Exodo 28 - Ti Biblia (1973)

Dagiti cawcawes ni Aaron. Ti efod ken ti pectoral. Ti cagay ti efod. Ti pinitpit a balitoc, bado ken mitra ni Aaron. Dagiti cawcawes dagiti papadi.

¹ Ket yasidegmo kenca ni Aaron a cabsatmo, ken dagiti annacna agraman kencuana, manipud iti tengnga dagiti annac ti Israel, tapno mangakem caniac iti annung ti padi, ni met Aaron, ni Nadab ken ni Abiu, ni Eleazar ken ni Ithamar, annac ni Aaron.

² Ket mangaramidcanto cadagiti cawcawes a nasantoan a maipaay ken Aaron a cabsatmo, a pacaidayawan ken pacapapintasan.

³ Ket saoemto cadagiti amin a mamasirib ti pusoda isuda a pinunnoc ti espiritu ti kinasirib, tapno mangaramidda cadagiti cawcawes ni Aaron a mangsantificar kencuana, tapno isu ti aggannung caniac iti akem ti padi.

⁴ Ket dagitoy dagiti cawcawes nga aramidendanto: maysa a pectoral, ken maysa nga efod, ken maysa a cagay, ken maysa a bado a kinelkelleng, maysa a mitra, ken maysa a barikes: ket mangaramiddanto cadagiti nasantoan a cawcawes a maipaay ken Aaron a cabsatmo, ken cadagiti annacna, tapno agannung caniac iti akem ti padi.

⁵ Ket mangaladanto iti balitoc, ken iti azul, ken iti purpura, ken iti escarlata, ken iti nalapat a lienzo.

⁶ Ket mangaramiddanto iti efod a balitoc, azul, ken purpura, escarlata, ken nalapat a lienzo a tinabid, a gapuanan ti nalaing nga agborborda.

⁷ Addanto dua a ragas nga hombrera a maicapet cadagiti dua a pungpungtona, tapno mapagsusugopda.

⁸ Ket ti nasayaat ti pannacaabelna a barikes, nga adda kencuana, isu a pangbarikes kencuana, maipadanto iti pannacaaramid daydiay ken isu met laeng a ragas; balitoc, azul, ken purpura, ken escarlata, ken nalapat a lienzo a tinabid.

⁹ Ket mangalacanto cadagiti dua a batbato nga onix, ket ikitikitmonto cadacuada dagiti nagnagan dagiti annac ti Israel.

¹⁰ Innem cadagiti nagnaganda iti maysa a bato, ket dagiti nagnagan dagiti innem a matda iti sabali a bato, a mayannatup iti pannacayanacda.

¹¹ Iti panangaramid ti maysa a mangkitikit iti bato, cas ti pannacailanad ti pagtandaanan, kitikitamto dagiti dua a batbato, cas mayannurot cadagiti nagnagan dagiti annac ti Israel: aramidemto ida a mabungon cadagiti calupcup a balitoc.

¹² Ket icabilmonto dagiti dua a batbato iti rabaw dagiti ragas nga hombrera ti efod, ta tapno batbato a pacalaglagipan cadagiti annac ti Israel: ket ni Aaron awitennanto cadagiti dua nga abagana dagiti nagnaganda a pacalaglagipan iti sango ni Jehova.

¹³ Ket aramidemto dagiti pagcalupcup a balitoc,

¹⁴ Ken dua a tanicala a pulos a balitoc; aramidemto ida a cas lubid a tinali: ket icabilmonto dagiti tanicala a tinali cadagiti calcalupcup.

¹⁵ Ket aramidemto ti maysa a pectoral ti panangocom, nga aramid ti nalaing nga agborborda; cas pannacaaramid ti efod aramidemto; a balitoc, nga azul, ken purpura, ken escarlata ken nalapat a lienzo a tinabid aramidemto.

¹⁶ Agcuadradonto ken agsucot; maysanto a dangan ti caatiddugna, ken maysa a dangan ti caacabana.

¹⁷ Ket icabilmonto kencuana dagiti calupcup dagiti batbato, uppat nga inintar dagiti batbato: maysa nga intar ti sardio, topacio, ken carbunclo isunto ti umuna nga intar;

¹⁸ Ket ti maicadua nga intar maysa nga esmeralda, maysa a zafiro, ken maysa a diamante;

¹⁹ Ket ti maicatlo nga intar maysa nga jacinto, maysa nga agata, ken maysa nga amatista;

²⁰ Ket ti maicapat nga intar maysa a berilo, ken maysa nga onix, ken maysa a jaspe: mabungondanto cadagiti calupcupda a balitoc.

²¹ Ket dagiti batbato mayannurotdanto cadagiti nagnagan dagiti annac ni Israel, sangapulo ket dua, cas cadagiti nagnaganda maipada iti pannacakitikit ti maysa a pagtandaanan, tunggal maysa cas iti naganna, maipaaydanto cadagiti sangapulo ket dua a capuonan.

²² Ket yaramidamto ti pectoral iti tanicala a tinabid, aramid a tinali a pulos a balitoc.

