Exodo 12 - Ti Biblia (1973)

Ti pascua ken ti fiesta ti di nalevaduraan a tinapay. Ti pananglabas. Ti pannacapatay dagiti inaunaan nga annac dagiti Egipcios. Ti Israel rumuar sadiay Egipto. Alagaden ti pascua.

¹ Ket ni Jehova nakisao cada Moises ken Aaron idiay daga nga Egipto, a cunana,

² Dagitoy a bulan isunto cadacayo ti pangrugian dagiti bulbulan: isunto cadacayo ti umuna a bulan iti tawen.

³ Saoenyo iti dagup ti gimong ti Israel, a cunayo, Iti maicapulo nga aldaw itoy a bulan mangaladanto tunggal maysa a lalaki iti maysa a famfamilia dagiti ammada, maysa a cordero iti sangacabbalayan:

⁴ Ket no ti sangacabbalayan bassit a mangan iti cordero, iti casta isu ken ti carrobana a caasitgan iti balayna mangaladanto iti maysa cas iti bilang dagiti cararua; mayannurot iti macan ti tunggal tao, itutupyonto dagiti bagiyo iti cordero.

⁵ Ti corderoyo awanto ti pacapilawanna, lalaki nga agtawen iti maysa: isu nga alaenyonto cadagiti carcarnero wenno cadagiti calcalding:

⁶ Ket aywananyonto agingga iti maicasangapulo ket uppat nga aldaw iti dayta met laeng a bulan; ket isu partiento ti amin a gimong ti Israel, iti rabii.

⁷ Ket mangaladanto iti dara, ket icabildanto iti baotec nga agsumbangir ken ngatoen ti ruangan, cadagiti balbalay a panganandanto.

⁸ Ket iti daydiay a rabii canendanto ti lasag a matuno iti apuy, ken tinapay nga awan levadurana; ipangandanto cadagiti natnateng a napait.

⁹ Dicayo cidaen daydiay naata, wenno liningta iti danum, no di laeng natuno iti apuy; uray pay ti olona agraman sacsacana ken lalaemna.

¹⁰ Ket awanto ti uray ania a tiddaenyo a maipabigat; ngem ti mabatinto a mabigatan, puuranyonto iti apuy.

¹¹ Ket castoy pannanganyonto: sibabarikescayo, sisazapatos ken siiggem cayo iti sarucod; ket canenyonto a madaras: isu ti pascua ni Jehova.

¹² Ta siac agpasiaracto iti daga nga Egipto iti daydiay a rabii, ket patayecto amin dagiti annac nga inauna iti daga nga Egipto, tao man ken animal; ket aramidecto ti panangocom a maibusor cadagiti amin a didiosen ti Egipto; siac ni Jehova.

¹³ Ket ti dara cadagiti balbalay a pagyananyo isunto ti pagilasinan cadacayo: ket no makitacto ti dara, labsancayonto ket awanto cadacayo ti didigra a mangpatay cadacayo, intono dusaec ti daga nga Egipto.

¹⁴ Ket daytoy nga aldaw isunto cadacayo iti maysa a pacalaglagipan, ket salimetmetanyonto a fiesta ken Jehova: cadagiti caputotanyo salimetmetanyonto a fiesta a pagalagadan iti cancanayon.

¹⁵ Pito nga al-aldaw a mangancayonto iti tinapay nga awan levadurana; iti umuna nga aldaw met laeng ibellengyonto cadagiti balbalayyo: ta sia-sinoman a manganto iti nalevaduraan a tinapay manipud iti umuna nga aldaw agingga iti maicapito nga aldaw, daydiay a tao maipusayto iti Israel.

¹⁶ Ket iti umuna nga aldaw addanto ti maysa a nasantoan a panagguurnong, cadacayo ken iti maicapito nga aldaw, ti maysa a nasantoan a panagguurnong, awanto ti uray ania nga ar-aramid cadagidiay nga al-aldaw, dagidiay laeng dagiti agservi a canen ti tunggal tao, daytoy laeng ti maipalubos cadacayo.

