Exodo 19 - Ti Biblia (1973)

Ti Israel sadiay Sinai. Ni Moises sarakenna ni Jehova iti bantay.

¹ Iti maicatlo a bulan a calpasan ti ipapanaw dagiti annac ti Israel idiay daga nga Egipto, daydi met la nga aldaw dimtengda iti let-ang ti Sinai.

² Ket idi pimmanaoda idiay Refidim, ket dimtengda iti let-ang ti Sinai, nagsardengda iti let-ang ket idiay nagyan ti Israel ti sanngo ti bantay.

³ Ket ni Moises napan iti Dios, ket ni Jehova inayabanna nanipud iti bantay, a cunana, Castoy ti saoemto cadagiti putot ni Jacob, ket ibagamto cadagiti annac ti Israel:

⁴ Dacayo nakitayo ti inaramidco cadagiti Egipcios ken no casano ti panangalac cadacayo iti rabaw ti paypayac dagiti aguila, ket inyegcayo caniac met laeng.

⁵ Ita ngarud, no umannugutcayo a napaypayso iti saoc ket salimetmetanyo ti tulagco iti casta dacayonto iti ipangpangrunac cadagiti amin a tattao: ta amin ti daga cucuac:

⁶ Ket dacayonto caniac ti maysa a pagarian a papadi, ken maysa a nasantoan a nacion. Dagitoy dagiti sao nga ibagamto cadagiti annac ti Israel.

⁷ Ket ni Moises immay ket pinaayabanna dagiti lallacay ti ili, ket inyulitna iti sangoda amin dagitoy a sasao a ni Jehova imbilinna kencuana.

⁸ Ket amin dagiti tattao naggigiddanda a simmungbat, ket kinunada, Amin a sinao ni Jehova aramidenminto. Ket ni Moises indanunna dagiti sasao dagiti tattao ken Jehova.

⁹ Ket ni Jehova kinunana ken Moises, Kitaem ta umayac kenca iti napuscol nga ulep, tapno dagiti tattao mangngegda no makisaoac kenca, ken tapno patiendaca met nga agnanayon. Ket ni Moises imbagana dagiti sasao dagiti tattao ken Jehova.

¹⁰ Ket ni Jehova kinunana ken Moises, Inca cadagiti tattao, ket santificarem ida ita nga aldaw ken intono bigat, ket labaanda coma dagiti pagpagan-anayda,

¹¹ Ket sisasaganada coma a maipaay iti maicatlo nga aldaw; ta intono maicatlo nga aldaw ni Jehova bumabanto iti imatang dagiti amin a tattao iti rabaw ti bantay Sinai.

¹² Ket kedngamto ti pagyanan dagiti tattao iti aglawlaw, a cunam, Aluadanyo dagiti bagbagiyo, ta dicayo sumang-at iti bantay, wenno sagiden ti igidna: siasinoman a macasagid ti bantay mapapatayto a di bumurong.

¹³ Awan ti ima a sumagid kencuana, ta dinto bumurong a maubur, wenno mapana; uray animal wenno tao, dinto agbiag: intono aguni iti napa-ot ti tangguyob, umasidegdanto iti bantay.

¹⁴ Ket ni Moises simmalog iti bantay a napan cadagiti tattao, ket sinantificarna dagiti tattao; ket linabaanda dagiti pagpagan-anayda.

¹⁵ Ket kinunana cadagiti tattao, Agsaganacayo a maipaay iti maicatlo nga aldaw: dicayo dumenna iti babai.

¹⁶ Ket naaramid nga iti maicatlo nga aldaw, idi a bummigat, naggurgurrood ken nagkimkimat, ken nagulep iti napuscol iti rabaw ti bantay, ken naguni ti tangguyob a casta unay ti pigsana; ket nagkintayeg amin dagiti tattao iti pacarso.

¹⁷ Ket ni Moises inruarna dagiti tattao iti pacarso a sumabat iti Dios; ket nagyanda iti arisadsad ti bantay.

¹⁸ Ket ti bantay Sinai, ti sibubukel a bagina nagas-asuc, ta ni Jehova bimmaba iti rabawna iti apuy; ket ti maysa nga horno, ket amin ti bantay nagkintayeg iti napalalo.

¹⁹ Ket idi a pimmigsa la nga pimmigsa ti uni ti tangguyob, ni Moises nagsao, ket ti Dios sinungbatanna iti maysa a timec.

²⁰ Ket bimmaba ni Jehova iti rabaw ti bantay Sinai, iti tuctoc ti bantay; ket ni Jehova inayabanna ni Moises a dumanon iti tuctoc ti bantay; ket ni Moises simmang-at.

²¹ Ket ni Jehova kinunana ken Moises, Sumalogca, ipanecnecmo cadagiti tattao di la ket ta macaliw-asda a comita ken Jehova, ket adu cadacuada ti matay.

²² Ket casta met coma dagiti papadi nga umasideg ken Jehova, santificarenda dagiti bagbagida, di la ket ta bumusor cadacuada ni Jehova.

²³ Ket ni Moises kinunana ken Jehova, Dagiti tattao dida mabalin ti dumanon iti bantay Sinai: gapu ta impatalgedmo cadacami, a cunam, Mangaramidcayo iti pagbeddengan iti lawlaw ti bantay, ket santificarem.

²⁴ Ket ni Jehova kinunana kencuana, Inca, sumalogca; ket sumang-atcanto, sica ken ni Aaron a cacuyogmo: ngem dagiti papadi ken dagiti tattao dida coma agliw-as a sumang-at ken Jehova, di la ket ta busorenna ida.

²⁵ Iti casta ni Moises simmalog cadagiti tattao, ket imbagana cadacuada.