Ester 5 - Ti Biblia (1973)

Ti ari ken ni Aman makifiesta ken Ester. Ni Aman mangaramid iti maysa a pagbitayan a maipaay ken Mardokeo.

¹ Naaramid iti maicatlo nga aldaw, a ni Ester nagkawes ti naarian a pagan-anay, ket nagtacder idiay naununeg a paraangan ti balay ti ari, iti sangoanan ti balay ti ari: ket nagtugaw ti ari iti tronona a naarian idiay balay a naarian, iti sangoanan ti pagsercan ti balay.

² Ket idi a casta, idi a ti ari nakitana ni reina Ester nga agtatacder iti paraangan, a ni Ester nacagun-od iti parabur iti imatangna; ket ti ari inyunnatna ken Ester di cetro a balitoc nga adda idi iti imana. Iti casta immadani ni Ester, ket sinagidna ti toctoc ti cetro.

³ Idin ti ari kinunana kencuana Ania ti cayatmo, reina Ester? ken ania ti kiddawem? isu ti maitedto kenca uray iti caguddua ti pagarian.

⁴ Ket ni Ester kinunana, No maipagarup a naimbag iti ari, umay coma ti ari ken ni Aman itoy nga aldaw iti daya a sinaganac a maipaay kencuana.

⁵ Idin ti ari kinunana, Pagdarasenyo ni Aman, tapno maaramid ti cas kinuna ni Ester. Iti casta ti ari ken ni Aman immayda iti daya a sinagana ni Ester.

⁶ Ket ti ari kinunana ken Ester idi daya nga arac, Ania ti dawatmo? ket isu ti maitedto kenca: ket ania ti kiddawmo? uray iti caguddua ti pagarian maannugutto.

⁷ Idin simmungbat ni Ester, ket kinunana, Ti dawatco ken kiddawco isu:

⁸ No nacasaracac iti parabur iti imatang ti ari, ken no macaay-ayo iti ari ti panangtedna iti dawatco, ken ti panangtungpalna iti kiddawco, umay coma ti ari ken ni Aman iti daya a sinaganac a maipaay cadacuada, ket aramidecto no bigat ti cas kinuna ti ari.

⁹ Idin rimmuar ni Aman iti daydi nga aldaw a sirarag-o ken siraragsac ti pusona: ngem idi nakitana ni Mardokeo idiay ruangan ti ari, a di timmacder wenno naggaraw gapu kencuana, isu napno iti pungtot a maibusor ken Mardokeo.

¹⁰ Nupay casta ni Aman minedmedanna ti bagina met laeng, ket napan idiay pagtaenganna; ket nagbaon ken pinaalana dagiti gagayyemna ken ni Zeres nga asawana a babai.

¹¹ Ket ni Aman sinaritana manen cadacuada ti dayag dagiti kinabacnangna, ken ti caadu dagiti annacna, ken amin dagiti banbanag a nangingatoan ti ari kencuana, ken no casano ti panangitan-ocna kencuana iti ngato dagiti pangoloen ken ad-adipen ti ari.

¹² Maysa pay kinuna ni Aman, Wen, ni Ester a reina dina pinalubosan ti asinoman a tao a makiserrec iti ari agingga iti daya a sinaganana no di laeng sisiac; ket castamet intono bigat ti reina inawisnac a maicadua iti ari.

¹³ Nupay casta amin daytoy awan ti gungonana caniac bayat ti pannacakitac ken Mardokeo a Judio nga agtugtugaw idiay ruangan ti ari.

¹⁴ Idin kinuna ni Zeres nga asawana ken amin dagiti gagayyemna kencuana, Maaramid coma ti maysa a pagbitayan a limapulo a casico ti catayagna, ken intono bigat agsaoca iti ari a ni Mardokeo maibitay coma idiay: iti casta makiserreccanto a siraragsac iti ari agingga iti daya. Ket ti banag inay-ayona ni Aman; ket pinaaramidna ti pagbitayan.