Ester 8 - Ti Biblia (1973)

Maingato ni Mardokeo. Ti dawat ni Ester. Mapalubosan dagiti Judios a rumupir cadagiti cabusorda.

¹ Iti daydi nga aldaw ni ari Asuero intedna ken reina Ester ti balay ni Aman a cabusor dagiti Judios. Ket ni Mardokeo immay iti sangoanan ti ari; ta ni Ester imbagana no asino idi kencuana.

² Ket ti ari sinuctona di singsingna, nga innalana ken Aman, ket isu ti intedna ken Mardokeo. Ket ni Ester insaadna ni Mardokeo nga agturay ti balay ni Aman.

³ Ket ni Ester nagsao pay manen iti sango ti ari, ket nagpasag cadagiti sacsacana, ket gimmawawa kencuana a binuyog dagiti lulua tapno iccatenna ti ranggas ni Aman nga Agageo, ken ti gandatna nga insaganana a maibusor cadagiti Judios.

⁴ Idin inyunnat ti ari ken Ester di cetro a balitoc. Iti casta timmacder ni Ester, ket nagtacder iti sango ti ari.

⁵ Ket kinunana, No macaay-ayo iti ari, ken no macasaracac iti parabur iti imatangna ket no ti banag agparang a nalinteg iti saclang ti ari, ken no macaayayoac cadagiti matana, masuratan coma ti mangpucaw cadagiti sursurat nga ingandat ni Aman, nga anac a lalaki ni Amadata nga Agageo, a sinuratanna a pangdadael cadagiti Judios nga adda cadagiti amin a provincia ti ari;

⁶ Ta casano ti pannacaibtorco a mangkita iti dakes nga umayto iti rabaw ti cailiac? wenno casano ti pannacaibtorco a mangkita iti pannacarba ti cabagiac?

⁷ Idin ni ari Asuero kinunana ken ni Ester a reina ken ni Mardokeo a Judio, Adtoy, intedco ken Ester ti balay ni Aman, ket ni Aman imbitayda iti rabaw ti pagbitayan, agsipud ta incabilna ti imana iti rabaw dagiti Judios.

⁸ Isuratyo met cadagiti Judios, cas ti macaay-ayo cadacayo, iti nagan ti ari, ket isu ti deppelanyo iti singsing ti ari; ta ti sinuratan a nasuratan iti nagan ti ari, ken nadeppelan iti singsing ti ari, awan ti tao a macadadael.

⁹ Idin naayaban dagiti escriba ti ari iti daydi a tiempo, iti maicatlo a bulan, nga isu ti bulan a Sivan, iti maicaduapulo ket tallo nga aldawna: ket nasuratan a mayalubog iti amin nga imbilin ni Mardokeo cadagiti Judios, ken cadagiti satrapas, ken gobernador ken pangoloen dagiti provincia nga adda manipud India agingga idiay Etiopia, a sangagasut duapulo ket pito a provincia, iti tunggal provincia a mayalubog iti panagsuratna, ken tunggal ili a mayannurot iti pagsasaoda, ken cadagiti Judios a mayalubog iti panagsuratda, ken mayalubog iti pagsasaoda.

¹⁰ Ket nagsurat iti nagan ni ari Asuero, ket isu ti dineppelanna iti singsing ti ari, ket impaw-itna dagiti sursurat cadagiti mangorreo nga agcabayo, nga agsacayda cadagiti nasiglat a cabcabayo a naaramatda idi iti panagservi iti ari, nga inyanac ti napili a cabayo:

¹¹ Nga impalubos ti ari cadagiti Judio a nagyan idi iti tunggal ili tapno agtitiponda, ken icanawada dagiti biagda, tapno dadaelen, papatayen, ken papucawenda, ti amin a pannacabalin dagiti tattao ken provincia a cayatda ti mangsillong cadacuada, cadagiti babassitda ken babbai, ket alaenda ti samsam cadacuada a maipaay a maysa a tinucmaan.

¹² Iti maymaysa nga aldaw cadagiti amin a provincia ni ari Asuero, natudingan iti maicapulo ket tallo nga aldaw ti maicasangapulo ket dua a bulan, nga isu ti bulan nga Adar.

¹³ Maysa a catucad ti surat, a maited coma ti pangngeddeng iti tunggal provincia, naiwarnac cadagiti amin nga umili, ket sisasagana coma dagiti Judios iti sangoanan daydi nga aldaw a mangbales cadagiti cabusorda.

¹⁴ Iti casta dagiti mangorreo a nagsacayda cadagiti nasiglat a cabcabayo a naaramat idi iti panagservi iti ari rimmuarda, idinto a napapardasda ken napaganetgetanda gapu iti bilin ti ari: ket naiwarnac ti pangngeddeng idiay Susan a palacio.

¹⁵ Ket rimmuar ni Mardokeo a naggapu iti saclang ti ari agraman naarian a pagan-anay nga azul ken puraw, ken agraman maysa a dackel a balangat a balitoc, ken agraman maysa a lambon a nalapat a lienzo ken purpura: ket nagdir-i ken nagragsac ti ili a Susan.

¹⁶ Dagiti Judios addaanda idi iti lawag, ken ragsac, ken rag-o ken dayaw.

¹⁷ Ket iti tunggal provincia, ken iti tunggal ili, a dimtengan ti bilin ti ari ken pangngeddengna, dagiti Judios addaanda idi iti ragsac ken rag-o, maysa a fiesta ken maysa a naimbag nga aldaw. Ket adu a naggapuda iti tengnga dagiti umili nagbalinda a Judios; ta ti panagbuteng cadagiti Judios nagtinnag cadacuada.