Ester 3 - Ti Biblia (1973)

Idian ni Mardokeo ti agraem ken Aman. Pakinacmen ni Aman a dadaelen dagiti Judios.

¹ Calpasan dagitoy a banbanag inngato ni ari Asuero ni Aman nga anac a lalaki ni Amadata nga Agageo, ket isu ti intan-ocna, ket insaadna ti tugawna iti ngato dagiti amin a pangpangoloen nga adda idi kencuana.

² Ket amin dagiti ad-adipen ti ari, a nagyan idi iti ruangan ti ari, nagrucnoyda, ket nagraemda ken Aman: ta ti ari imbilinna ti casta a maipapan kencuana. Ngem saan a nagrucnoy ni Mardokeo, wenno nagraem kencuana.

³ Idin dagiti ad-adipen ti ari, a nagyan idi iti ruangan ti ari, kinunada ken Mardokeo, Apayapay a labsingem ti bilin ti ari?

⁴ Naaramid idi a sinaoda kencuana nga inaldaw-aldaw, ket dina impangag ida, nga imbagada ken Aman, a kitaenda coma no ti panggep ni Mardokeo mataginayon: ta imbagana cadacuada nga isu maysa a Judio.

⁵ Ket idi a ni Aman nakitana a di nagrucnoy ni Mardokeo, wenno nagraem kencuana, idin ni Aman napno iti pungtot.

⁶ Ngem pinanunotna a pacauyawan ti panangaramat iti ima ken Mardokeo a maymaysa; ta impacaammoda kencuana ti ili ni Mardokeo: gapuna a ni Aman nagsapul ti pangdadaelna cadagiti amin a Judios nga adda idi iti amin a pagarian ni Asuero, a ti met laeng ili ni Mardokeo.

⁷ Idi umuna a bulan nga isu ti bulan a Nisan, idi maicasangapulo ket dua a tawen ni Ari Asuero inaramidda ti Pur, a cayat a saoen a naggiginnasangasatda iti sangoanan ni Aman iti inaldawaldaw, ken iti binulanbulan, agingga iti maicasangapulo ket dua a bulan, nga isu ti bulan nga Adar.

⁸ Ket kinuna ni Aman ken ari Asuero, Adda maysa nga ili a naiwara ken naiwaras iti tengnga dagiti il-ili cadagiti amin a provincia ti panapagariam; ket dagiti linlintegda maisupadi cadagidiay iti tunggal umili; uray dagiti linlinteg ti ari dida salimetmetan: gapuna a saan a maipaay a paggungunaan ti ari ti panagibtur cadacuada.

⁹ No isu ti macaay-ayo iti ari, maisurat coma tapno madadaelda: ket agbayadacto iti sangapulo ribu a talento a pirac cadagiti, im-ima dagiti mangaluad ti aramid ti ari, tapno isu ti ipisocda cadagiti paggamengan ti ari.

¹⁰ Ket sinucto ti ari di singsingna idi ramayna, ket intedna ken Aman nga anac a lalaki ni Amadata nga Agageo, a cabusor dagiti Judios.

¹¹ Ket ti ari kinunana ken Aman, Ti pirac maited kenca, ti umili casta met, tapno aramidem cadacuada ti cas ipagarupmo a naimbag.

¹² Idin naayaban dagiti escribas ti ari idi umuna a bulan, idi maicasangapulo ket tallo nga aldawna; ket naisurat idi cas mayalubog iti amin a ni Aman imbilinna cadagiti satrapas ken gobernador ti ari a pangoloen idi ti tunggal provincia, ken cadagiti pangpangoloen ti tunggal ili, iti tunggal provincia a mayalubog iti panagsuratna, ken iti tunggal umili a mayannurot iti pagsasaoda; iti nagan ni ari Asuero nasuratan, ket nadeppelan iti singsing ti ari.

¹³ Ket naipacorreo dagiti sursurat cadagiti amin a provincia ti ari, tapno mangdadael, mangpatay, ken mangpapucaw, cadagiti amin a Judio, agtutubo man ken lallacay agpadpada, ubbing a babassit ken babbai, iti maymaysa nga aldaw, iti met laeng maicasangapulo ket tallo nga aldaw ti maicasangapulo ket dua a bulan, nga isu ti bulan nga Adar, ken alaenda ti samsam cadacuada a maipaay a maysa a tinucmaan.

¹⁴ Ti catucad ti surat, tapno ti pangngeddeng maited iti tunggal provincia, naiwarnac agingga cadagiti amin nga il-ili, tapno sisasaganada iti daydi nga aldaw.

¹⁵ Dagiti correo rimmuarda a napardas gapu iti bilin ti ari, ket ti pangngeddeng naited idiay Susan a palacio. Ket ti ari ken ni Aman nagtugawda nga aginum; ngem ti ili a Susan agpangpangngadua.