Exodo 10 - Ti Biblia (1973)

Ti didigra a doddodon. Ti napuscol a sipnget.

¹ Ket ni Jehova kinunana ken Moises, Inca sumango ken Faraon: ta pinatangkenco ti pusona ken ti puso dagiti ad-adipenna, tapno ipakitac cadacuada dagitoy a pagilasinan iti tengngada,

² Ken tapno saritaem cadagiti pagdengeg ti anacmo, ken ti anac ti anacmo, no ania dagiti inaramidco iti Egipto, ken dagiti pagilasinan nga inaramidco iti tengngada; tapno maammoanyo a siac ni Jehova.

³ Ket da Moises ken ni Aaron napanda ken Faraon, ket kinunada kencuana, Ni Jehova a Dios dagiti Hebreos castoy ti saona, Casano ti cabayagnanto ti dica panagpacumbaba iti saclangco? Bay-am a pumanaw ti ilic, tapno agdaydayawda caniac.

⁴ Wenno, no supringem ti panangpalubusmo iti ilic, adtoy, ta yegconto no bigat dagiti dodon iti beddengmo:

⁵ Ket abbungandanto iti rabaw ti daga, iti casta saanto a makita ti daga: ket lamutendanto dagiti natda, cadagiti nabati cadacayo a nailiclic iti uraro, ket canendanto tunggal cayo a tumubo nga agpaay cadacayo iti pagmulaan:

⁶ Ket mapnonto dagiti balbalaymo, ken dagiti balbalay dagiti amin nga ad-adipenmo ken dagiti balbalay dagiti amin nga Egipcios; a uray caano di nakita dagiti ammam, wenno dagiti amma dagiti ammam, nanipud caaddada iti rabaw ti daga agpapan ita. Ket timmallicud ken pimmanaw ken Faraon.

⁷ Ket dagiti ad-adipen ni Faraon kinunada kencuana, Casano ti cabayagnanto a daytoy a lalaki silsiloannatayo? Bay-am a pumanaw dagiti tattao, tapno agservida ken Jehova a Diosda: dica pay la ammo a ti Egipto nadadael?

⁸ Ni Moises ken ni Aaron naidatagda manen ken Faraon: ket kinunana cadacuada, Incayo, agdaydayawcayo ken Jehova a Diosyo; ngem siasino dagiti mapanto?

⁹ Ket ni Moises kinunana, Dacami ti mapanto agraman dagiti agtutubomi ken lallacaymi; agraman dagiti annacmi a lallaki ken babai, ken dagiti an-animalmi a babassit ken an-animalmi a dadackel mapancaminto ta rebbengna nga agrambacami ken Jehova.

¹⁰ Ket kinunana cadacuada, Adda ngarud ni Jehova cadacayo, ta palubosancayto ken dagiti babassityo: agaluadcayo; ta dakes ti adda iti sangoananyo.

¹¹ Saan a casta: dacayo a lallaki incayo, ket agdaydayawcayo ken Jehova; ta daytoy ti tarigagayyo. Ket napapanawda iti saclang ni Faraon.

¹² Ket ni Jehova kinunana ken Moises, Yunnatmo ti imam iti rabaw ti daga nga Egipto tapno lumtuad dagiti dodon, tapno umulida iti daga nga Egipto ket canenda amin a mulmula iti daga isu amin a tinidda ti uraro.

¹³ Ket ni Moises inlayatna ti sarucodna iti daga nga Egipto, ket ni Jehova pinaganginna ti naggapu iti daya idiay a daga iti daydi a nagmalmalem ken nagpatpatnag; ket idi cabigatanna, ti angin iti daya inyegna dagiti dodon.

¹⁴ Ket dagiti dodon nagwarasda iti amin a daga nga Egipto, ket nagnaedda iti amin a beddeng ti Egipto; isuda nacaamamacda unay; iti nalabes awan casdi a doddodon, wenno iti masacbayan awanto ti casdiay.

¹⁵ Ta inabbunganda ti rabaw ti amin a daga a pinagsipngetda ti daga; ket kinnanda amin a roroot iti daga, ken amin a bungbunga dagiti caycayo a tidda ti uraro: ket awan natda a nalangto, cayo man ken mula iti away iti amin a daga ti Egipto.

¹⁶ Idin ni Faraon pinaayabanna a dinardaras da Moises ken Aaron; ket kinunana, Siac nacabasolac iti maicaniwas ken Jehova a Diosyo, ken maicaniwas cadacayo.

¹⁷ Ita ngarud dawatec kenca, pacawanem, ti basalco uray daytoy laeng a daras, ket agcararagca ken Jehova a Diosmo, tapno ilisinac coma iti daytoy laeng nga ipapatay.

¹⁸ Ket pimmanaw iti ayan ni Faraon, ket nagcararag ken Jehova.

¹⁹ Ket ni Jehova inturongna ti maysa nga angin a napigsa unay nga aggapu iti laud, isu a nangiccat cadagiti dodon ken nangipalais cadacuada idiay Baybay a Nalabaga; awan natda uray maysa la coma a dodon iti amin a beddeng ti Egipto.

²⁰ Ngem ni Jehova pinatangkenna ti puso ni Faraon, ket dina pinalubosan a mapan dagiti annac ti Israel.

²¹ Ket ni Jehova kinunana ken Moises, yunnatmo ti imam iti agpalangit, tapno agsipnget iti daga nga Egipto, sipnget a mamagararicap.

²² Ket ni Moises inyunnatna ti imana iti agpalangit; ket nagsipnget iti napuscol bayat iti tallo nga aldaw iti amin a daga ti Egipto.

²³ Saanda a nacapagkikinnita, awan met timmacder iti ayanna bayat iti tallo nga aldaw: ngem amin dagiti annac ti Israel addaanda ti lawag cadagiti pagyananda.

²⁴ Ket ni Faraon pinaayabanna ni Moises ket kinunana, Incayo, agservicayo ken Jehova; isuna laeng a mabati dagiti arbanyo a babassit ken dadackel: cumuyog met coma dagiti babassityo cadacayo.

²⁵ Ket ni Moises kinunana, Maipapilit a yawatmo iti imami dagiti sacrificios ken datdaton a mapuuran, tapno agdatoncami ken Jehova a Diosmi.

²⁶ Dagiti an-animalmi maicuyogdanto met cadacami; awanto ti mabati uray maysa la coma a cucua; ta cadacuada masapulmi nga alaen a pagservimi ken Jehova a Diosmi; ket dicam pay met la ammo ita no ania ti pagserviminto ken Jehova agingga iti macadanoncami sadiay.

²⁷ Ngem ni Jehova pinatangkenna ti puso ni Faraon, ket dina pinalubosan ida a mapan.

²⁸ Ket ni Faraon kinunana kencuana, Pumanawca iti ayanco, aluadam ta bagim, dicanto kitaenen ti rupac; ta iti aldaw a panangkitamto iti rupac mataycanto.

²⁹ Ket ni Moises kinunana, Naimbag ti sinaom; diacto kitaenen ti rupam.