Ester 7 - Ti Biblia (1973)

Ni Ester idarumna ni Aman iti ari. Maibitay ni Aman.

¹ Iti casta ti ari ken ni Aman napanda a nakidaya ken Ester a reina.

² Ket ti ari kinunana manen ken Ester iti maicadua nga aldaw ti daya nga arac, Ania ti dawatmo, reina Ester? ket maitedto kenca: ket ania ti kiddawmo? uray iti caguddua ti pagarian maannogutto.

³ Idin ni Ester a reina simmungbat ket kinunana, No nacasaracac iti parabur iti imatangmo, O ari, ken no macaay-ayo iti ari, ipalubosmo a mamacaay-ayo iti ari, ipalubosmo a maited caniac ti biagco itoy dawatco, ken ti ilic iti kiddawco:

⁴ Ta malacocami, siac ken ti ilic tapno madadaelcami, tapno mapataycami, ken tapno mapucawcami. Ngem no nalacocami idi a maipaay a bagbag-en a lallaki ken babbai, nagtalnaac, nupay ti cabusor dina nabalin a binayadan iti pacaranggasan ti ari.

⁵ Idin nagsao ni ari Asuero ket kinunana ken reina Ester, Asino daydiay, ken sadino ti yanna daydiay, a nagtured a mangpennec iti pusona tapno agaramid iti casta?

⁶ Ket ni Ester kinunana, Maysa a casupadi ken maysa a cabusor, daytoy met laeng nadangcoc nga Aman. Idin ni Aman nagbuteng iti sangoanan ti ari ken ti reina.

⁷ Ket iti panagpungtot ti ari tinacderanna di daya nga arac ken napan idiay minuyongan ti palacio: ket ni Aman timmacder nga agdawat a maipaay iti biagna ken Ester a reina; ta nakitana a kinedngan ti ari ti dakes a maibusor kencuana.

⁸ Idin ti ari simmubli a naggapu iti minuyongan ti palacio idi yan ti daya nga arac; ket ni Aman napasag idi rabaw ti pagiddaan a yan idi ni Ester. Idin kinuna ti ari, Isu pilitennanto met laeng ti reina iti sangoanac iti balay? Idi a ti sao rimmuar idi ngiwat ti ari, inabbonganda ti rupa ni Aman.

⁹ Idin ni Harbona, a maysa cadagiti agayaywan iti siled kinunana iti sango ti ari, Adtoy met, a naipatacder idiay balay ni Aman ti pagbitayan a limapulo a casico ti catayagna, a ni Aman inaramidna a maipaay ken Mardokeo, isu a nagsao iti naimbag a maipaay iti ari. Ket ti ari kinunana, Isu ibitayyo idiay.

¹⁰ Iti casta imbitayda ni Aman idi pagbitayan nga insaganana ken Mardokeo. Idin ti pungtot ti ari nagbaaw.