Exodo 22 - Ti Biblia (1973)

Supapac maipoon iti salungasing, nadumaduma a linlinteg.

¹ No ti maysa a tao agtacaw iti maysa a vaca wenno carnero, ket patayenna wenno ilacona; bayadannanto iti lima a vaca ti maysa a vaca, ken uppat a carnero ti maysa a carnero.

² No ti mannanacaw matumpungan nga agar-aramid iti sercanna, ket masugat nga isu ti pacatayanna, awanto ti pannacabasol iti dara a maipuon kencuana.

³ No malgacan ti init, addanto pannacabasol ti dara a maipuon kencuana; isublinanto ti supapac: no awanan iti uray ania, isu mailaconto ngarud a maisupapac iti tinacawna.

⁴ No ti tinacaw matumpungan a sibibiag iti imana, vaca man, wenno asno, wenno carnero; bayadannanto iti mamindua.

⁵ No maysa a tao agpaarab ti talon wenno cauvasan, ket ibabatannanto ti animalna, ket agarab iti talon ti sabali a tao; iti casasayaatan nga adda iti cucuana met laeng a talon, ken ti casasayaatan iti cauvasanna met laeng ti pagbayadnanto.

⁶ No tumbuac ti apuy, ket macacayamcam cadagiti samsamec, gapuna nga dagiti binunbunton a mula, wenno ti di pay naanian a mula, wenno ti talon mauramda; ti nangsilmut iti apuy bayadannanto a di bumurong.

⁷ No maysa a tao yawatna iti padana a tao ti pirac wenno alicamen tapno idulinna, ket matacaw iti balay daytoy a tao: no matumpungan ti bircug, bayadannanto iti mamindua.

⁸ No ti bircug di matumpungan, ti pangoloen ti balay dumatagto ngarud iti Dios a pangkitaan no saanna nga incabil iti imana cadagiti cucua ti padana a tao.

⁹ Maipangep iti amin nga aramid a salungasing, uray maipapan iti vaca, wenno asno, wenno carnero, wenno pagan-anay, wenno maipapan iti uray ania a nacapucawan ti cucua, isu a pagcunaan ti maysa, Isu daytoy, ti ringgor dagiti dua dumanonto iti saclang ti Dios; ti dusaento ti Dios isu ti agbayadto iti padana a tao iti mamindua.

¹⁰ No maysa a tao yawatna iti padana a tao ti maysa nga asno, wenno vaca, wenno carnero, wenno uray ania nga animal tapno aywananna; ket matay, wenno masugat, wenno mapatalaw, nga awan tao a macakita:

¹¹ Ti sapata ni Jehova maibaetto cadacuada a dua, no dina incabil ti imana iti cucua ti padana a tao; ket ti akincua anamongannanto, ket isu agtaraken dinanto bayadan.

¹² Ngem no matacaw kencuana, supapacannanto ngarud iti akincua.

¹³ No narangrangcay, isu ti yegna coma a pammanecnec; dinanto bayadan ti narangrangcay.

¹⁴ Ket no maysa a tao bumulod iti uray ania iti padana a tao, ket masugat ti binuludna, wenno matay, nga saan a sisasango ti makincua, bayadannanto a di bumurong.

¹⁵ No ti akincucua adda a siimatang, saananto a bayadan: no pagpapaabang, bayadannanto iti abangna.

¹⁶ Ket no ti maysa a lalaki sulisogenna ti maysa a balasang a dina kinacasar, ket caiddaenna, bayadannanto a di bumurong ti panabongna kencuana tapno agbalin nga asawana.

¹⁷ No ti amana pulos a dina cayat nga ited ti balasang kencuana, isu bayadannanto iti pirac cas mayannurot iti panab-ong cadagiti babbalasang.

¹⁸ Dicanto ipalubos nga agbiag ti managanito a babai.

¹⁹ Siasinoman a makicaidda iti animal mapapatayto a di bumurong.

²⁰ Ti agdaton iti uray ania a dios, no di laeng ken Jehova, matalipupusto a madadael.

²¹ Ket dica ranggasan, wenno parparigaten ti maysa a gangannaet: gapu ta naggangannaetcayo iti daga nga Egipto.

²² Dicayo parparigaten ti uray siasino a balo a babai uray ti ulila iti ama.

²³ No sica parparigatem la ida, ket umasugda caniac, dinto bumurong nga ipangagconto ti unnoyda;

²⁴ Ket ti pungtotco bumaranto, ket patayencayto iti campilan; ket dagiti asawayo a babai mabalodanto, ket dagiti annacyo mauliladanto iti ama.

²⁵ No pautangam iti pirac ti siasinoman cadagiti tattaoc a napanglaw, sa-ancanto a cas maysa a managpautang kencuana saanyonto met a singiren kencuana ti tubo.

²⁶ No mangalaca iti uray caanoman ti pagan-anay ti padam a tao a pangicarian, isublimto kencuana no dipay lumnec ti init:

²⁷ Ta daydiay is-isu laeng ti abbongna, isu ti cawes ti cudilna: ania ti pagturognanto? ket mapasamacto a no umasug caniac denggecto; ta siac manangasiac.

²⁸ Dica pagbassawangan ti Dios wenno ilunud ti maysa nga agturay cadagiti cailiam.

²⁹ Dica agtactac a mangidaton iti nayon ti apitmo, ken iti agayus cadagiti pagpespesam. Ti inauna cadagiti anacmo a lalaki itedmonto caniac.

³⁰ Castoy met ti aramidem cadagiti vacvacam ken carcarnerom: cadagiti pito nga aldaw agyanto iti inana; iti maicawalo nga aldaw itdemto caniac.

³¹ Ket dacayo sasantocayto caniac: isu ti gapuna a dicayto canen ti uray ania a lasag a rinangcay dagiti an-animal a naranggas iti away; ibellengyonto cadagiti asaso.