Exodo 21 - Ti Biblia (1973)

Linlinteg maipapan cadagiti bag-en ken babbabac a ranggas. Ranggas a gapuanan wenno lac-amen dagiti animal.

¹ Ita dagitoy isuda dagiti linlinteg nga idatagmonto iti sangoananda.

² No gumatangca iti bag-enmo nga Hebreo, innem a tawen ti panagservinanto: ket iti maicapito pumanawto a siwawayawaya nga awan pagbayadna.

³ No sumrec nga is-isu laeng, is-isu laeng ti pumanawto: no naasawaan, ngarud pumanawto agraman ti asawana.

⁴ No ti apona iccanna iti asawa, ket ti babai ipasngayanna cadagiti annac a lallaki wenno babbai; ti asawa a babai ken dagiti annacna cucuanto ni apona, ket ti lalaki pumanawto nga is-isu laeng.

⁵ Ngem no ti bag-en cunananto iti nalawag, Siac ayatec ni apoc, ni asawac, ken dagiti annacco; diacto pumanaw nga agwayawaya:

⁶ Ti apona ngarud ipannanto iti Dios, ket yegnanto iti ruangan, wenno iti baotec ti ruangan; ket ti apona tebbengannanto iti lapayagna iti maysa a culucul; ket adipnennanto a cancanayon.

⁷ Ket no ti maysa a tao ilacona ti anacna a babai a pabag-en, saanto a pumanaw a cas cadagiti lallaki a bag-en.

⁸ No saan a macaay-ayo ken apona dayta a babai, isu a nangasawa kencuana, ipalubosnanto ngarud a masbot: awanto ti pannacabilinna a mangilaco kencuana cadagiti gangannaet a tattao, idinto a nagaramid kencuana ti allilaw.

⁹ Ket no isu yasawana iti anacna a lalaki, aramidennanto kencuana ti cas aramiden cadagiti annac a babbai.

¹⁰ No mangala iti sabali a babai nga asawa; ti taraon ti bag-en nga asawa, ti pagan-anayna, ken ti rebbeng ti pannakiasawana, dinanto kessayan.

¹¹ Ket no dina aramiden dagitoy tallo nga annungen, ti babai pumanawto nga awan anniaman, nga awan subbotna.

¹² Ti mangsugat iti maysa a tao nga isu ti pacatayanna, di bumurong a mapapatayto.

¹³ Ket no ti maysa a tao saan nga agsaneb no di ket ti Dios yawatna daydiay iti imana; no casta itudingconto kenca ti maysa a disso a pagtalawannanto.

¹⁴ Ket no ti maysa a tao ipangtana a dulusen iti padana a tao, a patayen a liputan; alaemto iti altarco, tapno matay.

¹⁵ Ket ti cumabil ken amana wenno ken inana, di bumurong a mapapatayto.

¹⁶ Ket iti agtacaw iti maysa a tao ket ilacona, wenno masaracan iti biangna, di bumurong a mapapatayto.

¹⁷ Ket ti mangilunud ken amana wenno inana, di bumurong a mapapatayto.

¹⁸ Ket no dagiti tattao agcacabilda, ket ti maysa masugatna ti caduana iti bato, wenno iti gemgemna, ket saan a matay, ngem mapaidda;

¹⁹ No macabangon manen, ket magna a macaadayu a sisasarucod, ti nangsugat ngarud maluc-atanto: ngem bayadannanto kencuana ti natactac nga aldawna, ket paagasannanto a naimbag.

²⁰ Ket no maysa a tao cabilenna ti bag-enna a lalaki, wenno ti bag-enna a babai, iti pang-or, ket matay iti babaen ti imana; di bumurong a madusanto.

²¹ Nupay casta, no agpa-ot iti maysa nga aldaw wenno dua, saanto a madusanto: ta isu piracna.

²² Ket no dagiti tattao agriringgorda, ket macabilda ti maysa a babai a masicug, ket iti casta maalisan, ngem awan pagdacsanna; di bumurong a mamultanto, cas mayalubug iti ipatay ti asawa ti babai; ket bayadannanto a cas ituding dagiti ocom.

²³ Ngem no adda pagdacsanna, itdemto ngarud ti biag iti biag.

²⁴ Mata iti mata, ngipen iti ngipen, ima iti ima, saca iti saca.

²⁵ Puur iti puur, sugat iti sugat, baot iti baot.

²⁶ Ket no ti maysa a tao danarenna ti mata ti bag-enna a lalaki, wenno ti mata ti bag-enna a babai ket madadaelna; palubusananto nga agwayawaya maipuon iti matana.

²⁷ Ket no matuppolanna ti ngipen ti bag-enna a lalaki, wenno ngipen ti bag-enna a babai; palubusannanto nga agwayawaya maipuon iti ngipenna.

²⁸ Ket no ti maysa a vaca sangdoenna a patayen ti maysa a lalaki wenno babai, ti vaca di bumurong a mauburto, ket ti lasagna saanto a masida ngem ti akinvaca awanto ti pacaananoanna.

²⁹ Ngem no ti vaca cadawyanna ti sumangsangdo cadagiti napalabas nga al-aldaw, ket naipanecnec ken akincua, ket saanna nga inaywanan, ngem nacapapatay iti tao a lalaki wenno babai; ti vaca mauburto, ken ti akincua casta met a mapapatayto.

³⁰ No naikeddeng kencuana ti panangsubbotna, itednanto ngarud ti maipaay a subbot ti biagna uray ania ti maikeddeng kencuana.

³¹ Simmangdo man iti maysa nga anac a lalaki, wenno anac a babai, cas mayannurot itoy a panangipato maaramidto kencuana.

³² No ti vaca sumangdo ti bag-en a lalaki wenno babai, maitedto ken apoda ti tallopulo a siclo a pirac, ket ti vaca mauburto.

³³ Ket no ti maysa a tao lucatannanto ti maysa a bito, wenno no ti maysa a tao mangcutcut iti maysa a bito, ket dina gaburan, ket ti maysa a vaca wenno asno mailasbongto,

³⁴ Ti akincua iti bito isu ti mangsupapac; itednanto ti pirac iti akinvaca, ket daydiay natay cucuananto.

³⁵ Ket no ti vaca ti maysa a tao ranggasanna ti vaca ti sabali nga tao, isu a pacatayanna, ilacodanto ngarud ti vaca nga sibibiag, ket bingayendanto ti naglacoanda; ket ti matay casta met a bingayendanto.

³⁶ Wenno no pagaammo a ti vaca masansan nga agsangsangdo cadagiti napalabas nga aldaw, ket ti akinvaca dina impacni; di bumurong a bayadannanto ti vaca iti vaca, ket ti natay nga animal isu ti cucuananto.