Exodo 23 - Ti Biblia (1973)

Nadumaduma a linlinteg. Dagiti panaginana, fiesta, ken umuna a bungbunga. Naicari ti iseserrec sadi Canaan.

¹ Dica anamungan ti naulbod a damag: dica icabil ti imam a bumuyog iti nadamca nga agbalinca a naulbud a sacsi.

² Dica sumurot iti adu nga agaramid iti dakes; dica met agpalawag iti maysa a panggep a sumiasica a sumurot iti adu a manglabsing iti kinalinteg:

³ Dica met canunongan ti napanglaw a tao iti ringgorna.

⁴ No nasaracam ti vaca ti cagurguram, wenno ti asnona nga agtawtawataw, isublimto manen kencuana a di bumurong.

⁵ No makitam a naitublac a siaawit iti asno ti gumurgura kenca dicanto panpanaoan sicanto ti caduana a di bumurong a mangluc-atto kencuana.

⁶ Dica caniwasen ti calintegan ti napanglawmo iti ringgorna.

⁷ Adayoam iti naulbod a panggep; ket dagiti awan basolna ken nalinteg dica patayen: ta diacto ibilang a nalinteg ti nadamsac.

⁸ Ket dica umawat iti sucsuc: ta ti sucsuc bulsekenna dagiti macakita, ket ballicugenna dagiti sasao ti nalinteg.

⁹ Ket dica parigaten ti maysa a gangannaet: ta dacayo ammoyo ti puso ti gangannaet, yantangay dacayo naggangannaetcayo iti daga nga Egipto.

¹⁰ Ket innem a tawen a mulaamto ti dagam, ket agummongcanto iti apitna.

¹¹ Ngem iti maicapito a tawen pag-inanaemto ket bay-amto nga aglaeg; tapno dagiti napanglaw iti ilim manganda: ket ti mateddada canento ti animal ti away. Castoy ti aramidem iti cauvasam, ken iti caolivaam.

¹² Innem nga aldaw agtrabajocanto, ket iti maicapito nga aldaw aginanacanto; tapno ti vacam ken ti asnom aginanada, ket ti anac a lalaki ti adipenmo a babai, ken ti gangannaet mabang-aranda.

¹³ Ket dagiti amin nga sinaoc cadacayo imdenganyo: ket dica icampit ti nagan dagiti sabali a didios, uray panangipangngeg ti agaway iti ngiwatmo.

¹⁴ Mamitlo iti macatawen agfiestacanto a maipaay caniac.

¹⁵ Ti fiesta ti tinapay nga awan levadurana ngilinemto: cadagiti pito nga al-aldaw canemto ti tinapay a di nalevaduraan, cas imbilinco kenca, iti natudingan nga aldaw ti bulan nga Abib (ta isu idi ti ipapanawmo sadi Egipto); ket awanto ti dumatag nga ima-ima iti sangoc.

¹⁶ Ket ti fiesta ti apit, dagiti umuna a bungbunga ti banbannogmo, dagidiay nga imulam iti talon ken ti fiesta ti panagummong, iti gibus ti tawen, no agummongca cadagiti nagbannogam iti talon.

¹⁷ Mamitlo iti macatawen amin a tattaom a lallaki dumatagdanto iti saclang ni Apo Jehova.

¹⁸ Dica mangipaay iti dara ti datonco agraman tinapay a nalevaduraan; dinto met mabaybay-an ti taba ti fiestac iti agpatnag agingga iti bigat.

¹⁹ Dagiti umuna cadagiti umuna a bungbunga ti dagam yegmonto iti balay ni Jehova a Diosmo. Dica lutoen ti urbon a calding iti gatas ti inana.

²⁰ Adtoy, baonec iti sangom ti maysa nga angel, a mangaluad kenca iti dalan, ken mangipan kenca iti disso a sinaganac.

²¹ Agannadcayo iti sangona, ket ipangagyo ti timecna; dicayo pagpungtoten; ta dinanto pacawanen ti salungasingyo: ta ti naganco adda kencuana.

²² Ngem no ipangagmonto nga ipasnec ti timecna, ken aramidem amin nga ibagac; siacto ngarud ti maysa a cabusor dagiti cabusormo, ken maysa a caringgor dagiti caringgormo.

²³ Ta ti angelco mapanto iti sangoanam, ket iserrecnacanto iti Amoreo, ken iti Heteo, ken iti Pherezeo, ken iti Cananneo, ken iti Heveo, ken iti Jebuseo: ket ipusayconto ida.

²⁴ Dica agrucnoy cadagiti didiosda, wenno pagservian ida, wenno tuladen dagiti ar-aramidda; ngem tuangemto ida a maminpinsan, ket bungtolem dagiti tedteddecda.

²⁵ Ket agservicayto ken Jehova a Diosyo, ket isu bendicionannanto ti taraonmo ken ti danummo; ket siac iccatecto ti sakit iti tengngam.

²⁶ Awanto ti maalisan a babai wenno lupes iti dagam: ti bilang dagiti aldawmo tungpalecto.

²⁷ Ibaonconto ti pangkigtotco iti sangoanam, ket abakecto amin dagiti tattao a papanamto, ket aramidecto a dagiti amin a cabusormo tumallicodda kenca.

²⁸ Ket ibaonconto ti alimbubuyog iti sangom a mamapanaw iti imatangmo iti Heveo, ken iti Cananeo, ken iti Heteo.

²⁹ Diacto pagtalawen ida iti imatangmo iti maymaysa a tawen, di la ket ta agbalin ti daga nga ungaong ket dagiti an-animal ti away umaduda a bumusor kenca.

³⁰ Main-inut a pagtalawecto ida iti sangom, agingga dica umadu, ken agtawid iti daga.

³¹ Ket icabilconto a beddengmo manipud ti Baybay a Nalabaga inggana iti taaw dagiti Filisteos, ken manipud iti let-ang agingga iti Carayan: ta yawatconto iti imam dagiti agnaed iti daga; ket pagtalawemto ida iti sangoanam.

³² Dica makicapponto cadacuada, wenno cadagiti didiosda.

³³ Didanto agnaed iti dagam, di la ket ta pagbasolendaca iti maicaniwas caniac; ta no agservica cadagiti didiosda, dayta ti maysa a pacaitibculam a di bumurong.