ESDRAS 8 - Ti Biblia (1973)

Lista dagiti simmurot ken ni Esdras. Maibaon dagiti Levitas ken dagiti Netineos. Maipacaammo ti panagayunar. Timbeng ti isagut iti templo. Ti idadateng idiay Jerusalem. Dagiti datdaton a naidatag.

¹ Dagitoy isuda dagiti pangpangoloen dagiti balbalay dagiti ammada, ket daytoy ti capoonan dagiti nakipagsang-at caniac a naggapu iti Babilonia, idi panagari ni Artaxerxes nga ari:

² Cadagiti annac a lallaki ni Finees, ni Gersom. Cadagiti annac a lallaki ni Itamar, ni Daniel. Cadagiti annac a lallaki ni David, ni Hattus.

³ Cadagiti annac a lallaki ni Secanias, cadagiti annac a lallaki ni Faros, ni Zacarias; ket ti caduana nabilang iti pinoonpoon dagiti lallaki sangagasutda ket limapulo.

⁴ Cadagiti annac a lallaki ni Pahat-moab, ni Elioenai nga anac a lallaki ni Zarahi; ket ti caduana duagasut a lallaki.

⁵ Cadagiti annac a lallaki ni Secanias, ti anac a lalaki Jahaziel, ket ti caduana tallo gasut a lallaki.

⁶ Ket cadagiti annac a lallaki ni Adin, ni Ebed nga anac a lalaki ni Jonatan, ket ti caduana limapulo a lallaki.

⁷ Ket cadagiti annac a lallaki ni Elam, ni Jesaias nga anac a lalaki ni Atalias, ket ti caduana pitopulo a lallaki.

⁸ Ket cadagiti annac a lallaki ni Sefatias, ni Zebadias nga anac a lalaki ni Micael; ket ti caduana walo pulo a lallaki.

⁹ Cadagiti annac a lallaki ni Joab, ni Obadias nga anac a lalaki ni Jehiel; ket ti caduana duagasut sangapulo ket walo a lallaki.

¹⁰ Ket cadagiti annac a lallaki ni Solomit ti anac a lalaki Josifias; ket ti caduana sangagasut ket innem a pulo a lallaki.

¹¹ Ket cadagiti annac a lallaki ni Bebai ni Zacarias nga anac a lalaki ni Bebai; ket ti caduana duapulo ket walo a lallaki.

¹² Ket cadagiti annac a lallaki ni Azgad ni Johanan nga anac a lalaki ni Catan; ket ti caduana sangagasut ket sangapulo a lallaki.

¹³ Ket cadagiti annac a lallaki ni Adonicam, isuda a naudi idi; ket dagitoy dagiti nagnaganda: Elifelet, Jeiel, ken Semaias; ket ti caduada innem a pulo a lallaki.

¹⁴ Ket cadagiti annac a lallaki ni Bigvai, da Utai ken Zabud; ket ti caduada pitopulo a lalaki.

¹⁵ Ket inurnongco ida idiay carayan nga agayus agingga iti Ahava; ket idiay nagpacarsocami bayat iti tallo nga aldaw: ket kimmitaac cadagiti tattao, ken cadagiti papadi, ket awan ti nasaracac cadagiti annac a lallaki ni Levi.

¹⁶ Idin pinaayabac da Eliezer, Ariel, Semaias, ken Elnatan, Jarib, Elnatan, ken Natan, Zacarfias, ken Mesullam, a pangpangoloen a lallaki; casta met cada Joiarib, ken Elnatan a manursuroda idi.

¹⁷ Ket imbaonco ida ken Iddo a pangulo idiay disso a Casipia; ket imbagac cadacuada no ania ti saoenda ken Iddo, ken cadagiti cacabsatna a Netineos, idiay disso a Casipia, tapno yegda cadacami dagiti agannong a maipaay iti balay ti Diosmi.

¹⁸ Ket mayannurot iti naimbag a panangidalan ti Diosmi cadacami inyegda cadacami ti maysa a lalaki a nasaririt, cadagiti annac a lallaki ni Mahali, nga anac a lalaki ni Levi, nga anac ni Israel; ken ni Serabias, agraman cadagiti annacna a lallaki ken cadagiti cacabsatna a lallaki, sangapuloda ket walo;

¹⁹ Ken Hasabias, ken caduana ni Jesaias cadagiti annac a lallaki ni Merari, dagiti cacabsatna a lallaki ken dagiti annacda a lallaki, duapuloda;

²⁰ Ken cadagiti Netineos a nangtedan ni David ken dagiti pangoloen ti annong dagiti Levitas, duagasut ket duapulo a Netineos: isuda amin nainagananda idi.

