Exodo 15 - Ti Biblia (1973)

Ti canta ni Moises ken ni Miriam. Ti Israel sadiay Mara ken Elim.

¹ Idin ni Moises ken dagiti annac ti Israel indaniwda daytoy a canta ken Jehova, ket sinaoda a cunada, Daniwacto ni Jehova, ta nagballigin a sidadayag: Ti cabayo ken ti nagsacay intappuacna iti baybay.

² Ni Jehova isu ti pigsac ken ti daniwco, Ket isu ti nagbalin a salacanco: Daytoy isu ti Diosco ket idaydayawconto; Ti Dios ni Amac, ket itan-occonto.

³ Ni Jehova isu ti mananggubat: Jehova isu ti naganna.

⁴ Dagiti luglugan ni Faraon ken ti buyotna intappuacna iti baybay; Ket dagiti napili a cacapitanna limnedda iti Baybay a Nalabaga,

⁵ Dagiti caadalman ti baybay lapunusenda ida: Nagpababada a cas la maysa a bato cadagiti tucoc.

⁶ Ti imam a macanwan, O Jehova, nagloriaan iti pigsa, Ti imam a macanawan, O Jehova, ti cabusor winarawarana.

⁷ Ket iti kinadackel ti kinadaegmo, racrakem dagiti umingar a cumanniwas kenca: Ibaonmo ti pungtotmo, ikisapna ida a cas garami.

⁸ Ket iti bang-es ti agongmo dagiti dandanum nagdarisonda, Dagiti daldalluyon timmacderda a cas bunton; Dagiti caadalman nagbalayda iti puso ti baybay.

⁹ Ti cabusor kinunana, Camatecto, macamacamconto, Iburayconto ti samsam; Ti calicagumco mapnecto cadacuada; Asutecto ti igamco, ti imac dadaelennanto ida.

¹⁰ Pinagpuyupoymo ti anginmo, ti baybay linapunusna ida: Limnedda a cas buli cadagiti dandanum a napigsa.

¹¹ Asino ti pumadpad kenca, O Jehova, cadagiti didios? Asino ti pumadpad kenca, a nagloriaan iti kinasanto, Nacaam-amac cadagiti pannacadaydayaw, nga agar-aramid cadagiti datdatlag?

¹² Inyunnatmo ta macanawan nga imam. Ket ti daga inalununna ida.

¹³ Iti kinaimbag ti dongngom imparocpocmo cadagiti tattao a sinubbotmo: Indalanmo ida ita pigsam ti pagnaedam a nasantoan.

¹⁴ Dagiti il-ili nangngegda, isuda agkintayegda: Dagiti ut-ut immocuocda cadagiti agnaed iti Filistia.

¹⁵ Idin dagiti pangulo ti Edom nagmalmalangada; Dagiti natured a lallaki ti Moab, tayegteg innocuocna ida: Amin dagiti agnaed sadi Canaan natunawda.

¹⁶ Kigtot ken amac agdissuor cadacuada; Gapu iti kinadackel ti tackiagmo naulimecda a cas bato; Agingga ti pannacalasat ti ilim, O Jehova, Agingga ti pannacalasat ti ili a ginatangmo.

¹⁷ Iserrecmonto ida, ket imulamto ida iti bantay a pagpatawidmo, Iti disso, O Jehova, a inaramidmo a maipaay kenca tapno pagnaedan, Iti santuario, O Apo, a binangon dagita im-imam.

¹⁸ Ni Jehova agarinto iti agnanayon awan inggana.

¹⁹ Ta dagiti cabcabayo ni Faraon simrecda agraman dagiti lugluganna, ken dagiti caballeriana iti baybay, ket ni Jehova pinagsublina dagiti dandanum ti baybay a nanglapunus cadacuada; ngem dagiti annac ti Israel nagnada iti rabaw ti daga a namaga iti tengnga ti baybay.

²⁰ Ket ni Miriam a mammadto, a cabsat a babai ni Aaron, iniggamanna ti pandareta; ket amin dagiti babbai napanda sinurot a sipapandareta ken agsalsala.

²¹ Ket ni Miriam simmungbat cadacuada, Cantaanyo ni Jehova, ta isu nagballigi a sidadayag; Ti cabayo ken simmacay intappuacna iti baybay.

²² Ket ni Moises inturongna ti Israel nanipud iti Baybay a Nalabaga ket napanda iti tay-ac a Shur; ket tallo nga aldaw nga pinagnada ti let-ang, ket dida nacasarac iti danum.

²³ Ket idi macadanonda idiay Mara, dida nabalin ti imminum cadagiti dandanum ti Mara, ta napaitda: gapuna a ninagananda Mara.

²⁴ Ket dagiti tattao nagdanengdengda ken Moises, a cunada, Ania ti inumenminto?

²⁵ Ket isu immaoag ken Jehova; ket ni Jehova impatuldona kencuana ti maysa a cayo, ket intappuacna cadagiti dandanum, ket dagiti dandanum simmam-itda. Idiay nagaramid iti maipaay cadacuada iti maysa nga alagaden ken maysa a nagbilinan, ket idiay sinuutna ida;

²⁶ Ket kinunana, No ipangagmonto a sipapasnec ti timec ni Jehova a Diosmo, ket aramidemto ti nalinteg iti imatangna, ket imdengamto dagiti bilbilinna, ket salimetmetamto amin dagiti al-alagadenna awanto ti iccabilco kenca cadagiti sakit nga incabilco cadagiti Egipcios: ta siac ni Jehova a mamaimbag kenca.

²⁷ Ket dimtengda sadi Elim, nga ayan idi dagiti sangapulo ket dua nga ub-ubbog ti danum, ken pitopulo a palmas: ket nagyanda iti sibay dagiti dandanum.