Exodo 25 - Ti Biblia (1973)

Dagiti sagsagut maipaay iti santuario maibaga. Bilbilin maipanggep iti lacasa. Ti lamisaan iti tinapay ti pamarang. Ti candelero.

¹ Ket ni Jehova nakisao ken Moises a cunana,

² Saoem cadagiti annac ti Israel a mangalada iti maysa nga isagut a maipaay caniac: iti tunggal maysa a tao a matignay ti pusona a siaayat, alaenyonto a sagut caniac.

³ Ket daytoy ti isagut nga alaenyonto cadacuada: balitoc, ken pirac, ken suer.

⁴ Ken azul, ken purpura, ken nalabaga, ken lienzo a nalapat, ken dutdut dagiti calcalding,

⁵ Ken lallalat dagiti carcarnero a lallaki a natina iti nalabaga, ken lallalat dagiti foca, ken cayo nga acacia,

⁶ Segden a pagsilaw, recrecado a maipaay iti lana a panapsapo ken maipaay iti nasayamusom nga incienso,

⁷ Batbato nga onix, ken batbato a pagtampoc, nga agservi iti efod ken agservi iti pectoral.

⁸ Ket yaramidandac coma iti maysa a santuario, tapno agnaedac iti nagbabaetanda.

⁹ Cas mayannurot cadagiti amin nga ipakitac kenca, ti pagwadan ti tabernaculo, ken ti pagwadan dagiti amin nga al-alicamenna, casta ti aramidenyonto.

¹⁰ Ket mangaramiddanto iti maysa a lacasa a cayo ti acacia; dua a sico ket guddua ti caatiddugnanto, ket maysa a sico ket guddua ti caacabana, ket maysa a sico ket guddua ti catayagna.

¹¹ Calupcupamto iti pulos a balitoc, iti uneg ken ruar calupcupamto, ket aramidemto iti rabawna ti maysa a balangat a balitoc nga aglawlaw.

¹² Ket yaramidamto iti uppat a singsing a balitoc, ket icabilmonto ida cadagiti uppat a sacsacana; ket dua a singsing addadanto iti maysa a bangirna, ket dua a singsing addadanto iti sabali a bangirna.

¹³ Mangaramidcanto met cadagiti pagassiwan a cayo ti acacia, ket calupcupamto ida iti balitoc.

¹⁴ Ket yusocmonto ida cadagiti singsing cadagiti sicsikigan ti lacasa, a pammaclayan iti lacasa.

¹⁵ Dagiti pagassiwan siaaddadanto cadagiti singsing ti lacasa: saandanto a maiccat idiay.

¹⁶ Ket yunegmonto iti lacasa ti pamanecnec nga itedconto kenca.

¹⁷ Ket mangaramidcanto iti maysa a tugaw ti caasi a biig a balitoc: dua a sico ket guddua ti caatiddugnanto, ket maysa a sico ket guddua ti caacabana.

¹⁸ Ket mangaramidcanto cadagiti dua a querubin a balitoc; itinto pinitpit aramidem ida, cadagiti dua a pungto ti tugaw ti caasi.

¹⁹ Ket mangaramidca iti maysa a querubin iti maysa a pungto, ket maysa a querubin iti sabali a pungto: sangsangcanayon iti tugaw ti caasi ti aramidemto a querubin cadagiti dua a pungtona.

²⁰ Ket dagiti querubin ocradendanto iti ngato dagiti paypayacda, a linunganda ti tugaw ti caasi cadagiti paypayacda, nga agrupanrupada; ti tugaw ti caasi sangoennanto dagiti ruprupa dagiti querubin.

²¹ Ket iparabawmonto ti tugaw ti caasi iti lacasa: ket iti lacasa yunegmonto ti pamanecnec nga itedconto kenca.

²² Ket idiay ti pangsaracacto kenca, ket manipud iti ngatoen ti tugaw ti caasi ti pakisaoacto kenca, manipud iti nagbaetan dagiti dua a querubin nga addada iti rabaw ti lacasa ti pamanecnec, cadagiti amin nga itedconto kenca nga ibilin cadagiti annac ti Israel.

²³ Ket mangaramidcanto iti maysa a lamisaan a cayo ti acacia; dua a sico ti caatiddugnanto, ket maysa a sico ti caacabana, ket maysa a sico ket guddua ti cangatona.

²⁴ Ket calupcupamto iti bin-ig a balitoc, ket palawlawamto iti balangat a balitoc.

²⁵ Ket paigidamto iti agsawasaw nga aglawlaw ti sangadaculapan ti cacabana; ket mangaramidcanto iti maysa a balangat a balitoc iti igidna nga aglawlaw.

²⁶ Ket yaramidamto cadagiti uppat a singsing a balitoc, ket icabilmonto dagiti singsing cadagiti uppat a sulsuli nga addada cadagiti sacsacana.

²⁷ Addanto dagiti singsing iti asideg ti igid a pacaicabilan dagiti pagassiwan a pangbaclayan ti lamisaan.

²⁸ Ket cayo ti acacia dagiti aramidemto nga pagassiwan, ket calupcupamto ida iti balitoc, tapno isuda ti pangbagcatanto iti lamisaan.

²⁹ Ket agaramidcanto cadagiti pingpingganna, cutcucharana, gorgoritana, ken malmalucongna, a pangibuyat: iti bin-ig a balitoc aramidemto ida.

³⁰ Ket icabilmonto iti rabaw iti lamisaan ti tinapay ti pamarang iti sangoc a cancanayon.

³¹ Ket mangaramidcanto iti maysa a candelero a pasig a balitoc: pinitpit ti pannacaaramidto ti candelero, ti met puonna, ken ti ongcayna; dagiti copana, dagiti bolana a cas granada ken dagiti sabongna sangsangcanayondanto iti candelero:

³² Ket addanto innem a sangana a rumuar cadagiti agsumbangir; tallo a sanga ti candelero iti maysa a bangirna, ket tallo a sanga ti candelero iti sabali a bangirna:

³³ Tallo a copa maaramidda a cas iti sabong ti almendras iti maysa a sanga, maysa a bola ken maysa a sabong; ken tallo a copa a maaramid a cas iti sabong ti almendras iti sabali a sanga maysa a bola ken maysa a sabong: castoy cadagiti innem a sanga nga rumuar iti candelero:

³⁴ Ket iti candelero uppat a copa a maaramid a capada ti sabong ti almendras, dagiti bolana ken dagiti sabongna;

³⁵ Ket ti maysa a bola iti babaen ti dua a sanga a sangsangcanayon a paset, ken ti maysa a bola iti babaen ti dua a sanga a sangsangcanayon a paset, ken ti maysa a bola iti babaen ti dua a sanga a sangsangcanayon a paset, cadagiti innem a sanga a rumuar iti candelero.

³⁶ Dagiti bolana ken dagiti sangana addadanto iti sangsangcanayon a paset ti candelero; ti isu-amin maymaysa a paset iti pulpulos a balitoc a pinitpit.

³⁷ Ket mangaramidcanto cadagiti pagsainganna, pito: ket gangatandanto dagiti pagsainganna tapno lawaganna ti sangona.

³⁸ Ket dagiti pangarsang kencuana, ken dagiti pingpingganna a pagidissoan ti inarsang bin-igdanto a balitoc.

³⁹ Iti maysa a talento ti pulos a balitoc maaramidto, agraman amin dagitoy nga ar-aruaten.

⁴⁰ Ket kitaem ta aramidem ida a cas iti pacatuladanda, a naiparang kenca iti bantay.