²¹ Ket inwarragawagco idiay ti panagayunar, idiay carayan Ahava, tapno ipacumbabami dagiti bagbagimi iti sango ti Diosmi, tapno sapulenmi kencuana ti maysa a nalinteg a dalan a maipaay cadacami, ken cadagiti babassitmi, ken cadagiti amin a cucuami.

²² Ta nagbainac a dimmawat iti ari ti maysa a buyot ti soldado ken agcacabayo a tumulong cadacami a maibusor iti cabusor iti dalan, agsipud ta sinaomi iti ari, a kinunami, Ti ima ti Diosmi adda cadagiti amin a mangsapul kencuana, a maipaay iti imbag; ngem ti pannacabalinna ken ti pungtotna maibusor cadagiti isu-amin a mangidian kencuana.

²³ Gapuna a nagayunarcami ken sinapulmi ti Diosmi gapu itoy: ket isu ti nagdawatanmi.

²⁴ Idin inlasinco ti sangapulo ket dua cadagiti pangoloen dagiti papadi, da Serebias, Hasabias, ken caduada ti sangapulo a cacabsatda a lallaki,

²⁵ Ket tinembengco nga agpaay cadacuada ti pirac, ken ti balitoc, ken dagiti al-alicamen, a ti met laeng daton a maipaay iti balay ti Diosmi isu nga indaton ti ari, ken dagiti consejerona, ken dagiti principena, ken amin nga Israel nga adda idiay a sisasango,

²⁶ Tinimbengco a naipaiggem cadacuada ti innem a gasut ket limapulo a talento a pirac, ken al-alicamen a pirac sangagasut a talento; iti balitoc sangagasut a talento;

²⁷ Ken duapulo a malucong a balitoc, iti sangaribu a daric; ken dua nga alicamen a gambang a nasudi a nasileng, a napategda a cas la balitoc.

²⁸ Ket kinunac cadacuada, Nasantoancayo ken Jehova, ken nasantoan dagiti al-alicamen; ket ti pirac ken balitoc isuda ti maysa a daton ti sibubulos a nakem ken Jehova, a Dios dagiti ammayo.

²⁹ Agsalucagcayo, ken salimetmetanyo ida, agingga iti timbengenyo ida, iti sangoanan dagiti pangoloen dagiti papadi, ken dagiti Levitas, ken dagiti pangoloen dagiti balbalay dagiti amma ti Israel, idiay Jerusalem, cadagiti sagumbi ti balay ni Jehova.

³⁰ Iti casta dagiti papadi ken dagiti Levitas inawatda ti timbeng ti pirac ken ti balitoc, ken dagiti al-alicamen, tapno iyegda idiay Jerusalem iti balay ti Diosmi.

³¹ Idin pimmanawcami idiay Carayan Ahava iti maicasangapulo ket dua nga aldaw ti umuna a bulan, tapno mapancami idiay Jerusalem: ket ti ima ti Diosmi adda idi cadacami, ket insalacannacami iti ima ti cabusor ken ti agsaneb iti dalan.

³² Ket dimtengcami iti Jerusalem, ket nagnaedcami idiay iti tallo nga aldaw.

³³ Ket iti maicapat nga aldaw ti pirac ken ti balitoc ken dagiti al-alicamen natimbengda idiay balay ti Diosmi iti aywan ni Meremot nga anac a lalaki ni Urias a padi (ket caduana idi ni Eleazar nga anac a lalaki ni Finees: ket caduada da Jozabad nga anac a lalaki ni Jesua, ken Noadias nga anac a lalaki ni Binnui, a Levita)—

³⁴ Isuda amin binilangda ken tinimbengda: ket amin ti timbeng naisurat idi a tiempo.

³⁵ Ket dagiti annac ti pannacacayaw, a rimmuar a naggapu ti pannacaibelleng, indatagda dagiti datdaton a mapuuran iti Dios ti Israel, sangapulo ket dua a vaca a lallaki gapu iti amin nga Israel, siam a pulo ket innem a carnero, pitopulo ket pito a cordero, sangapulo ket dua a calding a lallaki a maipaay iti daton ti basol: amin daytoy daton a mapuuran ken Jehova.

³⁶ Ket inyawatda dagiti incumit ti ari cadagiti gobernador ti ari, ken cadagiti gobernador iti ballasiw ti Carayan: ket intan-ocda dagiti tattao ken ti balay ti Dios.