²³ Ket yaramidamto ti pectoral iti dua a singsing a balitoc, ket icabilmonto dagiti dua a singsing iti dua a pungpungto ti pectoral.

²⁴ Ket icabilmonto dagiti dua a tinali a tantanicala a balitoc cadagiti dua a singsing cadagiti pungpungto ti pectoral.

²⁵ Ket dagiti sabali a dua a mordung dagiti dua a tantanicala a tinali itapkilmonto cadagiti calupcup a dua, ket icabilmonto ida cadagiti ragragas nga hombrera, ti efod, iti sangoananna.

²⁶ Ket mangaramidcanto iti dua a singsing a balitoc, ket icabilmonto ida cadagiti dua a pungpungto ti pectoral, iti pingirna, nga adda iti bangir ti uneg ti efod.

²⁷ Ket mangaramidcanto iti dua a singsing a balitoc, ket icabilmonto ida cadagiti dua a ragragas nga hombrera ti efod iti sirocda, iti paset nga akinsango, iti asideg ti pagsusug-opanna, iti ngato ti nasayaat ti pannacaabelna a barikes ti efod.

²⁸ Ket mangigawiddanto iti pectoral gapu cadagiti singsing, cadagiti singsing ti efod iti pannacaaramat ti singdan nga azul, tapno maiparabaw iti nasayaat ti pannacaabelna a barikes ti efod, ket ti pectoral saan a mabucra iti efod.

²⁹ Ket ni Aaron awitennanto dagiti nagnagan dagiti annac ti Israel iti pectoral ti panangocom iti rabaw ti pusona, no sumrec iti nasantoan a disso, a pacalaglagipan nga agnanayon, iti sango ni Jehova.

³⁰ Ket icabilmonto iti pectoral ti panangocom ti Urim ken ti Tumim; ket agyandanto iti rabaw ti puso ni Aaron, no sumrec iti sango ni Jehova: ket ni Aaron awitennanto a cancanayon ti panangocom dagiti annac ti Israel iti rabaw ti pusona iti sangoanan ni Jehova.

³¹ Ket aramidemto nga pulos nga azul ti cagay ti efod.

³² Ket addanto putol a mayusoc iti olo iti tengngana: addanto maysa nga alubid nga inabel iti aglawlaw ti putolna, cas la coma no putol ti maysa a cabal nga iniket a paslep, tapno saan a maray-ab.

³³ Ket iti rabaw ti gayadanna aramidemto dagiti granada nga azul, ken purpura, ken escarlata, iti lawlaw ti gayadanna; ken camcampanillana a balitoc iti baetda nga aglawlaw:

³⁴ Maysa a campanillana a balitoc ken maysa a granada, maysa a campanillana a balitoc ken maysa a granada, iti rabaw ti gayadan ti cagay nga aglawlaw.

³⁵ Ket maicapetto ken Aaron a pagannong: ket ti kilingda mangngegto no sumrec iti nasantoan a disso iti sango ni Jehova, ken no rumuar, tapno di matay.

³⁶ Ket mangaramidcanto iti maysa a pinitpit a pulos a balitoc, ket ikitikitmonto iti rabawna a capada dagiti kitkitikit ti pagtandaanan, NASANTOAN KEN JEHOVA.

³⁷ Ket icabilmonto iti rabaw ti maysa a singdan nga azul, ket addanto iti mitra; agyanto iti pamarang ti mitra.

³⁸ Ket agyanto iti muging ni Aaron, ket ni Aaron awitennanto ti nagdacsan, dagiti nasantoan a banbanag, a pasantoento dagiti annac ti Israel cadagiti amin nga datdatonda a nasantoan; ket agyanto iti mugingna a cancanayon, tapno maipategda iti saclang ni Jehova.

³⁹ Ket mangabelcanto iti bado a kinelkelleng a nalapat a lienzo, ket mangaramidcanto iti maysa a mitra a lienzo nalapat, ket mangaramidcanto iti maysa a barikes, a gapuanan ti managborda.

⁴⁰ Ket yaramidamto dagiti annac ni Aaron cadagiti badbado, ken yaramidamto ida cadagiti barbarikes, ken yaramidamto ida cadagiti pannacacallogong a pamadayag ken pamapintas.

⁴¹ Ket icapetmonto ida cada Aaron a cabsatmo, ken cadagiti annacna a maigiddan kencuana; ket sapsapoamto ida, ken consagrarem ida ken santificarem ida, tapno agannungda caniac iti akem ti padi.

⁴² Ket yaramidamto ida cadagiti sapin a lienzo a mangabbong iti lasag nga ibainda; manipud iti siket agingga iti luppo ti cagayadna.

⁴³ Ket maicapetdanto cada Aaron ken cadagiti annacna, no sumrecda iti tolda ti gimong, wenno no umasidegda iti altar nga agannong iti nasantoan a disso; tapno, dida acoen ti kinadakes, ket matayda; isu ti maalagad a cancanayon a maipaay kencuana ken cadagiti putputotna a sumono kencuana.