Ester 1 - Ti Biblia (1973)

Ti fiesta ni Asucro. Ni reina Vasti agmadi a tumalantan kencuana. Maisina ni reina Vasti.

¹ Naaramid cadagiti al-aldaw ni Asuero (daytoy isu ti Asero a nagari manipud India agingga met laeng iti Etiopia, cadagiti sangagasut duapulo ket pito a provincia),

² A cadagidi nga al-aldaw, idi a nagtugaw ni ari Asuero iti trono ti pagarianna, nga adda idi idiay Susan a palacio,

³ Iti maicatlo a tawen ti panagarina, inaramidna ti maysa a rambac a maipaay cadagiti amin a pangpangoloenna ken ad-adipenna; ti pannacabalin ti Persia ken Media, dagiti natacneng ken pangpangoloen dagiti provprovincia, nga addada idi iti sangona;

⁴ Idi imparangna dagiti sansanicua ti nadayag a pagarianna ken tidayaw ti mangnibinibi a kinadayagna bayat iti adu nga al-aldaw, a sangagasut ket walopulo met laeng nga al-aldaw.

⁵ Ket idi a naturpos dagitoy nga al-aldaw, ti ari nangaramid itimaysa a rambac a maipaaycadagitiamin a tattao nga adda idi idiay Susan a palacio, dackel man ken bassit nga agpadpada, bayat iti pito nga aldaw, idiay paraangan ti minuyungan ti palacio ti ari.

⁶ Adda idi naisalapay a puraw a lupot, verde, ken azul, a naicapetda cadagiti tali a lienzo a nalapat, ken purpura cadagiti singsing a pirac ken monmonmon a marmol: dagiti pappapag balitoc ken piracda, iti rabaw ti pagpayatan a nabaldosaan iti nalabaga, ken puraw, ken amarillo, ken nangisit a marmol.

⁷ Ket isuda iniccanda ida iti inumen babaen cadagiti al-alicamen a balitoc (dagiti al-alicamen aggigidiatda idi ti maysa ken maysa) ket ti naarian nga arac nawadwad, a mayalubog iti kinaimbag ti ari.

⁸ Ket ti panaginum mayalubog idi iti linteg; awan ti mapilpilit: ta casta ti inkeddeng ti ari cadagiti amin nga agturay ti balayna, nga aramiden ti mayalubog iti pacaay-ayoan ti tunggal tao.

⁹ Casta met ni reina Vasti nangaramid iti maysa a rambac a maipaay cadagiti babbai idiay naarian a balay a cucua ni ari Asuero.

¹⁰ Iti maicapito nga aldaw, idi a ti puso ti ari nagragsac iti arac, binilinna da Mehuman, Bizta, Harbona, Bigta, Abagta, Zetar, ken Carcas, dagiti pito nga agaywan iti siled a nagaanong iti saclang ni ari Asuero.

¹¹ Tapno iyegda ni reina Vasti a sibabalangat iti naarian a balangat iti sangoanan ti ari, tapno iparangna cadagiti tattao ken pangpangoloen ti kinaimnasna; ta isu naimnas idi ti buyana.

¹² Ngem ni reina Vasti nagmadi a nagtulnog iti bilin ti ari iti pannacaaramat dagiti agaywan iti siled: gapuna a ti ari nacaunget unay, ket ti pungtotna simged kencuana.

¹³ Idin ti ari kinunana cadagiti mamasiribna a lalaki, a nacaammo cadagiti tiempo (ta casta idi ti cadawyan ti ari cadagiti amin a macaammo iti linteg ken panangocom;

¹⁴ Ket iti dennana addada idi da Carsena, Setar, Admata, Tarsis, Mares, Marsena, ken Memucan, dagiti pito a pangoloen ti Persia, ken Media, isuda a nakakita iti rupa ti ari, ken nagtugaw nga umuna iti pagarian),

¹⁵ Ania ti aramidentayo ken reina Vasti a mayalubog iti linteg, agsipud ta dina tinungpal ti bilin ni ari Asuero iti pannacaaramat dagiti agaywan iti siled?

¹⁶ Ket simmungbat ni Memucan iti sangoanan ti ari ken dagiti pangpangoloen, Ni reina Vasti saan a nagaramid iti biddut iti ari laeng, no di ket cadagiti amin a pangpangololoen, ken cadagiti amin nga umili nga adda cadagiti amin a provincia ni ari Asuero,

¹⁷ Ta daytoy nga aramid ti reina dumtengto iti ruar agingga cadagiti amin a babbai, tapno aramidenda a mauy-uyaw dagiti assawada cadagiti matada, intono maidamag, Ni ari Asuero nagbilin a mayeg ni reina Vasti iti sangoananna, ngem saan nga immay.

¹⁸ Ket itoy nga aldaw dagiti princesas ti Persia ken Media a nacangngeg iti aramid ti reina saoendanto ti umasping cadagiti amin a pangpangoloen ti ari. Iti casta tumacderto ti adu nga uyaw ken pungtot.

¹⁹ No macaay-ayo iti ari, mapalubosan coma ti maysa a bilin a naarian nga aggapu kencuana, ket maisurat coma iti tengnga dagiti linlinteg dagiti Persas ken Medos, a di mabalbaliwan, a ni Vasti saan nga umayen iti sango ni ari Asuero; ket ited coma ti ari ti casasaadna a naarian iti sabali a naim-imbag ngem ni Vasti.

²⁰ Ket intono ti pangngeddeng ti ari nga aramidennanto maiwarnac iti amin a pagarianna (ta isu ti dackel), amin dagiti assawa a babbai padayawandanto dagiti assawada, dackel man ken bassit agpadpada.

²¹ Ket ti palawag inay-ayona ti ari ken dagiti pangpangoloen; ket nagaramid ti ari iti mayalubog iti sao ni Memucan:

²² Ta impaw-itna dagiti sursurat cadagiti amin a provincia ti ari, iti tunggal provincia a mayalubog iti naisurat kencuana, ken iti tunggal umili a mayannurot iti pagsasaoda, a tunggal lalaki agturay iti bucodna a balay, ken agsao a mayalubog iti pagsasao ti ilina.