Exodo 11 - Ti Biblia (1973)

Ti maudi a didigra maamsan.

¹ Ket ni Jehova kinunana ken Moises, Addanto pay laeng maysa a didigra nga yegco ken Faraon ken iti Egipto; iti calpasanna isu bay-annacayton a pumanaw ditoy: no palubosannacayonton a pumanaw, pudno nga ipapilitnanto ti ipapanawyo a maminpinsan ditoy.

² Ibagam cadagiti pagdengeg dagiti tattao, ket dumawatda coma tunggal lalaki iti carrobana, ken tunggal babai iti carrobana, cadagiti al-alicamen a pirac ken al-alicamen a balitoc.

³ Ket ni Jehova pinaraburanna dagiti tattao iti imatang dagiti Egipcios. Maysa pay ni lalaki a Moises natan-oc unay idi iti daga nga Egipto, iti sango dagiti ad-adipen ni Faraon, ken iti sango dagiti tattao.

⁴ Ket ni Moises kinunana, Castoy ti sao ni Jehova Intono tumengnga ti rabii, agsursuracto iti tengnga ti Egipto:

⁵ Ket matayto amin dagiti annac nga inauna iti daga nga Egipto, manipud iti inauna nga anac ni Faraon a tumugaw iti tronona agingga iti inauna nga anac ti adipen a babai nga adda iti licud ti paggilingan; ken amin nga inauna nga annac dagiti an-animal.

⁶ Ket addanto dackel nga ariwawa iti amin a daga ti Egipto, nga idi caanoman di naaramid ket uray ca-anoman awanton ti casta.

⁷ Ngem iti maibusor iti siasinoman cadagiti annac ti Israel awan ti aso a mangtignayto iti dilana, uray maibusor iti tao wenno animal: tapno maammoanyo nga isalsaluminana ni Jehova ti Israel cadagiti Egipcios.

⁸ Ket amin dagitoy nga ad-adipenmo bumabadanto, ken agrucbabdanto caniac a cunada, Pumanawca, ken amin dagiti tattao nga sumurot kenca: ket iti calpasan, daytoy pumanawacto. Ket pimmanaw a sibabara ti pungtotna iti sango ni Faraon.

⁹ Ket ni Jehova kinunana ken Moises, Ni Faraon dinacayto ipangag; tapno dagiti datdatlagco umaduda iti daga nga Egipto.

¹⁰ Ket da Moises ken ni Aaron inaramidda amin dagitoy a datdatlag iti sango ni Faraon: ket ni Jehova pinatangkenna ti puso ni Faraon, ket saanna a pinalubosan a nagtalaw iti dagana dagiti annac ti Israel.