Exodo 24 - Ti Biblia (1973)

Ti tulag ni Jehova iti Israel. Ni Moises adda manen idiay bantay.

¹ Ket kinunana ken Moises, Sumang-atcayo ken Jehova, sica ken Aaron, ken Nadab ken Abiu, ken pitopulo cadagiti lallacay ti Israel; ket manipud iti adayu agdayawcayo:

² Ket ni laeng Moises ti dumanonto iti asideg ken Jehova; ngem isuda didanto umasideg; uray pay dagiti tattao didanto makipagsang-at ken cuana.

³ Ket dimteng ni Moises ket sinaona cadagiti tattao amin dagiti sao ni Jehova, ken amin dagiti bilbilin: ket amin dagiti tattao simmungbatda a sangsangcagiddan, ket kinunada, Amin dagiti sasao nga imbaga ni Jehova aramidenminto.

⁴ Ket ni Moises insuratna amin dagiti sasao ni Jehova, ket bimmangon a nasapa iti bigat, ket namangon iti maysa nga altar iti arisadsad ti bantay ken sangapulo ket dua a tedteddec cas iti bilang dagiti sangapulo ket dua a capuonan ti Israel.

⁵ Ket imbaonna dagiti agtutubo a lalaki cadagiti annac ti Israel, nga nangidatag cadagiti datdaton a mapuuran, ken nagaramid cadagiti datdaton ti cappia a vacvaca ken Jehova.

⁶ Ket ni Moises innalana ti guddua ti dara, ket incabilna cadagiti palpalanggana; ket ti guddua di dara inwarisna iti rabaw ti altar.

⁷ Ket innalana ti libro ti tulag, ket binasana iti naggigimongan dagiti tattao: ket kinunada, Amin dagiti sinao ni Jehova aramidenminto, ket situtuloccamto.

⁸ Ket ni Moises innalana di dara, ket inwarisna cadagiti tattao, ket kinunana, Adtoy ti dara ti tulag nga inaramid ni Jehova cadacayo maipanggep cadagitoy amin a sasao.

⁹ Idin simmang-at da Moises, Aaron, Nadab, Abiu, ken pitopulo cadagiti lallacay ti Israel:

¹⁰ Ket nakitada ti Dios ti Israel; ket adda cas la nabaldosaan iti bato a zafiro iti babaen dagiti dapanna, ket cas la pumadpad iti langit gapu iti lawagna.

¹¹ Ket cadagiti natan-oc cadagiti annac ti Israel saanna nga incabil ti imana: ket nakitada ti Dios, ket nanganda ket naginumda.

¹² Ket ni Jehova kinunana ken Moises, Dumanonca caniac iti bantay, ket agyanca idiay: ket itdecto kenca dagiti taptapi a bato, ken ti linteg ken ti bilin, a sinuratac, tapno isuda ti isurom.

¹³ Ket ni Moises timmacder, ken ni Josue a ministrona: ket ni Moises simmang-at iti bantay ti Dios.

¹⁴ Ket kinunana cadagiti lallacay, Urayendacami ditoy, agingga iti dicami agsubli manen cadacayo: ket, adtoy, da Aaron ken ni Hur addada cadacayo; siasinoman nga adda panggepna, umasideg coma cadacuada.

¹⁵ Ket ni Moises simmang-at iti bantay, ket ti ulep binungonna ti bantay.

¹⁶ Ket ti dayag ni Jehova nagsaad iti rabaw ti bantay Sinai, ket ti ulep binungonna iti bayat ti innem nga aldaw: ket iti maicapito nga aldaw inayabanna ni Moises nanipud iti nagtengngaan ti ulep.

¹⁷ Ket ti langa ti dayag ni Jehova adda idi a cas la apuy a manguram iti pantoc ti bantay iti imatang dagiti annac ti Israel.

¹⁸ Ket ni Moises simrec ti tengnga ti ulep, ket simmang-at iti bantay: ket uppat a pulo nga aldaw ken uppat a pulo a rabii a nagyan ni Moises iti bantay.