Exodo 20 - Ti Biblia (1973)

Dagiti sangapulo a bilin. Dagiti tao nagamacda idi. Linlinteg a maipanggep cadagiti ladladawan ken alaltar.

¹ Ket ti Dios sinaona amin dagitoy a balicas, cunana,

² Siac ni Jehova a Diosmo, a nangaon kenca iti daga nga Egipto, iti balay a nacaadipnan.

³ Awan ti sabali a diosmo iti sangoc.

⁴ Dica mangaramid iti maipaay kenca a ladawan a kinitikitan, uray ania a catulad ti adda idiay ngato sadi langit, wenno ti adda iti baba ditoy daga, wenno ti adda iti danum iti uneg ti daga:

⁵ Dica irucnoy ti bagim cadacuada wenno pagservian ida; ta siac ni Jehova a Diosmo manangimonac a Dios, a mangipasarungcar iti kinadakes dagiti amma cadagiti annac, cadagiti maicatlo ken maicappat a caputotan dagiti gumura caniac.

⁶ Ken mangipaay iti naayat nga asi cadagiti rinibribu nga agayat caniac ken mangsalimetmet cadagiti bilbilinco.

⁷ Dica aramaten iti barengbareng ti nagan ni Jehova a Diosmo ta ni Jehova saannanto a di pabidduten ti mangaramat iti naganna iti barengbareng.

⁸ Laglagipem ti aldaw a panaginanana tapno santificarem.

⁹ Cadagiti innem nga aldaw agtrabajocanto, ket aramidem amin nga aramidmo;

¹⁰ Ngem ti maicapito nga aldaw isu ti maysa a panaginana ken Jehova, a Diosmo: iti dayta nga aldaw, dica agtrabajo iti uray ania, sica, wenno ti anacmo a lalaki, wenno ti anacmo a babai, wenno ti adipenmo a lalaki, wenno ti adipenmo a babai, wenno dagiti animalmo, wenno ti gangannaetmo nga adda iti uneg dagiti ruanganmo:

¹¹ Ta cadagiti innem nga aldaw ni Jehova inaramidna ti langit ken daga, ti taaw, ken amin nga adda cadacuada, ket naginana iti maicapito nga aldaw: isu ti gapuna a ni Jehova binendicionanna ti aldaw a panaginana, ken sinantificarna.

¹² Dayawem ni amam ken ni inam, tapno umatiddug dagiti aldawmo iti daga nga ni Jehova a Diosmo itedna kenca.

¹³ Dica mamapatay.

¹⁴ Dica makiabig iti dica asawa.

¹⁵ Dica agtacaw.

¹⁶ Dica agsacsi iti ulbod a maibusor iti padam a tao.

¹⁷ Dica aguman ti balay ti padam a tao, dica aguman ti asawa ti padam a tao, uray ti adipenna a lalaki, uray ti adipenna a babai, uray ti vacana, uray ti asnona, uray aniaman a cucua ti padam a tao.

¹⁸ Ket amin dagiti tattao nadlawda dagiti gurgurrood, ken dagiti kimkimat, ken ti uni ti tangguyob, ken ti bantay nga agas-asuc; ket idi dagiti tattao nakitada, nagpiggergerda, ket nagyanda iti adayu.

¹⁹ Ket kinunada ken Moises, agsaoca cadacami, ket ipangagminto; ngem saan coma a ti Dios ti makisao cadacami, di la ket ta mataycami.

²⁰ Ket ni Moises kinunana cadagiti tattao, Dicayo agbuteng: ta ti Dios immayen a mangsuut cadacayo, ken tapno ti panagbuteng kencuana adda iti sangoyo, tapno dicayo agbasol.

²¹ Ket dagiti tattao nagyanda iti adayu, ket ni Moises immasideg iti napuscol a sipnget isu nga ayan idi ti Dios.

²² Ket ni Jehova kinunana ken Moises, Castoy ti saoemto cadagiti annac ti Israel, Dacayo met laeng nakitayo a nakisaoac cadacayo nanipud sadi langit.

²³ Dicayo agaramid cadagiti sabsabali a didios a pannacacadduac; didios a pirac, wenno didios a balitoc, dicayo agaramid a maipaay cadacayo.

²⁴ Maysa nga altar a daga ti aramidem caniac, ket idatonmonto idiay rabawna dagiti datdatonmo a mapuuran, ken dagiti datdatonmo ti cappia, dagiti carcarnerom, ken dagiti vacvacam; iti isu-amin a disso a pangilanadac iti naganco, umayacto kenca, ket bendicionancanto.

²⁵ Ket no yaramidannac iti altar a bato, dica pagbangon dagiti bato a pinisi; ta no aramatem ti alicamenmo kencuana tinulawamon.

²⁶ Dica met ulien iti agdan ti altarco, tapno saan maipakita idiay iti kinalamolamon.