Ester 4 - Ti Biblia (1973)

Ni Mardokeo ud-udanna ni Ester a mangibabaet.

¹ Idi naammoan ni Mardokeo amin a naaramid, ni Mardokeo rinay-abna dagiti pagan-anayna, ket nagcawes iti lupot a nakersang a sidadapo, ken napan iti tengnga ti ili, ket imkis iti maysa a natbag ken napait nga ickis;

² Ket immay met laeng iti sangoanan ti ruangan it ari: ta awan ti macabalin a sumrec iti uneg ti ruangan ti ari a nagcawes iti lupot a nakersang.

³ Ket iti tunggal provincia iti sadinoman a dimtengan ti bilin ti ari ken ti pangngeddengna, adda idi dackel a panagleddaang iti nagtengngaan dagiti Judios, ken panagayunar, ken panagsangit, ken dung-aw; ket adu ti nagidda iti lupot a nakersang ken dapdapo.

⁴ Ket dagiti babbalasang ni Ester ken dagiti agaywan iti siledna immayda, ket isu ti imbagada kencuana; ket ti reina napaladingit iti napalalo: ket nagpaipan iti pagananay a pangcawas ken Mardokeo, ken maiccat iti lupot a nakersang kencuana; ngem ni Mardokeo dina inawat.

⁵ Idin pinaayaban ni Ester ni Atac, a maysa cadagiti agaywan iti siled ti ari, a natudingan nga agservi kencuana, ket isu ti kinumitanna a mapan ken Mardokeo, tapno ammoenna no ania daytoy idi ken ti gapuna.

⁶ Iti casta rimmuar ni Atac ken Mardokeo agingga iti nalawa a disso ti ili, nga adda idi iti sangoanan ti ruangan ti ari.

⁷ Ket ni Mardokeo imbagana kencuana ti amin a napasamac kencuana ken ti apagisu a dagup ti pirac nga ni Aman incari a pagbayad cadagiti paggamengan ti ari a gapu cadagiti Judios, a pangdadaelna cadacuada.

⁸ Intedna met kencuana ti catucad ti surat a pangngeddeng a naiwarnac idiay Susan a pangdadael cadacuada, tapno isu ti iparangna ken Ester, ken isu ti ipalawagna kencuana, ken cumitanna ni Ester tapno sumrec iti ari, tapno agpacaasi kencuana, ken agkiddaw iti sangoananna, a gapu iti ilina.

⁹ Ket ni Atac immay ket imbagana ken Ester dagiti sasao ni Mardokeo.

¹⁰ Idin ni Ester sinaona ken Atac, ket intedna kencuana ti maysa a damag ken Mardokeo, a kinunana:

¹¹ Amin dagiti ad-adipen ti ari, ken ti tattao dagiti provincia ti ari, ammoda, nga uray siasinoman, a lalaki wenno babai, a sumrecto agingga iti ari, idiay naununeg a paraangan, a di maayaban, adda maysa a linteg a maipaay kencuana, tapno mapapatay, malacsid dagiti pangyunnatanto ti ari iti cetro a balitoc, agbiagda: ngem diac naayaban a sumrec agingga iti ari cadagitoy tallopulo nga aldaw.

¹² Ket imbagada ken Mardokeo dagiti sasao ni Ester.

¹³ Idin ni Mardokeo nagdawat cadacuada nga isublida ti sungbat ken Ester, Dica panunoten kenca met laeng a macalisica iti balay ti ari, a nangnangrona ngem cadagiti amin a Judios.

¹⁴ Ta no agtalnaca a maminpinsan itoy a tiempo, no casta ti bang-ar ken ti pannacaispal bumangonto cadagiti Judios manipud iti sabali a disso, ngem sica ken ti balay ni amam mapucawcayto: ket asino ti macaammo a sica dica mayeg iti pagarian a maipaay iti casta a tiempo a cas itoy?

¹⁵ Idin ni Ester nagdawat cadacuada nga isublida ti sungbat ken Mardokeo,

¹⁶ Inca urnongem amin dagiti Judios nga addada a madama iti Susan, ket agayunarcayo a maipaay caniac, ket dicayo mangan wenno uminum bayat iti tallo nga aldaw, rabii wenno aldaw: siac met ken dagiti babbalasangco agayunarcamto met iti casta a wagas; ket iti casta sumrecacto agingga iti ari, nga uray saan a mayalubog iti linteg; ket no mapucawac, mapucawac.

¹⁷ Iti casta ni Mardokeo napan iti dalanna, ket inaramidna ti mayannurot iti amin nga imbilin kencuana ni Ester.