Exodo 16 - Ti Biblia (1973)

Panagtanabutub idiay let-ang a Sin, Dagiti tucling ken ti Mana.

¹ Ket inyussuatda ti pananagnada nanipud Elim, ket amin ti gimong dagiti annac ti Israel dimtengda iti let-ang a Sin, nga adda iti nagbaetan ti Elim ken Sinai, iti maicasangapulo ket lima nga aldaw ti maicadua a bulan calpasan ti panagtalawda iti daga nga Egipto.

² Ket amin ti sancagimongan nga annac ti Israel nagtanabutubda iti maibusor cada Moises ken Aaron idiay let-ang:

³ Ket dagiti annac ti Israel kinunada cadacuada, Sapay coma ta natay cami gapu iti ima ni Jehova iti daga nga Egipto, idi nagtutugawcami iti abay ti paglutoan ti lasag, idi nangancami nga agrennec iti tinapay; ta innaladacami man ditoy a let-ang, a patayen iti bisin amin daytoy a sancagimongan.

⁴ Idin ni Jehova kinunana ken Moises, Adtoy, manipud sadi langit pagtudoecto ti tinapay a taraonyo; ket dagiti tattao rumuardanto ket tunggal aldaw urnongenda iti maipaay iti inaldaw, tapno suutec ida, no pagdalanandanto met laeng ti lintegco wenno saan.

⁵ Ket maaramidto nga iti maicanem nga aldaw, agsaganadanto iti isangpetda, ket rebbbengna a mamindua ti ummongenda cas iti inaldaw a panagurnong.

⁶ Ket ni Moises ken ni Aaron kinunada cadagiti amin nga annac ti Israel, Intono rumabii, maammoanyonto ngarud nga ni Jehova inaonnacayo iti daga nga Egipto;

⁷ Ket intono bumigat, makitayonto ngarud ti dayag ni Jehova, gapu ta mangngegna dagiti dandanengdengyo a maicaniwas ken Jehova: ket siasino cami aya nga danengdenganyo iti maibusor cadacami?

⁸ Ket ni Moises kinunana, Daytoy ti maaramidto, no iccannacayonto ni Jehova no rumabii iti lasag a macan, ken iti bumigat ti tinapay a cacapnec; gapu ta ni Jehova mangngegna dagiti dandanengdengyo a panangdanengdengyo iti maicaniwas kencuana: ket siasinocami aya? dagiti tantanabutobyo saanda a maicaniwas cadacami no di ket maicaniwas ken Jehova.

⁹ Ket ni Moises kinunana ken Aaron, Ibagam iti amin a sancagimongan dagiti annac ti Israel, Umasidegcayo iti sango ni Jehova; ta nangngegna dagiti dandanengdengyo.

¹⁰ Ket naaramid nga idi nga agsasaon ni Aaron iti amin a gimong dagiti annac ti Israel, kimmitada iti agpalet-ang, ket, adtoy, ti dayag ni Jehova nagparang iti ulep.

¹¹ Ket ni Jehova nakisao ken Moises, a cunana,

¹² Nangngegcon dagiti dandanengdeng dagiti annac ti Israel: ibagam cadacuada, a cunam, Iti rumabii mangancayonto iti lasag, ket iti bumigat agrenneccayonto iti tinapay; ket ammoenyonto a siac ni Jehova a Diosyo.

¹³ Ket naaramid iti rumabii a simmangpet dagiti tucling ket binungonda ti pacarsoda: ket iti bigat nagsacnap ti linnaaw iti licmut ti pacarsoda.

¹⁴ Ket idi a ti linnaaw nagpucaw, adtoy, iti rabaw ti let-ang dagiti babassit a nagbubukel, bassit a cas la nagbalay a linnaaw a nagbukel iti rabaw ti daga.

¹⁵ Ket idi dagiti annac ti Israel nakitada daydiay, kinunada iti maysa ken maysa cadacuada, Ania daytoy? ta dida ammo idi no ania daydi. Ket ni Moises kinunana cadacuada, Daytoy ti tinapay a canen nga ited ni Jehova cadacayo.

¹⁶ Isu daytoy ti imbilin ni Jehova, Agurnongcayo iti dayta tumunggal maysa a tao iti maitutop iti macanna; maysa nga omer iti maysa nga olo (tao), a maitutop iti bilang dagiti bagbagiyo ti alaenyonto, tunggal maysa a tao alaennanto ti maipaay cadagiti adda iti toldana.

