Ester 9 - Ti Biblia (1973)

Dadaelen dagiti Judios dagiti cabusorda. Ti fiesta ti Purim maituyang.

¹ Idi maicasangapulo ket dua a bulan, nga isu ti bulan nga Adar, idi maicasangapulo ket tallo nga aldawna met laeng, idi a ti bilin ti ari ken ti pangngeddengna immadani iti pannacatungpalda, idi aldaw a dagiti cabcabusor dagiti Judios ninamnamada ti panangiturayda cadacuada, (idinto a naibawing iti maisupadi, a dagiti Judios nagturayda cadagiti gimmura cadacuada),

² Dagiti Judios naguornongda cadagiti il-ilida cadagiti amin a provincia ni ari Asuero, tapno mangcabil iti nagsapul iti pacadacsanda: ken awan ti tao a nacadaer cadacuada; ta ti panagbuteng cadacuada naitinnag cadagiti amin nga il-ili.

³ Ket amin dagiti pangoloen dagiti provincia, ken dagiti satrapas, ken dagiti gobernador, ken dagiti nagaramid iti aramid ti ari, tinulonganda dagiti Judios; agsipud ta ti panagbuteng ken Mardokeo naitinnag cadacuada.

⁴ Ta dackel idi ni Mardokeo idiay balay ti ari, ket ti damagna naisacnap cadagiti amin a provincia; ta ni lalaki a Mardokeo dumackel la idi a dumackel.

⁵ Ket dagiti Judios kinabilda dagiti cabusorda iti panangcabil iti campilan, ken iti panangpapatay ken pannacarbec, ket inaramidda ti aniaman a kinayatda cadagiti gimmura cadacuada.

⁶ Ket idiay Susan a palacio dagiti Judios pinatay ken dinadaelda ti limagasut a lallaki.

⁷ Ket da Porsandata, Dalfon, Aspata,

⁸ Ken Porata, Adalia, Aridata,

⁹ Ken Parmasta, Arisai, Aridai ken Vaizata.

¹⁰ A sangapulo nga annac a lallaki ni Aman nga anac a lalaki ni Amadata, a cabusor dagiti Judios, pinatayda; ngem iti samsam isuda dida intignay ti imada.

¹¹ Iti daydi nga aldaw ti bilang dagiti napapatay naiyeg iti sango ti ari idiay Susan a palacio.

¹² Ket kinuna ti ari ken reina Ester, Dagiti Judios pinatay ken dinadaelda ti lima gasut a lallaki iti Susan a palacio, ken dagiti annac a lallaki ni Aman; ania ngarud ti inaramidda iti matda cadagiti provincia ti ari! Ania ita ti dawatmo? ket maitedto kenca: wenno ania pay ti kiddawmo? ket maaramidto.

¹³ Idin kinuna ni Ester, No macaayayo iti ari, maited coma cadagiti Judio nga adda iti Susan ti panangaramidda no bigat met a mayalubog iti pangngeddeng itoy nga aldaw, ket maibitay coma dagiti annac a lallaki ni Aman iti rabaw ti pagbitayan.

¹⁴ Ket ti ari imbilinna a maaramid ti casta: ket naited ti maysa a pangngeddeng idiay Susan; ket imbitayda dagiti sangapulo nga annac a lallaki ni Aman.

¹⁵ Ket dagiti Judios nga adda idiay Susan naguornongda iti maicasangapulo ket uppat nga aldaw met ti bulan nga Adar, ket namatayda iti tallo gasut a lallaki idiay Susan; ngem iti samsam isuda dida intignay ti imada.

¹⁶ Ket dagiti sabali a Judios nga adda idi cadagiti provincia ti ari nagtitiponda, ket incanawada dagiti biagda, ket addaanda inana cadagiti cabusorda, ket pinatayda dagidiay a gimmura cadacuada pitopulo ket lima a ribu; ngem iti samsam isuda dida intignay ti imada.

¹⁷ Daytoy naaramid iti maicasangapulo ket tallo nga aldaw ti bulan nga Adar; ket iti maicasangapulo ket uppat nga aldaw ti isu met laeng a bulan aginanada, ket isu ti inaramidda nga aldaw ti panagrambac ken ragsac.

