Exodo 18 - Ti Biblia (1973)

Ni Jetro sarakenna ken patigmaananna ni Moises.

¹ Ket ni Jetro a padi sadi Madian, a catugangan a lalaki ni Moises, naanmoanna ti amin nga inaramid ti Dios ken Moises ken iti Israel nga ilina, no casano ti panangiruar ni Jehova iti Israel sadi Egipto.

² Ket ni Jetro a catugangan a lalaki ni Moises innalana ni Sefora, nga asawa ni Moises, calpasan ti pammalubosna,

³ Ken dagiti dua nga annacna a lalaki; ti maysa cadacuada nanaganan iti Gersom; gapuna kinunana, Gangannaetac idi iti sabali a daga:

⁴ Ket di maysa nanaganan iti Eliezer; ta kinunana, Ti Dios ni amac isu idi ti catulongac, ket inlisinac iti igam ni Faraon:

⁵ Ket ni Jetro a catugangan a lalaki ni Moises, agraman, dagiti annac ken ti asawa ni Moises, napanda kencuana iti let-ang, a nagsardenganna, idiay bantay ti Dios:

⁶ Ket isu kinunana ken Moises, Siac, ni catugangam a Jetro immayac kenca, ken ni asawam ken dagiti dua nga annacna a lallaki nga incuyogna.

⁷ Ket ni Moises rimmuar a simmabat ken catuganganna, ket nagcablaaw ket inagcanna; ket nagkinnomustada nga agpadpada; ket simrecda iti tolda.

⁸ Ket ni Moises sinaritana ken catuganganna amin nga inaramid ni Jehova ken Faraon ken cadagiti Egipcios a maipuon iti Israel, amin dagiti rigrigat a linac-amda iti dalan, ken no casano ti panangispal ni Jehova cadacuada.

⁹ Ket ni Jetro nagragsac cadagiti amin nga imbag nga inaramid ni Jehova iti Israel, a panangispalna cadacuada iti ima dagiti Egipcios.

¹⁰ Ket ni Jetro kinunana, Bendito coma ni Jehova, a nangispal cadacayo iti ima dagiti Egipcios ken iti ima ni Faraon; daydiay nangisalacan cadagiti tattao iti ima dagiti Egipcios.

¹¹ Ita maammoac a ni Jehova dacdackel ngem dagiti isu-amin a didios; kinaagpaysona, gapu iti aramid a tinatangsit nga inaramidda maibusor met laeng cadacuada.

¹² Ket ni Jetro a catugangan ni Moises nangala iti daton a mapuuran ken cadagiti sacrificio a maipaay iti Dios: ket immay ni Aaron ken amin dagiti lallacay ti Israel a nakipangan iti tinapay ken catugangan ni Moises iti sango ti Dios.

¹³ Ket naaramid iti bigat, a ni Moises nagtugaw a mangocom cadagiti tattao: ket dagiti tattao nagtacderda iti lawlaw ni Moises nanipud iti bigat nagingga iti rabii.

¹⁴ Ket idi a ti catugangan ni Moises nakitana amin dagiti inar-aramidna cadagiti tattao, kinunana, Ania daytoy nga aramidem cadagiti tattao? Ania ti gapuna nga agtugawca a sicsica, ket amin dagiti tattao agtatacderda iti lawlawmo manipud iti bigat agingga iti rabii?

¹⁵ Ket ni Moises kinunana ken catuganganna, Ta dagiti tattao umayda caniac nga agintuud iti Dios.

¹⁶ No adda ririda, umayda caniac; ket siac ocomec ti tao ken ti caduana, ket ipaammoc cadacuada dagiti al-alagaden ti Dios ken dagiti linlintegna.

¹⁷ Ket ni catugangan ni Moises kinunana kencuana, Ti aramidem saan a naimbag.

¹⁸ Di bumurong a mapacsoyancanto, sica ken dagiti tattao a cadduam: ta daytoy nga annongen napalalo ti dagsenna kenca; dica mabalin nga aramiden a sicsica laeng.

¹⁹ Imdengam ita ti timecco, patigmaanancanto, ket ti Dios siaadda coma kenca: sica ti dumatag a pannacabagi dagiti tattao iti Dios, ket yamangmo dagiti babanag iti Dios;

²⁰ Ket isuromto cadacuada dagiti al-alagaden ken dagiti linlinteg, ket ipakitamto cadacuada ti dalan a rebbengda a pagnaan, ken ti aramid a rebbengda nga aramiden.

²¹ Maysa pay mangtudingcanto iti aggapu cadagiti umili cadagiti tumutop a lallaki, a dagiti managbutbuteng iti Dios, lallaki a napudno, a guraenda ti nakil-lo a pananggun-ud; ket dagita ti isaadmo cadacuada, nga agtuturay cadagiti rinibu, agtuturay cadagiti ginasut, agtuturay cadagiti saglilimapulo, ken agtuturay cadagiti pinullo:

²² Ket isuda coma ti mangipato cadagiti tattao iti cancanayon: ket castoyto, tunggal dackel a banag yamangdanto kenca, ngem amin a babassit a banbanag isudanto ti mangipato cadacuada: iti casta nalaglaganto kenca, ket isuda makipagannungdanto kenca.

²³ No aramidem daytoy, ket ti Dios ibilinna kenca a casta, mabalinmonto nga acmen, ket dagitoy met a tattao mapandanto iti ayanda a sitatalna.

²⁴ Ni Moises impangagna ti sao ni catuganganna, ket inaramidna amin nga imabagana.

²⁵ Ket ni Moises pimmili cadagiti maitutop a lallaki a nagtaud ti Israel, ket incabilna ida a mangipangolo iti umili a mangituray iti rinibu, mangituray iti ginasut, mangituray iti saglilimapulo, ken mangituray ti pinullo.

²⁶ Ket isuda agipatoda idi a cancanayon cadagiti tattao: dagiti naricut a panggep yamangda idi ken Moises, ngem amin a banbanag a babassit isuda met leangen ti nangipato.

²⁷ Ket ni Moises pinalubusanna ni catuganganna a lalaki; ket napan iti dagana met leang.