Exodo 26 - Ti Biblia (1973)

Dagiti bengbeng ti tabernaculo. Tabtabla ken balbalunet. Ti abbong ken ti tabing.

¹ Maysa pay a mangaramidcanto iti tabernaculo nga adda sangapulo a bengbengna; iti nalapat a lienzo a tinabid, ken azul, ken purpura, ken nalabaga, agraman querquerubin a gapuanan ti managborda aramidemto ida.

² Ti caatiddug ti tunggal bengbeng duapulonto ket walo a sico, ket ti caacaba ti tunggal bengbeng uppat a sico: amin dagiti bengbeng maymaysanto ti rucodda.

³ Lima a bengbeng maisaipdanto ti maysa ken maysa; ket dagiti sabali a lima a bengbeng agsasaipdanto ti maysa ken maysa.

⁴ Ket mangaramidcanto cadagiti panaldengan nga azul iti pingir ti maysa a bengbeng mangrugi iti pingir iti pagsasaipan; ket casta met ti aramidemto iti pingir ti bengbeng a makinruar iti maicadua a pagsipan.

⁵ Limapulo dagiti panaldengan nga aramidemto iti maysa a bengbeng, ket limapulo a panaldengan aramidemto iti pingir iti bengbeng nga adda iti maicadua a pagsaipan; dagiti panaldengan agsasangodanto ti maysa ken maysa.

⁶ Ket mangaramidcanto iti limapulo a corchetes a balitoc, ket pagsangcanaigem dagiti bengbeng cadagiti corchetes: ket ti tabernaculo sangsangcanayonto.

⁷ Ket mangaramidcanto cadagiti bengbeng a dutdut ti calding a linong iti rabaw ti tabernaculo: sangapulo ket maysa a bengbeng ti aramidemto.

⁸ Ket ti caatiddug ti tunggal bengbeng tallopulonto a sico, ket ti caacaba ti tunggal bengbeng uppat a sico: dagiti sangapulo ket maysa a bengbeng maymaysa a rucoddanto.

⁹ Ket pagsasaipemto dagiti lima a bengbeng nga is-isuda, ken dagiti innem a bengbeng nga isu-isuda, ket culpiemto ti maicanem a bengbeng iti sango ti linong.

¹⁰ Ket mangaramidcanto cadagiti limapulo a panaldengan iti pingir nga adda iti pamarang iti pagsasaipan, ken limapulo a panaldengan iti pingir ti bengbeng nga adda cadagiti pamarang iti maicadua a pagsaipan.

¹¹ Ket mangaramidcanto cadagiti limapulo a corchetes a suer, ket icabilmonto dagiti corchets cadagiti panaldengan, ket pagtiponem ti linong, tapno sibubukel.

¹² Ket ti aguyauy a paset a suroc dagiti bengbeng ti linong, ti guddua a bengbeng nga matda, agtinnagto iti licud ti tabernaculo.

¹³ Ket ti sangcasico iti maysa a bangir, ken ti sangcasico iti maysa a bangir, iti matda ti nagatiddugan dagiti bengbeng ti linong, aguyauyto cadagiti sikigan ti tabernaculo iti daytoy a bangir ken iti daydiay a bangir, tapno maabbonganna.

¹⁴ Ket mangaramidcanto iti maysa nga abbong nga agservi iti linong a lalat dagiti carnero a lalaki a natina iti nalabaga, ken maysa nga abbong a lalat dagiti foca iti ngato.

¹⁵ Ket mangaramidcanto cadagiti tabtabla a maipaay iti tabernaculo a cayo ti acacia, a maipatacder.

¹⁶ Itinto caatiddug ti maysa a tabla sangapulo a sico, ket maysa a sico ket guddua ti caacaba ti tunggal tabla.

¹⁷ Dua nga pallaupo iti tunggal tabla, agsangalto ti maysa ken maysa: casta ti aramidemto cadagiti amin a tabtabla ti tabernaculo.

