Exodo 1 - Ti Biblia (1973)

Pannacaparigat ti Israel sadi Egipto.

¹ Dagitoy dagiti nagnagan dagiti annac ni Israel a simrec sadi Egipto; tunggal maysa a lalaki agraman familiana kinacuyog ida ni Jacob.

² Da Ruben, Simeon, Levi ken Juda,

³ Da Issacar, Zabulon ken Benjamin,

⁴ Da Dan ken Neftali, ken Gad ken Aser.

⁵ Ket amin dagiti tattao a nagtaudda iti lasag ni Jacob pitopuloda a carcararua; ket ni Jose addan idi sadi Egipto.

⁶ Ket ni Jose natay ken amin dagiti cacabsatna ken amin daydi a caputotan.

⁷ Ket dagiti annac ni Israel immaduda, ket wimmadwadda iti casta unay, ket nabungada ket nagbalinda a naglablabes iti pannacabalin; ket ti daga napusec cadacuada.

⁸ Idi cuan nabangon ti baro nga ari sadiay Egipto, isu a di nangbigbig ken Jose.

⁹ Ket kinunana cadagiti iturayanna, Kitaenyo, dagiti tattao nga annac ti Israel ad-aduda ken manmannacabalinda ngem datayo:

¹⁰ Umaycayo, agaramidtayo a sisasaririt cadacuada di la ket ta umadaduda pay, ket no mapasamac ti gubat, tumiponda pay cadagiti cabcabusortayo, ket makicabilda cadatayo, ket pumanawda ditoy a daga.

¹¹ Iti casta insaadda dagiti mangdagdag cadacuada a mamadagsen cadagiti awawitda. Ket imbangonanda ni Faraon cadagiti il-ili a pagipenpenan iti taraon, a Pitom ken Rameses.

¹² Ngem no casano ti pammarparigatda cadacuada, ad-adda met ti yaaduda ken ad-adda ti panagrucbusda. Ket matoocanda iti maipanggep cadagiti annac ti Israel.

¹³ Ket dagiti Egipcios inadipenda a siiinget unay dagiti annac ti Israel:

¹⁴ Ket pinapaitda ti panagbiagda iti nacaro a pannacaadipen, iti panagmasa ken panagladrillo, ken amin a kita ti pacaaramatan iti talon, amin nga aramidda, isu a pinangadipenda iti napalalo cadacuada.

¹⁵ Ket ti ari ti Egipto imbagana cadagiti mammaltot nga Hebreas, a ti nagan ti maysa Sifra, ket ti nagan caduana Pua:

¹⁶ Ket kinunana, Intono mamaltotcayo cadagiti Hebreas, ket makitayo ida idiay pagpaanacan; no anac a lalaki, patayenyonto ngarud; ngem no anac a babai, agbiagto.

¹⁷ Ngem dagiti mammaltot nagbutengda iti Dios, ket dida inaramid ti cas imbilin ti ari ti Egipto cadacuada, no di ket biagenda idi dagiti ubbing a lallaki.

¹⁸ Ket pinaayaban ti ari ti Egipto dagiti mammaltot, ket kinunana cadacuada, Apayapay nga inaramidyo daytoy, ket biniagyo dagiti ubbing a lallaki?

¹⁹ Ket dagiti mammaltot kinunada ken Faraon, Gapu ta dagiti babbai nga Hebreas saanda a cas cadagiti babbai nga Egipcias; ta isuda nasiglatda, ket nacapasngaydan no dipay macadanon ti mammaltot cadacuada.

²⁰ Ket ti Dios inaramidna ti imbag cadagiti mammaltot: ket immadu dagiti tattao, ket nagbalinda a mannacabalin unay.

²¹ Ket naaramid a gapu ta dagiti mammaltot nagbutengda iti Dios, isu inaramidna ida a sagsangacabbalayan.

²² Ket imbilin ni Faraon cadagiti amin nga iturayanna, a cunana, Tunggal lalaki, nga anac a tumao, yanudyonto iti carayan, ket tunggal anac a babai biagenyonto.