Exodo 13 - Ti Biblia (1973)

Ti pannacaconsagrar dagiti inauna. Casano ti pannacaibagnos ti ili.

¹ Ket ni Jehova nakisao ken Moises a cunana,

² Santificarem caniac amin nga inauna ti uray amin a manglucat iti aanacan cadagiti annac ti Israel, tao man ken animal: isu ti cucuac.

³ Ket ni Moises kinunana cadagiti tattao, Laglagipenyo daytoy nga aldaw isu a panagtalawyo sadi Egipto iti balay a nacaadipnan; ta gapu iti napigsa nga ima inlapsotnacayo ni Jehova iti daytoy nga ayan; awanto ti macan a nalevaduraan a tinapay.

⁴ Daytoy nga aldaw ti bulan ti Abib pumanawcayo.

⁵ Ket maaramidto, a no ni Jehova iserrecnacanto iti daga ti Cananeo, ken ti Heteo, ken ti Amorreo, ken ti Hebeo, ken ti Jebuseo, isu a sinapataanna cadagiti dadackelmo nga itedna kenca, maysa a daga a pagayusan ti gatas ken diro, salimetmetamto daytoy nga annungen iti daytoy a bulan.

⁶ Pito nga aldaw ti pannanganmonto iti tinapay nga awan levadurana, ket iti maicapito nga aldaw isunto ti maysa a fiesta ken Jehova.

⁷ Cadagiti pito nga aldaw macanto ti tinapay nga awan levadurana; ket awanto a masaracan kenca ti awan levadura a tinapay, wenno saanto a makita kenca ti levadura iti amin a beddengmo.

⁸ Ket saritaemto iti anacmo a lalaki iti dayta nga aldaw, a cunam, Daytoy maipuon iti inaramid ni Jehova caniac idi pimmanawac sadi Egipto.

⁹ Ket addanto maysa a pagilasinan kenca ita imam, ken maysa a pacalaglagipan iti baet dagita matam, tapno ti linteg ni Jehova adda iti ngiwatmo: ta gapu iti napigsa nga ima innalanaca ni Jehova sadi Egipto.

¹⁰ Anansata tungpalemto daytoy nga alagaden iti tiempona iti tinawentawen.

¹¹ Ket maaramidto intono inserrecnaca ni Jehova iti daga dagiti Cananeo, cas insapatana kenca ken cadagiti dadackelmo, ket itednanto kenca,

¹² Nga idatagmonto ken Jehova amin a manglucat iti aanacan, ken amin a inauna a cucuam nga agtaud iti animal dagiti lallaki cucuanto ni Jehova.

¹³ Ket iti amin nga inauna ti asno subbotemto iti cordero; ket no dicanto subboten, tuccolemto ti lengngesna: ket amin nga inauna ti tao cadagiti annacmo a lallaki subbotemto.

¹⁴ Ket maaramidto a no iti masacbayan saludsudento kenca ti anacmo a lalaki, a cunana, Ania daytoy? saoemto kencuana, Iti pigsa ti ima ni Jehova innalanacami nanipud sadi Egipto iti balay a nacaadipnan:

¹⁵ Ket naaramid a idi a sinukir ni Faraon ti panangpalubosna cadacami ni Jehova pinatayna sadiay daga nga Egipto amin nga annac a inauna, inaunaan man ti tao ken inaunaan ti animal: isu ti gapuna nga idatonco ken Jehova amin a manglucat iti aanacan, no lalaki; ngem amin nga inauna cadagiti annacco a lallaki subbotec.

¹⁶ Ket daytoyto ti maysa a tanda iti imam ken iti sango ti baet dagiti matam, ta gapu iti pigsa ti ima ni Jehova inruarnacami sadi Egipto.

¹⁷ Ket naaramid nga idi ni Faraon pinalubosanna ti umili a pimmanaw, ti Dios dina inturong ida iti dalan ti daga dagiti Filisteos, nupay no asideg daydiay idi; ta ti Dios kinunana, Di la ket ta dagiti tattao agbabawidanto no makitada ti gubat ket agsublida sadiay Egipto.

¹⁸ Ngem ti Dios inturongna dagiti tattao a sumiasi iti dalan ti let-ang sadiay Baybay a Nalabaga: ket dagiti annac ti Israel simmang-atda a siigam manipud iti daga nga Egipto.

¹⁹ Ket ni Moises incuyogna dagiti tultulang ni Jose: ta pinagsapatana iti nainget idi dagiti annac ti Israel, a cunana, Ti Dios sarungcarannacayto a di agcurang; ket icuyogyonto dagiti tul-tulangco no agtalawcayo ditoy.

²⁰ Ket nagnada nanipud, Succoth, ken nagyanda idiay Etham, ti pagsercan iti let-ang.

²¹ Ket ni Jehova nagna iti sangoda iti maysa a monmon nga ulep a mangiturong cadacuada iti dalan ket no iti rabii iti maysa a monmon nga apuy, tapno lawaganna ida; tapno macapagnada iti aldaw ken iti rabii:

²² Saan a simmina iti sango dagiti tattao ti monmon nga ulep iti aldaw ken ti monmon nga apuy iti rabii.