, iti daydiay met laeng a maipabagi ken Aaron, ken iti daydiay a maipabagi cadagiti annacna a lallaki.

²⁸ Ket maipabaginto ken Aaron ken cadagiti annacna a bagida a cancanayon cadagiti annac ti Israel; ta isu ti maysa a daton a maitayag: ket isu ti maysa a daton a maitayag nga aggapu cadagiti annac ti Israel cadagiti datdatonda a cappia, dagiti met laeng datdatonda a maitayag ken Jehova.

²⁹ Ket dagiti nasantoan a cawcawes ni Aaron maipaaydanto cadagiti annacna a sumono kencuana, tapno, cadagidiay a pagan-anayda mapulotanda ken maconsagrarda.

³⁰ Pito nga aldaw icapetto ida ti anac a lalaki nga agpadi a sonona, no sumrec iti tolda ti gimong nga agannung iti nasantoan a disso.

³¹ Ket alaemto ti carnero ti pannacaconsagrar, ket lutoemto ti lasagna iti maysa a yan a nasantoan.

³² Ket ni Aaron ken dagiti annacna canendanto ti lasag ti carnero, ken ti tinapay nga adda iti labba, iti ruangan ti tolda ti gimong.

³³ Ket isuda canendanto dagidiay a pacaabbongan, tapno mangconsagrar cadacuada ken mangsantificar: ngem ti maysa a gangannaet dinto mangan cadagidiay, gapu ta nasantoanda.

³⁴ Ket no adda matda a lasag ti pannacaconsagrar, wenno tinapay, agingga iti bigat, puuramto ti natda iti apuy: saanto a canen gapu ta nasantoan.

³⁵ Castoy ti aramidemto cada Aaron ken cadagiti annacna a lallaki, cas mayannurot cadagiti dagup ti imbilinco kenca: pito nga aldaw ti panangconsagrarmonto cadacuada.

³⁶ Ket tunggal aldaw yawatmonto ti vaca a bumaro a daton gapu iti basol a maipaay a pacaabbongan: ket dalusamto ti altar, no aramidem a pacaabbonganna; ket sapsapoamto, tapno pasantoem.

³⁷ Iti pito nga aldaw aramidemto ti pacaabbongan a maipaay iti altar, ket pasantoemto: ket ti altar nasantoanto unay; ti uray aniaman a mangsagid iti altar nasantoanto.

³⁸ Ita daytoy ti idatonmonto iti altar: dua a cordero nga agtawen ti maysa iti inaldaw-aldaw iti agnanayon.

³⁹ Ti maysa a cordero idatonmonto iti bigat; ket ti sabali a cordero idatonmonto iti rumabii:

⁴⁰ Ken agraman ti maysa a cordero, maysa nga apagcapulo ti maysa nga efa ti nemayecmec nga harina a nalaocan iti apagcapat ti maysa nga hin ti nadingpil a lana; ken ti maysa nga apagcapat ti hin nga arac nga daton a inumen.

⁴¹ Ket ti sabali a cordero idatonmonto iti rumabii, ket aramidemto iti daytoy a cas ti daton nga bel-laay ti bigat, ken cas ti daydiay daton nga inumen, a sayamusom, a daton a maaramid iti apuy ken Jehova.

⁴² Isu ti maysa a daton a mapuuranto a mataginayon cadagiti putputotyo iti ruangan ti tolda ti gimong iti sango ni Jehova, isu a pangdanonacto cadacayo, tapno makisaoac idiay cadacayo.

⁴³ Ket idiay danonecto dagiti annac ti Israel; ket ti Tolda mapasantonto gapu iti dayagco.

⁴⁴ Ket santificarecto ti tolda ti gimong, ken ti altar: ni Aaron ken dagiti annacna santificarecto, tapno agakemda caniac iti annung ti padi.

⁴⁵ Ket agnaedacto iti tengnga dagiti annac ti Israel, ket siacto ti Diosda.

⁴⁶ Ket ammoendanto a siac ni Jehova a Diosda, a nangaon cadacuada iti daga nga Egipto, tapno agnaedac iti tengngada: siac ni Jehova a Diosda.