¹⁷ Ket dagiti annac ti Israel inaramidda a casta, ket nangalada, ti daduma iti ad-adu ket ti daduma basbassit.

¹⁸ Ket idi sinucatda iti omer, ti nagurnong iti ad-adu saan a nagsuroc ket ti nagurnong iti bassit, saan a nacurangan; tunggal maysa cadacuada nangala iti maitutop iti macanna.

¹⁹ Ket ni Moises kinunana cadacuada, Awan ti mangitidda iti dayta inggana iti bigat.

²⁰ Nupay casta, saanda nga impangag ni Moises; ngem ti dadduma cadacuada nangitiddada iti daydiay agingga iti bigat, ket nagigges ken naglungsot: ket ni Moises nagpungtot cadacuada.

²¹ Ket isuda agalada idi iti binigganbigat, tunggal tao iti maitutop a macanna: ket idi pimmudot ti init narunaw.

²² Ket naaramid a iti maicanem nga aldaw nagurnongda iti mamindua a caadu ti tinapay, dua nga omer iti tunggal maysa: ket amin dagiti lallacay napanda ket imbagada ken Moises.

²³ Ket isu kinunana cadacuada, Daytoy ti imbaga ni Jehova, Intono bigat isu ti nadaeg a panaginana, maysa nga nasantoan nga aldaw ti panaginana ken Jehova: Yhornoyo ti yhornoyonto, ket ipaburecyo ti ipaburecyonto; ket amin a matda a suroc, tarimaanenyo a maipaay cadacayo tapno maidulin agingga iti bigat.

²⁴ Ket isuda indulinda agingga iti bigat, cas iti ingunamgunam ni Moises: ket saan a naglungsot, wenno saan a nagigges a pulos.

²⁵ Ket ni Moises kinunana, Canenyo dayta ita; ta ita nga aldaw maysa nga aldaw a panaginana ken Jehova: ita nga aldaw dicayto macasarac iti dayta iti tay-ac.

²⁶ Innem nga aldaw nga agurnongcayonto iti dayta; ngem ti maicapito nga aldaw isu ti panaginana, iti dayta awanto a pulos.

²⁷ Ket naaramid nga iti maicapito nga aldaw, adda napan cadagiti tattao nga agurnong, ket awan a pulos ti nasaracanda.

²⁸ Ket ni Jehova kinunana ken Moises, Casano ti cabayagnan ita a dicay tungpalen dagiti bilbilinco ken linlintegco?

²⁹ Kitaenyo, ta ni Jehova intedna cadacayo ti panaginana, isu ti gapuna nga itedna cadacayo iti maicanem nga aldaw ti canen a tumutop cadagiti dua nga aldaw; agtaengcayo, tumunggal maysa a tao, iti dissona: awan coma ti rumuar iti ayanna iti maicapito nga aldaw.

³⁰ Isu ti gapuna a naginana dagiti tattao iti maicapito nga aldaw.

³¹ Ket ti balay ti Israel ninaganda daydiay iti Mana: ket isu idi ti cas la bukel ti culantro, puraw; ket ti nanamna cas la cancanen a nadiroan.

³² Ket ni Moises kinunana, Daytoy ti imbilin ni Jehova, Masalimetmetan coma agpapan putputotyo ti maysa nga omer iti daydiay; tapno kitaenda ti tinapay a pinangtaraonco cadacayo iti let-ang idi inaoncayo iti daga nga Egipto.

³³ Ket ni Moises kinunana ken Aaron, Mangalaca iti maysa a damili ket icabilmo idiay ti sangaomer a mana, ket idulinmo iti sango ni Jehova tapno masalimetmetan agpapan cadagiti putputotyo.

³⁴ Cas ni Jehova inbilinna ken Moises, casta ti panangidulin ni Aaron iti sango ti Pammanecnec, tapno masalimetmetan.

³⁵ Ket dagiti annac ti Israel nangnanganda iti mana cadagiti uppat a pulo a tawen, agingga iti idadatengda iti maysa a daga nga adda agnaed; isuda nangnanganda iti mana, agingga iti idadatengda cadagiti bedbeddeng ti daga a Canaan.

³⁶ Ti maysa nga omer isu ti apagcasangapulo ti maysa nga efa.