Exodo 27 - Ti Biblia (1973)

Ti altar ti daton a mapuuran. Ti paraangan ken pagsilawan.

¹ Ket mangaramidcanto iti altar a cayo ti acacia, lima a sico ti caatiddugna, ken lima a sico ti caacabana; ti altar agcacarucodto dagiti uppat a bangirna: ket ti catayagnanto tallo a sico.

² Ket mangaramidcanto iti sarsara ti altar iti rabaw dagiti uppat a sulsulina; dagiti sarana sangsangcapasetdanto kencuana: ket calupcupamto iti suer.

³ Ket mangaramidcanto cadagiti rangrangana a pagiccan cadagiti dapdapo, ken sopsopladna, ken bacbacana, ken cadagiti pagadaw iti lasag, ken cadagiti pagiccan cadagiti beggang: amin nga al-alicamenna aramidemto iti suer.

⁴ Ket yaramidamto iti maysa a barandillas nga iniket a suer ket mangaramidcanto iti rabaw ti barandillas ti uppat a singsing a suer cadagiti uppat a sulsulina.

⁵ Ket isu icabilmonto iti babaen ti ngarab nga aglawlaw iti altar iti baba, tapno mayaplag ti iniket iti guddua ti catayag ti altar.

⁶ Ket yaramidamto ti altar cadagiti pagassiwan, pagassiwan a cayo ti acacia, ket calupcupamto ida iti suer.

⁷ Ket dagiti pagassiwan maicabildanto cadagiti singsing, ket dagiti pagassiwan agyandanto cadagiti dua a sikigan ti altar a pamaclayan.

⁸ Masulloopan iti tinabla ti aramidemto: cas idi naipakita kenca iti bantay, castanto ti aramidenda.

⁹ Ket mangaramidcanto iti paraangan ti tabernaculo: iti abagatanen ti akinabagatan a bangir iti pagparaanganan addanto cortina a tinibbay a lienzo a nalapat, nga sangagasut a sico ti caatiddug iti maysa a bangir:

¹⁰ Ket duapulonto dagiti adadigina, ket dagiti batbatayda duapulo, a suer; dagiti calcallawit dagiti adadigi ken dagiti putputiputda piracdanto.

¹¹ Ket casta met iti bangir iti amianan a nagatiddug addanto cortina a sangagasut a sico ti caatiddugda, ket dagiti adadigina duapulo, ken dagiti batbatayda duapulo a suer; dagiti calcallawit dagiti adadigi ken dagiti putputiputda pirac.

¹² Ket maipaay iti caacaba ti paraangan iti bangirna iti laud addanto cortina a limapulo a sico; dagiti adadigida sangapulo, ket dagiti batbatayda sangapulo.

¹³ Ket ti caacaba ti paraangan iti bangir ti akindaya a dayaen limapulonto a sico.

¹⁴ Dagiti cortina iti maysa a bangir ti ruangan sangapulonto ket lima a sico; dagiti adadigida tallo, ket dagiti batbatayda tallo.

¹⁵ Ket iti sabali a bangir addanto cortina a sangapulo ket lima a sico; dagiti adadigida tallo, ket dagiti batbatayda tallo.

¹⁶ Ket iti ruangan ti paraangan addanto cortina a duapulo a sico, nga azul, ken purpura, ken escarlata, ken tinabid a lienzo a nalapat, a gapuanan ti managborda; dagiti adadigida uppat, ket dagiti batbatayda uppat.

¹⁷ Amin nga adadigi ti paraangan iti aglawlaw maputiputandanto iti pirac; dagiti calcallawitda pirac, ket dagiti batbatayda suer.

¹⁸ Ti pagatiddugan ti paraangan sangagasutto a sico, ket ti caacabana limapulo iti uray adino, ket lima a sico ti catayag, ti nalapat a lienzo a tinabid, ket dagiti batbatayda suer.

¹⁹ Dagup dagiti al-alicamen ti tabernaculo iti amin a pacaaramatanna, ken amin dagiti paspasocna ken amin dagiti paspasoc ti paraangan suerdanto.

²⁰ Ket sica ibilinmonto cadagiti annac ti Israel nga mangyegdanto kenca iti nadalus a lana ti olivas a linebbec a pagsilaw, tapno maseggedan ti maysa a pagsaingan a agnanayon.

²¹ Iti uneg ti tolda ti gimong, iti ruar ti abbong nga adda iti sango ti pamanecnec, da Aaron ken dagiti annacna aywanandanto a sioornos manipud iti malem agingga iti bigat iti sango ni Jehova: isu ti maalagadto nga agnanayon cadagiti putputotda a maipaay cadagiti annac ti Israel.