¹⁷ Ket ngilinenyonto ti fiesta ti tinapay nga awan levadurana; ta iti daytoy met laeng nga aldaw, innalac dagiti buybuyotyo iti daga nga Egipto: gapuna nga ngilinenyonto daytoy nga aldaw a pagalagadan nga agnanayon agpapan putputotyo.

¹⁸ Iti umuna nga bulan, iti maicasangapulo ket uppat nga aldaw ti bulan iti rumabii, canenyonto ti tinapay nga awan levadurana agingga iti maicaduapulo ket maysa nga aldaw ti bulan iti rumabii.

¹⁹ Bayat dagiti pito nga al-aldaw awanto ti masaracan a levadura cadagiti balbalayyo: ta siasinoman a mangan iti nalevaduraan, dayta a tao maipusayto iti gimong ti Israel, gangannaet man wenno umili iti daga.

²⁰ Uray amin a nalevaduraan dicayto canen; cadagiti amin a pagyananyo mangancayonto iti tinapay nga awan levadurana.

²¹ Idin ni Moises inumongna amin a lallacay ti Israel, ket kinunana cadacuada, Incayo ket mangalacayo cadagiti corderoyo cas mayannurot cadagiti famfamiliayo, ket partienyo ti pascua.

²² Ket mangalacayo coma iti sangareppet nga hisopo, ket isawsawyo iti dara a nagyan iti batia, ket iwarsiyonto iti ngato ti ruangan ken dagiti agsumbangir a baotec, ti dara nga nagyan iti batea; ket awanto cadacayo ti rumuar iti ruangan ti balayna agingga iti bigat.

²³ Ta ni Jehova agsursurto a manaplit cadagiti Egipcios; ket ti pannacakitananto iti dara nga adda iti ngato ti ruangan ken cadagiti agsumbangir a baotec, ni Jehova labsannanto dayta nga ruangan, ket dinanto ipalubos a sumrec ti agpapatay a mangcabil cadacayo cadagiti balbalayyo.

²⁴ Ket salimetmetanyonto daytoy nga alagaden a maipaay cadacayo ken cadagiti annacyo iti agnanayon.

²⁵ Ket maaramidto nga intono sumreccayo iti daga nga itedto ni Jehova cadacayo a cas incarina, salimetmetanyonto daytoy nga annungen.

²⁶ Ket maaramidto a no cunaendanto dagiti annacyo cadacayo, Ania ti caipapanan daytoy nga annungen?

²⁷ Cunayonto, Isu ti daton ti pascua ni Jehova, a limmabas cadagiti balbalay dagiti annac ti Israel sadiay Egipto, idi dinusana dagiti Egipcios, ket insalacanna dagiti balbalaymi. Ket dagiti tattao nagtamedda ket nagdaydayawda.

²⁸ Ket dagiti annac ti Israel napanda inaramid ti casta; cas iti panangibilin ni Jehova cada Moises ken Aaron, casta ti panangaramidda.

²⁹ Ket naaramid a iti tengnga ti rabii ni Jehova Kinabilna amin dagiti inauna nga anac iti daga nga Egipto, nanipud iti anac nga inauna ni Faraon a nagtugaw iti tronona agingga iti inauna nga anac ti balud nga adda idi iti pagbaludan; ken amin dagiti annac nga inauna dagiti an-animal.

³⁰ Ket bimmangon idi nga rabii ni Faraon, isu, ken amin dagiti ad-adipenna, ken amin dagiti Egipcios; ket adda idi naindaclan nga ariwawa sadiay Egipto; ta awan idi ti balay nga di adda natay.

³¹ Ket pinaayabanna da Moises ken Aaron iti rabii, ket kinunana, Tumacdercayo, pumanawcayo iti baet dagiti iturayac, dacayo ken casta met dagiti annac ti Israel; ket incayo agservi ken Jehova a cas kinunayo.