¹⁸ Ngem dagiti Judios nga addada idi idiay Susan nagguornongda iti maicasangapulo ket tallo nga aldawna ken iti maicasangapulo ket uppat nga aldawna; ket iti maicasangapulo ket lima nga aldaw iti isu met laeng a bulan naginanada ket inaramidda a maysa nga aldaw a panagrambac ken ragsac.

¹⁹ Gapuna a dagiti Judios cadagiti purpuroc, a nagnaed cadagiti di nabacudan nga il-ili, inaramidda iti maicasangapulo ket uppat nga aldaw ti bulan nga Adar a maysa nga aldaw ti ragsac ken panagrambac, ken maysa a naimbag nga aldaw, ken ti panangipaw-it ti ap-apag ti mayusa ken maysa.

²⁰ Ket ni Mardokeo insuratna dagitoy ket impaw-itna dagiti sursurat cadagiti amin a Judio a nagtaeng cadagiti amin a provincia ni ari Asuero, asideg man ken adayu agpadpada.

²¹ Tapno bilinenna ida a ngilinenda coma ti maicasangapulo ket uppat nga aldaw ti bulan nga Adar, ken castamet iti maicasangapulo ket lima nga aldawna laeng, iti tinawentawen,

²² Cas cadagiti al-aldaw a panaginana dagiti Judios cadagiti cabusorda, ken ti bulan a naibawing cadacuada nanipud iti ladingit agtungpal iti ragsac, ken nanipud iti panagleddaang agtungpal iti naimbag nga aldaw; nga aramidenda ida nga al-aldaw ti panagrambac ken ragsac ken ti panangipaw-it ti ap-apag ti maysa ken maysa, ken sagsagut iti napanglaw.

²³ Ket dagiti Judios inyusuatda nga aramiden cas inrugida ken cas insurat ni Mardokeo cadacuada.

²⁴ Agsipud ta ni Aman nga anac a lalaki ni Amadata nga Agageo, a cabusor dagiti amin a Judios, nagpanagem a maibusor cadagiti Judios tapno dadaelenna ida, ket inaramidna ti Pur, cayatna a saoen, ginnasangasat, tapno runawenna ida, ken dadaelenna ida;

²⁵ Ngem idi a ti panggep immay iti sango ti ari, isu nagbilin babaen cadagiti sursurat a ti nadangcoc a gacatna, nga ingacatna a maibusor cadagiti Judios maisubli iti rabaw ti olona met laeng, ket isu ken dagiti annacna a lallaki maibitayda idiay pagbitayan.

²⁶ Gapuna a ninagananda dagitoy nga al-aldaw iti Purim, a mayannurot iti nagan ti Pur. Iti casta gapu cadagiti amin a sasao daytoy a surat, ken ti nakitada a maipapan itoy a panggep, ken ti dimteng cadacuada,

²⁷ Dagiti Judios inkeddengda, ken inannongda cadacuada, ken iti caputotanda ken amin a kimmamang met laeng cadacuada, iti casta saan a nagcurang a salimetmetanda dagitoy dua nga aldaw a mayalubog iti pannacaisuratda ken mayalubog iti natudingan a tiempoda tunggal tawen;

²⁸ Ken dagitoy nga al-aldaw malaglagipda ken masalimetmetanda iti agnanayon iti tunggal capoonan, tunggal familia, tunggal provincia, ken tunggal ili; ket dagitoy nga aldaw ti Purim dida maawan cadagiti Judio, uray ti pannacalaglagip cadacuada di mapucaw iti caputotanda.

²⁹ Idin ni Ester a reina, nga anac a babai ni Abihail, ken ni Mardokeo a Judio, nagsuratda a binuyog ti amin a pannacabalin tapno pasingkedanda itoy maicadua a surat ti Purim.

³⁰ Ket ni Mardokeo imbaonna dagiti sursurat cadagiti Judios, cadagiti sangagasut duapulo ket pito a provincia ti pagarian ni Asuero, agraman sasao ti talna ken pudno.

³¹ Tapno pangpasingked cadagiti al-aldaw ti Purim cadagiti natudingan a tiempoda, a mayalubog iti imbilin cadacuada da Mardokeo a Judio ken reina Ester, ken cas panangeddengda a maipaay cadacuada met laeng ken ti caputotanda, iti panggep dagiti panagayunar ken panagasugda.

³² Ket ti bilin ni Ester pinasingkedanna dagitoy pangpanggep ti Purim; ket naisurat idi iti libro.