¹⁸ Ket aramidemto dagiti tabtabla ti tabernaculo, duapulo a tabtabla a maipan iti bangirna iti abagatan, agpaabagatan.

¹⁹ Ket mangaramidcanto iti uppat a pulo a batbatay a pirac iti baba dagiti duapulo a tabtabla; dua a batbatay iti baba ti maysa a tabla a pagsaadan dagiti dua nga pallaupo, ken dua a batbatay iti baba ti sabali a tabla a pagsaadan dagiti dua nga pallaupona:

²⁰ Ket iti maicadua a bangir ti tabernaculo, nga bangirna iti amianan, duapulo a tabtabla.

²¹ Ket dagiti uppat a pulo a batbatayda a pirac; dua a batbatay iti babaen ti maysa a tabla, ken dua a batbatay iti babaen ti sabali a tabla.

²² Ket iti akinlicud a paset ti tabernaculo nga akinlaud, mangaramidcanto cadagiti innem a tabtabla.

²³ Ket dua a tabtabla ti aramidemto a pasuli ti tabernaculo iti licud.

²⁴ Ket agrutapdanto iti baba, ken castadanto man met laengen agingga iti toctocna agingga iti maysa a condiling: castanto cadacuada a dua; addadanto cadagiti dua a sulsuli.

²⁵ Ket addanto walo a tabtabla, ken dagiti batbatayda a pirac, sangapulo ket innem a batbatay; dua a batbatay iti babaen ti maysa a tabla, ken dua a batbatay iti babaen ti sabali a tabla.

²⁶ Ket mangaramidcanto cadagiti balbalunet a cayo ti acacia; lima cadagiti tabtabla iti maysa a bangir ti tabernaculo,

²⁷ Ken lima a balbalunet cadigiti tabtabla iti sabali a bangir ti tabernaculo, ken lima a balbalunet cadagiti tabtabla ti bangir ti tabernaculo, iti akinlicud a bangir.

²⁸ Ket ti nagtenga a balunet iti nagtengngaan dagiti tabtabla aglayonto iti murdong ken murdong.

²⁹ Ket calupcupamto dagiti tabtabla iti balitoc, ket mangaramidcanto cadagiti singsing a balitoc a pacaiccan dagiti balbalunet: ket calupcupamto dagiti balbalunet iti balitoc.

³⁰ Ket bangonemto ti tabernaculo a cas iti caasping daydi naipakita kenca iti bantay.

³¹ Ket mangaramidcanto iti maysa nga abbong nga azul, ken purpura, ken nalabaga, ken nalapat a lienzo a tinabid: ket maaramidto nga adda querquerubin a gapuanan ti managborda:

³² Ket ibitinmonto cadigiti uppat nga adadigi nga acacia a nacalupcupan iti balitoc; dagiti sasab-itanda balitocto, iti rabaw dagiti uppat a batbatay a pirac.

³³ Ket isab-itmonto ti abbong iti babaen dagiti corchetes, ket iserrecmonto idiay iti uneg ti abbong ti lacasa ti pamanecnec: ket ti abbong paglasinennanto cadacayo ti nasantoan a disso ken ti casasantoan.

³⁴ Ket icabilmonto ti tugaw ti caasi iti rabaw ti lacasa ti pamanecnec idiay disso a casasantoan.

³⁵ Ket isaadmonto ti lamisaan iti ruar ti abbong, ken ti candelero iti sango ti lamisaan iti sikigan nga akinabagatan ti tabernaculo: ket idissomto ti lamisaan iti bangir nga akinamianan.

³⁶ Ket mangaramidcanto iti maysa a cortina a pannacaruangan ti Tabernaculo, nga azul, ken purpura, ken nalabaga, ken nalapat a lienzo a tinabid a gapuanan ti agborborda.

³⁷ Ket yaramidamto ti cortina cadagiti lima nga adadigi nga cayo ti acacia ket calupcupamto ida iti balitoc; dagiti sasab-itanda balitocdanto: ket mangpandaycanto cadagiti lima a batbatayda a suer.