³² Alaenyo dagiti an-animalyo a babassit man ken dadackel, cas kinunayo, ket incayon ala; ket bendicionandac met.

³³ Ket dagiti Egipcios dinagdagda idi dagiti tattao, a pinagdardarasda a pinapanaw ida iti daga; ta kinunada, Mataycamin amin.

³⁴ Ket dagiti tattao innalada dagiti ginamayda a di pay nalevaduraan, dagiti pagaramidanda iti tinapay a naibungon cadagiti paga-anayda a binaclayda.

³⁵ Ket dagiti annac ti Israel inaramidda cas mayalubog iti sao ni Moises; ket nagdawatanda dagiti Egipcios cadagiti alicamen a pirac ken alalicamen a balitoc, ken pagpagananay:

³⁶ Ket ni Jehova pinaraburanna dagiti tattao iti imatang dagiti Egipcios, iti casta nga inyawatda cadacuada dagiti dinawatda. Ket linabusanda dagiti Egipcios.

³⁷ Ket dagiti annac ti Israel nagnada manipud Rameses inggana iti Soccoth, aginnem a gasut a ribu a lallaki ti nagnagna malacsid dagiti ubbing.

³⁸ Ket simmurot met a nakipagsang-at cadacuada ti nawadwad a bilang dagiti nadumaduma a tattao; ken an-animal a babassit ken dadackel, a nawadwad unay.

³⁹ Ket binibingcada nga awan levadura ti ginamay nga innalada sadi Egipto; ta saan a nalevaduraan idi, gapu ta napagtalawda idiay Egipto, ket dida nacapagtactaken, wenno dida nacapagsagana idi iti canenda.

⁴⁰ Ti cabayag ti panagnaed dagiti annac ti Israel sadi Egipto uppat a gasut ket tallopulo a tawen.

⁴¹ Ket idi aggibus dagiti uppat a gasut ket tallopulo a tawen, daydi met laeng nga aldaw naaramid nga amin dagiti buybuyot ni Jehova pimmanawda iti daga nga Egipto.

⁴² Isu ti rabii a panagngilin a cangronaan ken Jehova gapu iti panangilapsotna cadacuada iti daga nga Egipto: daytoy ti rabii ni Jehova, ipangrona a ngilinen amin dagiti annac ti Israel cadagiti amin a caputotanda.

⁴³ Ket ni Jehova kinunana cada Moises ken Aaron, Daytoy ti alagaden ti pascua: awan ti sangaili a manganto kencuana;

⁴⁴ Ngem ti bag-en ti tunggal tao a magatang iti pirac, manganto calpasan ti panangcugitmo.

⁴⁵ Ti gangannaet ken ti adipen a mangmangged saandanto a mangan iti daydiay.

⁴⁶ Iti maymaysa a balay ti pangananto; dicanto mangiruar iti lasag iti ruar ti balay; wenno dicayto mangtupec iti uray maysa a tulangna.

⁴⁷ Amin a gimong ti Israel salimetmetannanto.

⁴⁸ Ket no adda gangannaet a makipagnaed kenca ket cayatna ti mangrambac iti pascua ken Jehova, macugit coma amin a lalaki na sacayto paasitgen a mangsalimetmet; ket isunto ti cas maysa nga anac ti daga; ngem awan ti siasinoman a di nacugit a manganto iti daydiay.

⁴⁹ Maymaysa ti lintegto nga agpaayto iti anac ken iti gangannaet a makipagnaed cadacayo.

⁵⁰ Casta ti panagaramid amin dagiti annac ti Israel; cas panangilbilin idi ni Jehova cada Moises ken Aaron, casta ti inaramidda.

⁵¹ Ket naaramid iti daydi met laeng nga aldaw nga innala ni Jehova dagiti annac ti Israel idiay daga nga Egipto a binuyonbuyot.