Exodo 2 - Ti Biblia (1973)

Ni Moises nayanac ket nailemmeng. Awaten ti anac a babai ni Faraon. Patayen ni Moises ti maysa nga Egipcio ket agtalaw.

¹ Ket napan ti maysa a lalaki iti caputotan ni Levi, ket innalana nga asawa ti maysa nga anac a babai ni Levi.

² Ket ti babai nagsicug, ket naganac iti lalaki: ket idi nakitana a nalibnos nga ubing, inlemmengna iti bayat ti tallo a bulan.

³ Ket idi dina mabalin nga ilemmengen, inyalaanna iti maysa a bassit a bilog a runo a ginalagalaanna iti pitac ken betun; ket idiay ti nangicabilanna iti ubing, ket indissona iti carorootan iti igid ti carayan.

⁴ Ket ti cabsatna a babai nagyan iti adayo tapno maammoanna ti maaramid kencuana.

⁵ Ket ti anac a babai ni Faraon immulog nga agdigos iti carayan; ket dagiti babbalasangna agpagpagnada iti igid ti carayan: ket nakitana ti bassit a bilog cadagiti roroot, ket binaonna ti balasangna a mangala.

⁶ Ket linuctanna, ket nakitana ti ubing: ket adtoy a ti ubing nagibit. Ket simnec ti caasina kencuana, ket kinunana, Daytoy ti maysa cadagiti annac dagiti Hebreos.

⁷ Idin ti cabsatna a babai kinunana iti anac a babai ni Faraon, Innacto ayaban nga agpaay kenca ti maysa a babai nga Hebrea a mangtagibi iti ubing a gapu kenca?

⁸ Ket ti anac a babai ni Faraon kinunana kencuana, Inca. Ket ti balasang napan, ket inayabanna ti ina ti ubing.

⁹ Ket ti anac a babai ni Faraon kinunana kencuana, Alaem daytoy nga ubing, ket tagibiem gapu caniac ket itedconto kenca ti gongonam. Ket ti babai innalana ti ubing ket tinagibina.

¹⁰ Ket ti ubing dimmackel, ket impanna iti anac a babai ni Faraon, ket isu (ti ubing) nagbalin a pannacaanacna. Ket in-galadna ti naganna a Moises, ket kinunana, Gapu ta iti danum ti nangalaac kencuana.

¹¹ Ket naaramid cadagidiay nga al-aldaw, a idi ni Moises numakem, napan cadagiti cacabsatna, ket nakitana dagiti rigrigatda: ket nakitana ti maysa nga Egipcio a kimmabil iti maysa nga Hebreo a maysa cadagiti cacabsatna.

¹² Ket nagtaliataliaw ket idi makitana nga awan tao, pinatayna ti Egipcio, ket inlumlumna iti cadaratan.

¹³ Ket nagsursur iti maicadua nga aldaw, ket adtoy ti dua a lallaki nga Hebreos agcabcabilda: ket kinunana iti akinbasol, Apayapay a ranggasam ti capadam?

¹⁴ Ket kinunana, Asino ti namangon kenca a maysa a principe ken mangocom cadacami? Ket ni Moises nagbuteng, ket kinunana, Agpayso nga ti naaramid naammoan.

¹⁵ Idi a naammoan ni Faraon daytoy nga aramid, kinayatna idi a patayen ni Moises. Ngem ni Moises nagtalaw iti sango ni Faraon, ket nagnaed iti daga a Madian: Ket nagtugaw iti sibay ti maysa a bobon.

¹⁶ Ti padi sadi Madian adda pito nga annacna a babai: ket isuda immayda agsacdu, ket pinunnoda dagiti colcolloong a pamainumanda iti pangen ni amada.

¹⁷ Ket dagiti agpapaarab immayda, ket pinapanawda ida; ngem ni Moises timmacder ket inarayatna ida, ket impainumna dagiti arbanda.

¹⁸ Ket idi nga simmangpetda ken Raquel nga amada, isu kinunana, Ania ti gapuna a nagsublicayo iti castoy a cabiitna ita nga aldaw?

¹⁹ Ket kinunada, Ti maysa nga Egipcio inispalnacami iti ima dagiti agpapaarab, ket insacduannacami pay, ket ti pinainumna ti pangen.

²⁰ Ket isu kinunana cadagiti annacna a babbai, Ket sadino ti yanna? apayapay a binay-anyo dayta a tao? Ayabanyo, tapno mangan iti tinapay.

²¹ Ket ni Moises immannugot a nakipagnaed iti lalaki, ket isu intedna ken Moises ti anacna a babai a Sefora.

²² Ket daytoy nangyanac iti maysa a lalaki, ket ni Moises pinanagananna iti Gersom; ket kinunana, Siac nagyanac a gangannaet iti saanco a daga.

²³ Ket naaramid iti panaglasat dagidiay adu nga al-aldaw a natay ti ari ti Egipto: ket dagiti anac ti Israel nagasugda a gapu iti pannacaadipen, ket nagickisda, ket ti ickisda dimmanon iti Dios gapu iti pannaca-adipen.

²⁴ Ket ti Dios dinengngegna ti sasainnecda, ket ti Dios linagipna ti tulagna ken Abraham, ken Isaac, ken Jacob.

²⁵ Ket ti Dios minatmatanna dagiti annac ti Israel, ket ti Dios linagipna ida.